Bible in duytsche (Delftse bijbel 1477)

Ca .xxviij.

1

Wintich iaer was out achas doe hij began te regneeren: ende sestien iaer regneerde hij in iherusalem. hij en heeft niet ghedaen rechtuaerdicheit in den aenschijn des heren. als dauid sijn vader.

2

mer heeft ghewandert in den weghen der coninghen israhel: ende voert meer heeft hij ghegoten beelden baalim.

3

Hi is die gheen die barnde wieroec in den dal hennon: ende heeft ghereinicht sijn sonen inden vier. na die ghewoonte der heiden welc die heer heeft ghedoot in der toecoemst der kinderen israhel.

4

Ende hij offerde ende barnde thimiaem in den hoghen. ende in den cleinen berghen: ende onder alle boem mit bladen.

5

Ende die heer sijn god heeft hem ghegheuen in die hant des conincs van syrien: die hem heeft gheslaghen ende heeft ghenomen enen grooten roof van sijnen rijc: ende heeft ghebrocht in damascum. Ende hi is oec ghegheuen in den handen des conincs israhel: ende is gheslaghen mit een grote plaghe.

6

Ende phacee een soon romelie heeft doot gheslaghen van iuda hondert ende twintich dusent in enen daghe. al strijdende mannen: want sij ghelaten hadden den heer god hoere vaderen.

7

Inder seluer tijt sloech doot zechri een machtich man van ephraim maasiam des conincs soon. ende ezricam den hertoech sijns huys: ende helchanam den anderen van den coninc.

8

Ende die sonen israhel hebben ghenomen van hoere broederen twehondert dusent wijuen kijnderen ende maechden. ende onendeliken roof: ende hebben dien ghedraghen in samarien.

9

In dier tijt was daer een propheet des heren ghr-

[p. *74]

noemt obed: die is wtghegaen te ghemoet der scaren comende in samariam ende heeft hem gheseit. Siet die heer god uwer vaderen toornich teghen iudam heeftse ghegheuen in uwen handen: ende ghi hebtse ghedoot wredeliken: also dat totten hemel raect uwe wreetheit.

10

Voertmeer wildi die sonen iuda ende iherusalem v onderdanich maken tot knechten ende dienst maechden: dat in gheenre wijs nut is ghedaen. Want ghi hebt ghesondicht om dat. den heer onsen god

11

Mer hoert mijnen raet: ende leidet weder om die gheuanghen die ghi ghebrocht hebt van uwen broederen: want groten toern des heren v anstaet.

12

Hier om hebben ghestaen mannen van den princen der sonen ephraim. azarias een soon iohannan barachias een soon mosollamoth. ezechias een soon selium. ende amasias een soon hadali. teghen die gheen die quamen vanden strijt:

13

ende hebben gheseit tot hem. Ghi en sult herwaerts niet in leiden die gheuanghen: op dat wij niet en sondighen den heer. Waer om wil di toewerpen op onse sonden: ende ophopen oude misdaden? Want het is een grote sonde: ende die toorn des gramscaps sheren aen staet op israhel.

14

Ende die mannen israhel strijders hebben ghelaten den roof. ende alle die dinghen die sij ghenomen hadden. voer den princen ende al die scare:

15

ende die mannen die wij voer ghenoemt hebben stonden: ende aengrijpende die gheuanghen ende alle die naect waren. hebben sij ghecledet vanden rouen. Ende doese die ghcleet hadden ende ghescoiet. ende gheuoet mit spise ende mit dranc. ende ghesaluet om den arbeit. ende haddense ghenesen: alle die gheen die niet gaen en mochten. ende waren in crancken lijue. hebben sij gheset op hoer beesten. ende hebben die ghebrocht tot iherico die stat der palmen tot hoeren broederen: ende sij sijn weder ghekeert in samariam.

16

In diere tijt heeft ghesent die coninc achaz totten coninc van assirien. begherende hulp.

17

Ende ydumei sijn ghecomen ende hebben gheslaghen veel van iuda: ende hebben ghenomen enen groten roof.

18

Ende die philistijnen sijn wijde ghestort doer die veltsteden ende totten zuyden van iuda: ende hebben ghenomen betsames. ende ahilon. ende gadiroth. ende socho. ende thamuam. ende gamzo. mit hoeren dorpen: ende woonden in hem

19

Want die heer had vernedert iudam om achas den coninc iuda. daer om want hi hem bloot maecte van hulpe. ende versmaet had den heer:

20

ende heeft teghen hem ghebrocht teglathfalasar den coninc van assirien: die hem ghepijnt heeft: ende want hem nyemant weder en stont te mael verderuet.

21

Hier om achaz doe berooft was thuys des heren ende thuys der coninghen ende der princen. heeft ghegheuen den coninc van assirien gauen: ende nochtan en heuet hem niet ghebaet

22

Ende voert meer in der tijt sijns verdriets heeft hij vermeret die versmadenisse teghen den heer.

23

Hi bi hem seluen dat is achaz die coninc heeft gheoffert den goden damasci sijnen vianden offerhanden ende heeft gheseit. die goden der coninghen van syrien helpen hem.

[p. 75*]

ende die wil ic te vreden setten mit offerhanden. ende sij sullen mij bi staen: mer weder om hebben si hem ende al israhel gheweest een sake des vals ende verderfnisse.

24

Hier om doe achaz ghenomen hadde alle die vaten des huys gods ende te broken. heeft hi ghesloten die doeren des tempels gods: ende heeft hem seluen ghemaect outaren in allen hoecken iherusalem.

25

Ende in allen steden iuda. heeft hij ghetimmert outaren om te barnen wieroeck: ende heeft tot toirn verwect den heer god sijnre vaderen.

26

Mer die andere sijnre redenen ende al sijnre werken eerste ende leste sijn ghescreuen in den boeck der coninghen iuda ende israhel.

27

Ende achaz heeft gherust mit sijnen vaderen: ende sij hebben hem begrauen inder stat iherusalem Want sij en hebben hem niet ghenomen in die grauen der coninghen israhel. Ende ezechias sijn soon regneerde voer hem.