Bible in duytsche (Delftse bijbel 1477)

§ Capittel .xxix.

1

HIer om ezechias began te regneren doen hij vijf ende twintich iaer out was: ende regneerde neghen ende twintich iaren in iherusalem. Die naem sijns moeders was abia een dochter zacharie.

2

Ende hij heeft ghedaen dat behaechlic was in den aenscijn des heren: na al die dinghen die ghedaen had dauid sijn vader.

3

In dien iaer ende inder eerster maent sijns rijcs heeft hi op gedaen die doeren shuys des heren. ende heeft die reformeert:

4

ende heeft toegeleet priesteren ende leuiten. ende heeft die vergadert in die oostelike straet:

5

ende heeft gheseit tot hem. Hoert mij ghi leuiten. ende wardt gheheilicht: maect reyn thuys des heren gods onser vaderen: ende neemt of alle die onreinicheit van die sanctuari.

6

Onse vaderen hebben ghesondicht: ende hebben quaet ghedaen inden aenscijn des heren ons gods. hem achterlatende: sij hebben af ghekeert hoer aensichten vanden tabernakel des heren ons gods. ende hebben die rug gheboden

7

sij hebben ghesloten die doeren die waren int portael ende hebben wtghedaen die lichten: ende sij en hebben niet ghebarnt wieroec. ende en hebben niet gheoffert offerhanden die men verbarnt in die sanctuari god israhel.

8

Hier om is die toren des heren beroert op iudam ende iherusalem: ende hij heeftse ghegheuen in een beroeringhe: ende in den doot ende in een bespottinghe. als ghy seluen siet mit uwen oghen.

9

Siet onse vaderen sijn gheuallen ouermits den zwaerden: onse sonen ende onse dochteren. ende wijuen sijn gheleit gheuanghen om dese sonde

10

Hier om behaecht mi nu dat wij ingaen een vorward mitten heer god israhel: ende hi sal afkeren van ons die grramscap sijns toirns.

11

Mijn sonen wilt niet versumen. V heeft vercoren die heer. dat ghi staen sult voir hem. ende hem dienen: ende sult eren hem ende barnen hem wieroec.

12

Hier om sijn opghestaen leuiten: maath een soon amasie. ende iohel een soon azarie van den soonen caath. Ende vanden sonen merari: cis een soon abdai ende azarias een soon ialalehel. Mer vanden sonen gersom: ioha een soon iemna ende eden een soon ioaha.

13

Ende vanden sonen eli-

[p. *76]

sapham: samri ende iahihel. Ende vanden sonen asaph: zacharias ende mathanias:

14

ende vanden sonen heman: iahihel ende semei Mer oec vanden sonen ydithun: semeias ende ozihel.

15

Ende sij hebben vergadert hoer broederen ende sijn geheilicht: ende sijn ingegaen na tghebot des conincs ende beueel des heren. dat si reinighen souden thuis gods.

16

Ende die priesteren ingegaen inden tempel sheren om dat te heilighen. hebben wtghedragen alle onreinicheit die si binnen vonden int portael shuis des heren: welc die leuiten ghenomen hebben ende ghedragen buten tot die beeck cedron.

17

Mer sij hebben begonnen te reinighen inden eersten daghe der eerstr maent ende inden achsten daghe der seluer maent. sijn sij inghegaen int portael des tempels sheren: ende hebben ghereinicht den tempel acht daghen: ende inden sestienden daghe der seluer maent. hebben sij volbracht dat sij begonnen hadden.

18

Ende sijn inghegaen tot ezechiam den coninc: ende hebben hem gheseit. Wij hebben geheilicht al thuis des heren. Ende toutaer des offerhants die verbarnt wort. ende sijn vaten. ende die tafel der voersettinghe mit al horen vaten:

19

ende alle den huisraet des tempels welc die coninc achaz ontreint had. in sijn rijc doe hi ouergetreden heeft: ende siet alle dinc sijn wtgheset voer den outaer des heren.

20

Ende die coninc ezechias opstaende inder dagheraet heeft vergadert alle die princen der stat. ende is op geclommen int huis sheren:

21

ende hebben te samen gheoffert seuen stieren ende seuen rammen seuen lammeren. ende seuen bocken: voer die sonde. voert rijc. voer die sanctuari. ende voer iuda. Ende hij seide den priesteren den sonen aaron: dat sij offeren souden opt outaer des heren

22

Hier om hebben si gheslaghen stieren. ende die priesteren hebben ghenomen tbloet: ende hebben dat ghestort opt outaer. Si hebben oec gheslaghen die rammen: ende hoer bloet hebben sij ghestort opt outaer: Si hebben gheoffert lammeren: ende tbloet ghestort opt outaer.

23

Ende si hebben toegheuoecht bocken voer die sonde bi den coninc: ende alle die scare. Ende hebben hoer handen ingheset op die:

24

ende die priesteren hebben die gheoffert: ende hoer bloet ghestroyet biden outaer voer die sonde al israhels. Want die coninc had gheboden dat voer al israhel soude werden offerhande voer die sonde

25

Ende hi heeft gheset leuiten inden huse sheren. mit cimbalen sanctorien ende herpen. na die scickenisse dauid ende gad des conincs propheet ende nathan des propheets. Want tghebot ons heren was: doer die hant sijnre propheten.

26

Ende die leuiten hebben ghestaen houdende die organen dauid ende die priesteren basunen:

27

ende ezechias gheboot dat sij offeren souden offerhande die men verbarnt opten outaer. Ende doe die offerhanden gheoffert worden hebben sij begonnen lof te singhen den heer ende te trompen mit trompetten. ende gheluyt te maken mit menigherlei organen die dauid coninc israhel gheuonden had.

28

Mer doe al die scare aenbede. die sanghers ende die die basunen hielden waren in horen dienst: tot dat die offerhande veruolt

[p. *77]

was.

29

Ende doe gheeindt was die offeringhe is die coninc ghecromt. ende alle die mit hem waren: ende aenbeden.

30

Ende ezechias heeft gheboden ende die princen den leuiten dat sij louen souden den heer mitten woerden dauid ende asaph des propheten: die god loefden mit groter vrolicheit: ende aenbeden mit ghecromden knye.

31

Mer ezechias heeft oec toe ghedaen dese dinghen. Ghi hebt gheuolt v handen den heer: gaet toe ende offert offerhanden. ende louen inden huyse sheren. Hier om heeft al die scare gheoffert offerhanden ende loouen ende holocausta: mit inniger herten.

32

Mer tghetal der offerhanden die men verbarnt die dese scaer offerde was dit. Tsestich stieren. hondert rammen. twe hondert lammeren:

33

ende sij hebben gheheilicht den heer ses hondert ossen: ende drie dusent scapen.

34

Mer die priesteren waren wenich: ende mochten niet ghenoech wesen om of te trecken die vellen der offerhanden die verbarnt worden. Daer om hebben hem gheholpen die leuiten hoer broederen: hent dat werc volbracht was ende die biscopen gheheilicht waren. Want die leuiten worden gheheilicht mit lichter manieren dan die priesteren.

35

Hier om hebben gheweest veel offerhanden die men verbarnt ende vetticheiden der vredeliker offerhanden ende naten der olocausten: ende die dienste shuys des heren is veruolt:

36

ende ezechias is verblijt ende al tvolc daer om. want die dienst sheren was veruolt Want het behaechde hem dat haestelike te ghescien