Bible in duytsche (Delftse bijbel 1477)

§ Capittel .xxiiij.

1

SEuen iaer was out ioas doe hij began te regneren: ende viertich iaren regneerde hij in iherusalem. Die name sijns moeders was sebia van bersabee

2

Ende hi heeft ghedaen dat goet is voerden heer in alle den daghen ioiade des priesters

3

mer ioiada die nam voer hem twe wijuen: wt welken hij heeft ghewonnen sonen ende dochteren

4

Daer na behaghede ioas dat hi soude vertimmeren dat huys sheren:

5

ende heeft vergadert die priesteren ende leuiten: ende seide tot hem. Gaet wt totten steden iuda: ende vergadert ghelt van al israhel om die reformacie des tempels ons gods doer allen iaren: ende doet dat haesteliken. Mer die leuiten hebben dat ghedaen versumelic.

6

Ende die coninc heeft gheropen ioiadam den prince: ende seide hem. Waer om en hebstu niet besorghet dattu ghedwonghen hadste die leuiten ghelt in te draghen van iuda ende van iherusalem welc gheset is van moyse den knecht sheren: dat al die vergaderinghe israhel soude indraghen int tabernakel des ghetughes?

7

Want die seer quade athalia ende hoer sonen hebben ghedestrueert thuys gods: ende van allen dinghen die gheheilicht waren inden tempel sheren hebben sij verciert den tempel baalim.

8

Hier om heeft die coninc gheboden. ende sij hebben ghemaect een arke: ende hebben die gheset bi der poorten sheren buten

9

Ende het is ghepredict in iuda ende iherusalem: dat elc soude brengen loon den heer dat moyses die knecht gods gheset heeft op al israhel inder wostenie

10

Ende alle die princen. ende al tvolc sijn verblijt: ende inghegaen hebben tsamen ghedraghen in die arke ende ghesent: also dat sij veruolt wart.

11

Ende doe die tijt was dat sij souden draghen voer den coninc die arke doer die handen der leniten: want sij saghen veel ghelds: ghinc in die scriba des conincs ende die deerste priester gheset had: ende storten wt dat ghelt dat was inder arken Mer die arke droeghen sij weder tot hoerre stede: ende soe deden sij in allen daghen.

12

Ende ontellic ghelt is vergadert dat die coninc ende ioiada hebben ghegheuen den ghenen die waren bouen die wercken des heren huys. Ende sij huerden daer van steenhouwers ende meesters alre werken. dat sij weder maken souden des heren huys: ende smeden des ysers ende metaels: op dat ghesterct soude werden datter beghan te vallen.

13

Ende die daer wrochten deden subtijlic: ende die litteiken der wanden omleiden sij mit horen handen: ende verwecten des heren huys in sijnen eersten staet: ende dedent vaste staen.

14

Ende doe sij volmaect hadden alle die werken. hebben sij ghedraghen voer den coninc ende ioiada dat ander deel des gheldes: van welken ghemaect sijn die vaten des tempels inden dienst totten offerhanden: ende scalen ende ander gouden vaten ende silueren. Ende offerhanden worden gheoffert inden huys sheren ewelic in alle den daghen ioiade.

15

Mer ioiada is out gheworden vol der daghen

[p. *69]

ende is ghestoruen doe hij hondert ende dertich iaer out was:

16

ende sij hebben hem begrauen in die stat dauid mitten coninghen: want hi goet ghedaen had mit israhel ende mit sijnen huyse.

17

Mer doe ghestoruen was ioiada: sijn inghegaen die princen iuda. ende aenbeden den coninc. Ende hij bemorwet mit horen diensten volchde hem.

18

Ende sij hebben ghelaten den tempel des heren gods hoere vaderen ende hebben ghedient den bosschen ende den ghesneden beelden: ende die toorn gods is gheworden teghen iudam ende iherusalem om dese sonde.

19

Ende hij sende hem propheten dat sij wederkeren souden totten heer: welc protesterende dat is god te tughe nemende sij niet en wouden horen.

20

Hier om die gheest gods andede zachariam den soon ioiade priester: ende stont int aenscijn des volcs. ende seide hem Dit seit god. Waer om ouertreedt ghi tghebot des heren dat v niet baten en sal: ende laet den heer dat hij v laten mach?

21

Ende sij vergadert. worpen stenen teghen hem na des conincs ghebot in den sael des heren huys

22

Ende die coninc ioas en heeft niet ghedocht die barmherticheit die ioiada sijn vader mit hem ghedaen had: mer heeft ghedoot sijnen soon. Ende doe hi steruen soude. sprac hi. Die heer moet sien ende weder eyschen.

23

Ende doe een iaer was voer bij ghegaen. is teghen hem op gheclommen een scare van syrien: ende is ghecomen in iudam ende iherusalem ende heeft ghedoot alle die princen des volcs: ende al den roof hebben sij ghesent den coninc in damascum

24

Ende certein. want seer cleen ghetal der mannen van syrien was ghecomen heeft die heer ghegeuen in horen handen ontellike scaren: want sij den heer god hoere vaderen ghelaten hadden. Ende teghen ioas hebben sij ghedaen lasterlike oerdelen:

25

ende wechgaende hebben sij hem ghelaten in groten quellinghen. Mer teghen hem sijn op ghestaen sijn knechten in een wraec des bloets zacharie. die soon was ioiade des priesters. ende doden hem in sijn bedde ende hi is ghestoruen: ende si hebben hem begrauen in der stat dauid. mer niet in den grauen der coninghen

26

Ende hem leiden laghen zabath een soon semath amanitidis: ende iosabat een soon semarith moabitidis.

27

Mer sijn sonen ende die summe des ghelts dat vergadert was onder hem. ende die wedermakinghe des huys gods sijn ghescreuen naerstelic in den boock der coninghen. Ende amasias sijn soon regneerde voer hem