Bible in duytsche (Delftse bijbel 1477)

§ Ca .xxv.

1

AMasias was vijf ende twintich iaer out doe hi began te regneeren: ende neghen ende twintich iaren regneerde hij in iherusalem

2

Ende hi heeft goet ghedaen int aenscijn sheren: nochtan niet in volmaecter herten. Die naem sijns moeders was ioiaden van iherusalem.

3

Ende doe hi sach dat sijn rijc ghestarct was. heeft hij gheworcht die knechten die den coninc sijnen vader ghedoot hadden:

4

mer hoer soonen en heeft hij niet ghedoot. als ghescreuen staet inden boock des wets moysi: daer die heer gheboden heeft segghende. Die vaderen en sullen niet

[p. *70]

ghedoot werden om die sonen. noch die sonen om horen vaderen: mer een yghelic sal steruen in sijnre sonde.

5

Hier om heeft amasias vergadert iudam. ende heefse gheset doer familien tribunen ende centurionen in al iuda ende beniamin: ende heeft ghetelt van twintich iaren opwarts. ende heeft gheuonden dertich dusent ionghelinghen die wtgaen mochten ten strijde ende houden speer ende scildt.

6

Ende hij huerde om loon van israhel hondert dusent starker mannen om hondert pondt siluers.

7

Mer een man gods is ghecomen tot hem ende seide O coninc die scaer israhel en moet niet wtgaen mit dij. Want die heer en is niet mit israhel: noch mit allen den sonen ephraim.

8

Ende ist sake dattu neemste die strijden te sijn in stercheit des heers: god sal doen dattu vanden vianden salste worden verwonnen. Want god hoert toe te helpen: ende in een vlucht te keeren.

9

Ende amasias seide tot den man gods. Wat sal dan worden van den hondert ponden die ic ghegheuen heb den ridderen israhel? Ende die man gods heeft hem gheantwordt Die heer heeft daer hij dij van gheuen mach veel meer dan dese sijn.

10

Hier om heeft amasias ghesceiden dat heer dat tot hem ghecomen was wt ephraim: dat weder keren soude in sijn stede. Ende die seer toornich teghen iudam: sijn weder ghekeert in hoer lantscap.

11

Mer amasias leiden trouwolic wt sijn volc. ende is ghegaen int dal daer men zout maecte: ende heeft gheslaghen tien dusent sonen seir.

12

Ende die sonen iuda hebben ander tien dusent mannen gheuanghen: ende hebbense gheleet tot dat opperste eens steens ende hebben die neder gheworpen van den hoochste tot beneden ende die sijn alle gheborsten.

13

Ende dat heer dat amasias weder om sende op dat niet en soude gaen mit hem te strijde. is ghestroit inden steden iuda. van samaria tot bethoron: ende doe drie hondert doet gheslaghen waren heeft hij ghenomen enen groten roof.

14

Ende amasias na die slacht der ydumeen ende die goden der sonen seir toe ghedraghen heeft die gheset hem tot goden: ende aenbeden die: ende barnden wieroec.

15

Waer om die heer toornich teghen amasiam heeft tot hem ghesendt een propheet die hem segghen soude. Waer om aenbeedstu goden die hoer volc niet verlost en hebben van dijnre hant?

16

Ende doe hij dese woerde sprac. antwoerde den coninc hem? Bistu des conincs raetsman? Laetet of op dat ic dij niet en dode. Ende die propheet neder climmende seide. ic weet dat god ghedocht heeft di te doden die ghedaen hebste dit quaet ende voert meer niet en wilste volghen mijnen raet.

17

Hier om amasias die coninc iuda na enen seer quaden raet in ghegaen: heeft ghesent tot ioias den soon ioachaz die soon was iehu den coninc israhel segghende. Com ende laet ons malcanderen besien.

18

Ende hi heeft weder ghesendt boden segghende Een dijstel die is in libano. heeft ghesent totten cederboom des berchs libani. segghende. Ghif dijn dochter mijnen soon te wijue. Ende siet die beesten die

[p. *71]

waren int woud libani: sijn ouerghegaen ende hebben den distel onder die voete ghetreden.

19

Du hebste gheseit ic heb gheslaghen edom: ende daer om wort dijn herte opgheboert in houerdien. Sitte in dijn huys Waer om verwecstu teghen di quaet: dattu vallen moechste ende iudas mit di?

20

Amasias en woude niet horen: want die wille des heren was. dat hi ghegheuen soude werden in den handen der vianden om die goden edom.

21

Hier om is ioas die coninc israhel op gheclommen: ende sij hebben malcanderen ghesien. Mer amasias die coninc iuda was in bethsames iude.

22

Ende iudas is gheuallen voer israhel: ende heeft gheuloghen in sijn tabernaculen.

23

Ende ioas die coninc israhel heeft gheuanghen amasiam den coninc iuda enen soon ioas eens soon ochosie in bethsames ende heeft hem gheleedt in iherusalam: ende heeft verderft sijn muyr. van die poorte ephraim tot die poorte des hoecks vierhondert cubiten

24

Ende al tgout ende siluer. ende alle vaten die hij had gheuonden inden huse gods. ende bi obededom. ende oec in den scatten des conincs huys. ende die sonen der gheeselen: heeft hij weder ghebrocht in samariam.

25

Mer amasias een soon ioas een coninc iuda heeft gheleeft daer na dat ioas een soon ioachas ende coninc israhel ghestoruen was vijftien iaren.

26

Mer alle die andere der sermonen amasie eerste ende leste sijn ghescreuen in den boeck der coninghen iuda ende israhel.

27

Ende doe hi is af ghegaen vanden heer: hebben sij hem laghen wtgherecht in iherusalem Ende doe hij vloe tot lachis hebben sij ghesent ende hebben hem daer doot gheslaghen:

28

ende wederbrenghende op paerden hebben hem ghegrauen mit sijnen vaderen in der stat dauid.