Bible in duytsche (Delftse bijbel 1477)

§ Ca .xxiij

1

MEr int seeuende iaer ioiada ghestarct. heeft tot hem genomen centurionen. als azariam den soon iheroboam. ende ismahel den soon iohannan ende azariam den soon obed. ende maasiam den soon adaie. ende elisaphat den soon zechri: ende maecte mit hem een ouerdracht.

2

Welc omgaende iudam hebben vergadert die leuiten van allen steden iuda. ende princen der familien israhel: ende sijn ghecomen in iherusalem.

3

Ende al dese vergaderinghe heeft ghemaect een ouerdracht in den huse gods mit den coninc. Ende ioiada seide tot hem. Siet des conincs soon sal regneeren als die heer ghesproken heeft op die sonen dauid.

4

Dit is die reden die ghi doen sult. Dat derde deel uwer die comen totten sabboth der priesteren ende leuiten ende doerwaerderen sal sijn in den poorten:

5

ende derde deel tot des conincs huys: ende derde deel totter poorten die ghenoemt wort des fundaments Mer alt ander ghemeen volc sal sijn inden salen des huys sheren:

6

ende nyemant anders en sal ingaen thuys sheren. dan die priesters ende die dienen vanden leuiten Si sullen alleen ingaen want sij sijn gheheylicht: ende alt ander volc sal bewaren die bewaringhe sheren.

7

Mer die leuiten sullen ombeuaen den coninc hebbende een yghelic sijn wapen: ende ist sake dat yemant anders inghinc in den tempel die sal werden ghedoot: ende sullen sijn mitten coninc. ingaende ende wtgaende.

8

Hier om hebben die leuiten ende al iuda

[p. *67]

ghedaen na alle den woerden die ioiada die biscop gheboden had. Ende yghelike hebben toe ghenomen mannen die onder hem waren: ende quamen doer ordinancien des sabboths mit dien die den sabboth veruolt hadden. ende sijn wt ghegaen. Mer ioiada die biscop en liet die scaren niet wech gaen. die hem pleghen na te volghen doer elke weken.

9

Ende ioiada priester gaf den heren ouer hondert: speren ende scilden ende clein scilden als halue manen des conincs dauid: welc hi gheheilicht had in den huse des heren

10

Ende hi heeft gheset al tvolc die swaerden hielden vander rechter sijden totter luchter sijden des tempels. biden outaer ende tempel inden omganc des conincs:

11

ende hebben wtgheleet des conincs soon ende hebben hem op gheset eens conincs croon in ghetughenisse: ende gauen hem in sijn hant die wet te houden. ende maecten hem coninc Ende die biscop ioiada salfde hem. ende sijn sonen: ende hebben hem goet ghebeden ende seiden. Die coninc moet leuen.

12

Doe dit hoerde athalia als die stemmen der gheenre die lopende waren: ende loofden den coninc: is sij inghegaen totten volc inden tempel sheren.

13

Ende doe sij sach den coninc staende op een trap inden inganc ende die princen ende scaren omtrent hem. ende al tvolc des lands verblidende ende gheluyt makende mit trompetten. ende singhende niet menigherlei organen. ende die stemme der louers: heeft sij ghesneden hoer clederen ende seide. Laghen laghen.

14

Mer die biscop ioiada wtghegaen totten centurionen ende princen des heers heeft gheseit tot hem. Leetse wt den begrip des tempels: ende laetse buten worden doot gheslaghen mitten swaerde Ende die priester heeft gheboden dat sij niet ghedoot en soude werden in den huse sheren.

15

Ende sij hebben hoer handen gheset op haren necke. Ende doe sij inghinc die poorte der paerden huys des conincs: sloeghen si hoer daer doot.

16

Ende ioiada maecte een ouerdracht tusschen hem ende al tvolc. ende den coninc: dat sij souden sijn een volc des heren.

17

Hier om is al tvolc inghegaen int huys baal. ende destrueerden dat: ende hebben ghebroken die outaren ende sijn beelden: ende mathan den priester baal hebben sij ghedoot voer die outaren.

18

Ende ioiada heeft gheset prouoisten in den huse sheren ende onder den handen der priestereren ende leuiten. die dauid ghedeelt heeft in den huse sheren: dat sij offeren souden den heer ghebarnde offerhande. als ghescreuen is inder wet moysi. in blijscappen ende mit sanghen: na die scickenisse dauid.

19

Ende hij heeft gheset doerwaerders inden poorten shuys des heren: datter gheen onrein mensche en soude ingaen in allen dinc.

20

Ende hi heeft ghenomen centurionen ende seer starcke mannen. ende princen des volcs ende al die ghemeente des lants: ende hebben den coninc doen neder climmen vanden huse sheren. ende ingaen doert middel der ouerster poorten in des conincs huys: ende hebben gheset inden conincliken stoel.

21

Ende al tvolc des lants heeft hem verblijt: ende die stede heeft gherust

[p. *68]

Mer athalia is ghedoot mitten swaerde