Bible in duytsche (Delftse bijbel 1477)

§ Capittel .xxvij

1

Vijf ende twintich iaren was out ioathan doe hij began te regneeren: ende sestien iaer regneerde hi in iherusalem. Die naem sijns moeders was iherusa. een dochter sadoch.

2

Ende hij heeft ghedaen dat rechuaerdich was voerden heer na al den dinghen die ghedaen had ozias sijn vader: wtghenomen dat hij niet en is inghegaen in den tempel sheren: ende tvolc sondichde noch.

3

Hij heeft ghetimmert die hoghe poorte des heren huys: ende heeft ghetimmert veel dinghen in die mure ophel.

4

Ende hij heeft ghetimmert steden in den berghen iuda: ende in den bosschen castelen ende toornen.

5

Hi heeft ghestreden teghen den coninc der soonen ammom. ende heeft hem verwonnen. Ende die sonen ammon hebben hem ghegheuen in diere tijt hondert pondt siluers: ende tien dusent maten tarwes: ende also veel maten gharstes. Die sonen ammon hebben hem dit ghegheuen int anderde iaer ende derde.

6

Ende ioathan is ghestarct: daer om want hij sijn weghen scitte voer den heer sijnen god.

7

Mer die ander der woerden ioathan ende alle sijn striden ende werken sijn ghescreuen int boeck der coninghen israhel ende iuda.

8

Vijf ende twintich iaren was out ioathan doe hi began te regneeren: ende sestien iaer regneerde hij in iherusalem.

9

Ende ioathan heeft gherust mit sijnen vaderen: ende sij hebben hem ghegrauen inder stat dauid: ende achaz sijn soon regneerde voer hem