Bible in duytsche (Delftse bijbel 1477)

§ Ca .xxi.

1

ENde iosaphat heeft gherust mit sijnen vaderen: ende is ghegrauen mit hem in die stat dauid: ende ioram sijn soon regneerde voer hem.

2

Die had broederen soonen iosaphat: azariam. ende iahihel. ende zachariam. ende azariam ende michael. ende saphariam. Alle dese waren sonen iosaphat des conincs iuda.

3

Ende hoer vader heeft hem ghegheuen veel ghauen siluers ende goudts. ende ghewichten mit sterken steden in iuda: mer trijc heeft hi ghegeuen ioram want hi eerst gheboren was.

4

Ende ioram is op ghestaen op trijc sijns vaders. Ende doe hi hem seluen gestarct had: doede hij alle sijn broederen mitten swaerde: ende sommighe vanden princen iuda.

5

Twe ende dertich iaren was hij out ioram doe hij beghan te regneeren: ende acht iaren regneerde hij in ihernsalem:

6

ende hij wanderde inden weghen der coninghen israhel als dede dat huys achab. Want achabs dochter was sijn wijf. Ende heeft quaet ghedaen in den aenscijn des heren.

7

Mer die heer en heeft niet ghewilt verderuen dat huys dauid om die vorwaert die hi ghemaect had mit hem: ende want hij gheloeft had te gheuen hem een licht ende sijnen sonen in alre tijt

8

In dien daghen rebelleerde edom dat hi niet en woude wesen onderdanich iude: ende setten hem seluen enen coninc.

9

Ende doe ioram ouerghinc mit sijnen princen ende mit al sijn rijdende heer dat mit hem was: is hij opghestaen inder nacht ende heeft gheslaghen edom die hem ombeuanghen had: ende alle die hertoghen sijnre rijders

10

Nochtan rebelleerde edom. ende en wilde niet wesen onder die macht iuda: hent tot desen daghe. In diere tijt is oec lobna af gheghaen: dat hi niet soude wesen onder sijn hant. Want hi ghelaten had den heer god sijnre vaderen:

11

ende voertmeer heeft hij ghetimmert die hoochte in den steden iuda: ende heeft doen ouerspelen die woonres iherusalem. ende iudam doen ouer treden.

12

Mer

[p. *65]

hem sijn brieuen ghebrocht van helia den prophete: in welken ghescreuen was Dit seit die heer god dauid dijns vaders. Want du niet ghewandert hebste in den weghen iosaphat dijns vaders. ende in den weghen asa des conincs iuda.

13

mer du biste inghegaen doer den wech der couinghen israhel. ende hebste iudam doen ouerspeelen ende die woonres ihernsalem. ende hebste na gheuolcht die ouertredinghe des huys achab: ende voert meer hebstu ghedoot dijn broeders tghesin dijns vaders die beter waren dan du:

14

siet die heer sal dij slaen mit een grote plaghe. mit dijnen volc. ende wijuen ende dijnen sonen ende al dijn substancy.

15

Mer du sulste siec wesen mit die quaetste quellinghe des buykes: hent dijn inghewande sullen wt gaen allenken in allen daghen

16

Hier om heeft die heer verwect teghen ioram den gheest der philisteen ende van arabien. die nabueren sijn den morianen:

17

ende sijn op gheclommen int lant iuda. ende hebben dat verdoruen. Ende hebben al die substanci ghenomen die gheuonden is in des conincs huys: ende voert meer sijn sonen ende wijuen. Ende gheen soon en is hem ghebleuen dan ioachaz die die ioncste was.

18

Ende bouen al desen heeft hem god gheslaghen mit ongheneselike quale des bukes.

19

Ende doe die een dach den anderen volchde. ende spacien der tijden worden omghekeert is veruolt die cirkel van tween iaren: ende hi is also mit langher onreinicheit verteert dat hi oec wtsceet sijn inghewanden. ende hi derfde te samen sijn siecte ende sijn leuen. Ende is ghestoruen van een seer quade siecte: ende tvolc en heeft hem gheen exequien ghedaen na der ghewoenten des barnens: als si ghedaen hadden sijnen ouderen.

20

Twe ende dertich iaer was hi out doe hij beghan te regneeren: ende regneerde acht iaer in iherusalem Ende hi en heeft niet ghewandert rechtuaerdelic: ende sij hebben hem ghegrauen in der stat dauid: mer niet in der coninghen graf