Bible in duytsche (Delftse bijbel 1477)

§ Capit .xxxi.

1

ENde doe dese dinghen witteliken waren ghedaen: is wt ghegaen al israhel die gheuonden was inden steden iuda. ende hebben ghebroken die afgoden ende wtghesneden die bosschen: die hebben verderuet die hoocheiden. ende destrueert die outaren: niet alleen van al iuda ende beniamin. mer oec van ephraim ende manasse: tot dat sij die temael om keerden. Ende alle die sonen israhel sijn weder ghekeert: in hoer besittinghe ende steden

2

Mer ezechias heeft gheset scaren der priesteren ende leuiten doer hoer deilinghen enen yeghelicken in sijn eyghen ambocht. also wel der priesteren als der leuiten tot ghebarnde offerhande ende vreed makende offerhande: dat si souden dienen ende belien. ende singhen in den poorten der castelen sheren

3

Ende des conincs deel was dat van sijn eighen goet gheoffert soude werden ghebarnde offerhande altoes des morghens ende des auonts: ende in den sabbaten ende calenden. ende anderen hoochtijden: als ghescreuen is in der wet moysi.

4

Ende hi had gheboden den volc wonende in iherusalem. dat sij gheuen souden delen den priesteren ende leniten: dat si mochten ledich wesen tot der wet sheren.

5

Ende doe dit luyde in die oren der ghemeente. hebben die sonen israhel gheoffert veel eerste vruchten. des tarwes wijns ende olijs: ende si hebben gheoffert tienden des honichs ende alre dinghen welc die aerde voertbrenct.

6

Mer oec die sonen israhel ende iuda die woonden inden steden iuda hebben gheoffert tienden der ossen ende scapen: ende tienden der heilighen die sij gheloeft hadden den heer horen god: ende alle dese dinghen draghende hebben sij ghemaect veel hopen.

7

Inder derder maent hebben sij begonnen te legghen die fundamenten der hopen: ende inder seuender maent hebben sij die gheuolt.

8

Ende doe inghegaen waren ezechias ende sijn princen. hebben si ghesien die hopen: ende hebben ghebenedijt den heer. ende den volc israhel.

9

Ende ezechias heeft ghevraecht die priesteren ende leuiten: waer om die hopen also laghen.

10

Antwoerde hem azarias die eersee priester. vanden gheslachte sadoch segghende. Van diere tijt dat die eerste vruchten begonnen gheoffert te warden inden huse des heren. hebben wij ghegheten ende sijn sat gheworden: ende veel sijn daer ouerbleuen: daer om want die heer heeft ghebenedijt sijn volc. Ende dese ouervloedicheit die ghy siet is vander ouerbliuinghe.

11

Hier om heeft ezechias gheboden dat sij bereiden souden scuren inden huse sheren.

12

Ende doe sij dat ghedaen hadden heb-

[p. *80]

ben si inghedraghen die eerste vruchten ende tienden: ende alle dinghen die sij gheloeft hadden trouwelike. Ende hoer ouerste was chonenias leuita: ende semei sijn broeder die anderde:

13

na dien iehihel. ende azarias. ende naad. ende asahel ende iherimoth. ende iozabat. ende elihel. ende iesmachias. ende maath. ende banaias. prouoesten onder den handen chonenie ende semei sijns broeders wt den ghebot des conincs ezechie. ende azarie des bisscops des huys sheren: tot welken alle dinghen toe behoerden.

14

Mer chore leuijt een soon iemna. ende doerwachter der oosteliker poorten was voer gheset dien dinghen die willichlike gheoffert worden den heer. ende den eersten vruchten ende den geheilichden in sancta sanctorum:

15

ende onder sijn sorghe waren eden. ende beniamin. ihesue ende semeias. ende amarias ende sechenias. in den steden der priesteren: dat sij trouwelic deilen souden hoeren broederen delen. den minsten ende den meesten.

16

wtghenomen den mannen van drien iaren ende opwarts. ende allen die inghinghen den tempel sheren. Ende wat si doer alle daghen tsamen brochten inden dienst. ende bewaringhen na hoer deilinghe:

17

worden den priesteren doer hoer familien ende den leuiten van twintich iaren ende daer bouen doer hoer ordinancien ende scaren.

18

ende al der ghemeente also wel horen wiuen als kinderen van beiden kunne: trouwelic ghegheuen spijsen van dien die gheheilicht waren.

19

Mer oec vanden sonen aaron doer die ackeren ende dorpen alder steden sijn ghescict mannen die deilen souden delen allen mans kunne: van den priesteren ende leuiten.

20

Ende ezechias heeft ghedaen alle dese dinghen die wij gheseit hebben in al iuda: ende heeft ghewrocht dat goet ende rechuaerdich ende waer was voer den heer sijnen god.

21

in alle vercieringhe des dienstes shuys des heren na die wet ende cerimonien: willende soeken sijnen god in al sijnre herten. Ende hi heeftet ghedaen ende heeft voerspoet ghehadt