Bible in duytsche (Delftse bijbel 1477)

§ Ca .xxx.

1

ENde ezechias heeft ghesent tot al israhel ende iudam: ende heeft ghescreuen brieuen tot ephraim ende manassen: dat sij souden comen totten huse des heren in iherusalem. ende maecken paesschen den heer god israhel

2

Hier om doe die raet des conincs ende alle der scaren iherusalem ghehouden was: hebben sij ordineert dat sij maken souden phase in die anderde maent.

3

Want sij en mochtens niet doen in behoerliker tijt. on dat die priesteren daer toe ghenoech wesende niet en waren gheheilicht: ende tvolc en was noch niet vergadert in iherusalem.

4

Ende die reden behaechde den coninc ende al der scaren:

5

ende hebben gheboden dat men senden soude boden in al israhel van bersabee tot dan: dat si comen souden ende maken phase den heer god israhel in iherusalem. Want veel en haddens niet ghedaen als inder wet voerscreuen is.

6

Ende lopers sijn gereist mit brieuen wt des conincs ghebot. ende sijnre princen tot al israhel ende iudam: segghende na dat die coninc gheboden had. Ghi sonen israhel keert weder totten heer god abraham ende ysaac ende israhel: ende hi sal wederkeren totten reliquien die ontvloghen sijn die handen des conincs van assirien.

7

Wilt niet worden als v vaderen ende broedere die wech ghegaen sijn van den heer god hoere vaderen: ende hij heeftse ghegheuen in den doot. als ghi siet.

8

Wilt niet verharden v nacken als v vaderen. Gheeft v handen den heer: ende coemt tot sijn sanctuari dat hij gheheilicht heeft inder ewicheit. Dient den heer god uwer vaderen: ende die toirn

[p. *78]

sijnre gramscap sal worden of ghekeert van v.

9

Want ist sake dat ghi weder keert totten heer: v broederen v kinderen sullen hebben barmherticheit bij horen heren. diese gheleit hebben gheuanghen: ende sullen wederkeren in dit lant. Want sachtmodich ende goedertieren is die heer v god: ende sal niet afkeren sijn aensicht van v ist sake dat ghi wederkeert tot hem.

10

Hier om reisden die lopers haesteliken van stede tot stede doer tlant ephraim ende manasse tot zabulon: ende sij bespotten ende bescempten die boden.

11

Mer sommighe mannen van aser ende manasse ende zabulon volchden den raet: ende sijn ghecomen in iherusalem

12

Mer in iuda is gheworden die hant des heren dat hi hem gaf een hart: om te doen twoert des heren na tgebot des conincs ende der princen.

13

Ende veel volken sijn vergadert in iherusalem: om te maken die hoochtijt van paesschen in die anderde maent.

14

Ende opstaende hebben sij destruert die outaren die waren in iherusalem: ende omkerende alle die dinghen in welken sij barnden wieroeck den afgoden. ende hebbense gheworpen in die beeck cedron.

15

Ende si hebben gheoffert phase inden viertiensten dach der andere maent. Ende die priesteren ende leuiten ten lesten ghehelicht hebben gheoffert offerhanden inden huse sheren:

16

ende si hebben ghestaen in hore ordinancie na die scickenisse ende wet moysi des mans gods Mer die priesteren namen tbloet dat men soude wtstortten vanden handen der leuiten:

17

daer om want een grote scare noch niet gheheilicht en was: ende daer om offerden die leuiten phase den ghenen die niet en mochten gheheilicht worden den heer.

18

Ende oec een groot deel des volcs van ephraim ende manasse ende ysachar ende zabulon welc niet gheheilicht en was heeft ghegheten phase. niet na dat ghescreuen is: ende ezechias heeft ghebeden voer hem segghende. Die goede heer sal ghenadich wesen allen menschen

19

die mit alder herten soeken den heer god hoere vaderen: ende sal hem niet witen dat sij niet gheheilicht en sijn.

20

Ende die heer heeft hem verhoert: ende was ghenadich den volc

21

Ende die sonen israhel die gheuonden sijn in iherusalem hebben ghemaect een hoochtijt der ongheheuen broden seuen daghen in groter vrolicheit. louende den heer doer alle daghen: ende die leuiten ende priesteren mit organen die betaemden hoeren dienst

22

Ende ezechias heeft ghesproken totten hart alder leuiten. die goede verstandenisse hadden vanden heer: ende hebben ghegheten seuen daghen des hoochtijs. offerende vredelike offerhande: ende louende den heer god hoere vaderen.

23

Ende het behaghede al der scaren dat sij vieren souden oec ander seuen daghen: ende dat hebben sij ghedaen mit groter blijscap

24

Ende ezechias die coninc iuda had ghegheuen der scaren dusent stieren: ende seuen dusent scapen. Mer die princen hadden ghegheuen den volc dusent stieren: ende tien dusent scapen Hier om is gheheilicht der priesteren een grote scare:

25

ende alle die scare iuda also wel der priesteren

[p. *79]

ende leuiten. als al der menichte die ghecomen is wt israhel: sijn bestort mit vrolicheit: ende die bekeert waren totter ioedscher wet vanden lande israhel ende die woenden in iuda.

26

Ende een grote feeste is ghemaect in iherusalem: ende soedanich is niet gheweest in die stede vanden daghen salomons dauids soon des conincs israhel.

27

Ende die priesteren ende leuiten stonden op benediende tvolc: ende hoer stemme is verhoert: ende tghebet is ghecomen in die heilighe woninghe des hemels