Bible in duytsche (Delftse bijbel 1477)

§ Capittel .xx.

1

NA desen sijn vergadert die sonen ammon ende die sonen moab ende mit hem vanden ammoniten tot iosaphat: om te striden teghen hem.

2

Ende boden sijn ghecomen: ende openbaerden iosaphat segghende. Teghen dij coemt groete veelheit vanden steden die ouer tmeer sijn ende van syrien: ende siet si sijn in asasonthamar. welc is engaddi.

3

Ende iosaphat veruaert mit anxte. gaf hem gheheel te bidden den heer ende heeft ghepredict te vasten al iuda.

4

Ende iudas is vergadert te bidden den heer: mer oec al van hoeren steden sijn ghecomen om hem te bidden.

5

Ende doe iosaphat stonde in die middel scare iuda ende iherusalem in den huyse sheren voer den niewen zael

6

seide hi. Heer god onser vaderen du biste god in den hemel: ende du begheerste alle rijken der volcken. In dijnre hant is stercheit ende macht: ende niemant en mach dij weder staen.

7

En hebstu onse god niet doot gheslaghen alle die woonres deser aerden voer dijn volc israhel. ende heb die ghegheuen den gheslachte abraham dijns vrients inder ewicheit?

8

Ende hebben daer in ghewoent: ende ghetimmert daer in dijnen naem een sanctuari segghende.

9

Ist sake dat op ons quade dinghen vielen. als tswaert des oerdels. pestilenci ende hongher: so sullen wij staen voer dit huys in dijn aenscijn. in welken aengheropen is dijnen naem. ende wi sullen roepen tot dij in onsen verdrieten: ende du salste verhoren ende ons ghesont maken.

10

Hier om nv siet die sonen ammon ende moab ende die berch seir doer welcken ghi niet gegheuen en hebt ysrahel dat si daer doer ghinghen doe si wt ghinghen van egipten. mer hebben gheweken van hem ende en hebbense niet doot gheslaghen.

11

si doen contrari: ende arbeiden ons wt te werpen vander besittinghe die du onse god ons ghegheuen hebste

12

Hier om en saltuse niet oerdelen? want in ons en is so grote starcheit niet dat wij moghen wederstaen. deser scaren die gheuallen is op ons: mer want wi niet en weten wat wi doen sullen: hebben wi dat alleen voer handen: dat wij onse oghen scicken tot di.

13

Ende al iuda stont voer den heer: mit den cleinen kinderen ende wijuen ende hoeren kinderen

14

Mer daer was iazihel een soon zacharie die soon was banaie die soon was iehihel die soon was nathanie een leuite vanden soonen asaph: op welken gheworden es die gheest sheren int middel der scaren

15

ende seide. Merct al iuda. ende ghi die woent in ihernsalem: ende du coninc iosaphat. Dit seit v die heer En wilt niet ontsien noch vruchten dese veelheit Want ten is v strijt niet mer gods.

16

Morghen suldi neder climmen teghen hem. Want sij sullen op

[p. *63]

climmen doer een berch genoemt sis: ende ghi sultse vinden in dat opperste der beken die is teghen die wostenie iheruhel.

17

Want ghi en sult niet striden: mer staet alleen trowelike: ende ghi sult sien die hulpe sheren op v. O iuda ende iherusalem en wilt niet ontsien noch vruchten: morghen suldi wtgaen teghen hem: ende die heer sal sijn mit v

18

Hier om iosaphat ende inda ende al die woenres iherusalem vielen voerwarts in die aerde voer den heer: ende aenbeden hem

19

Mer die leuiten vanden sonen caath ende vanden sonen chore loofden den heer god israhel mit groter stemmen in den hoghen.

20

Ende doe si smorghens waren op ghestaen sijn sij wtghegaen doer die woostenie thecue: ende doe sij waren ghereist iosaphat staende int middel hoere. seide. Hoert mij ghi mannen iuda: ende alle woonres iherusalem. Gheloeft in den heer uwen god: ende ghi sult seker sijn: gheloeft sijnen propheten: ende alle gheluckige dinghen sullen v geuallen

21

Hi heeft raet ghegeuen den volc: ende heeft gheset sanghers des heren om hem te louen in horen scaren. ende gaen voer theer: ende segghen mit eendrachtigher stemmen. Beliet den heer: want inder ewicheit is sijn barmherticheit

22

Ende doe sij begonnen lof te singhen heeft die heer ghekeert hoer laghen ni hem seluen als der sonen ammon ende moab ende des berchs seir. die wtghegaen waren teghen iudam te striden: ende sij sijn gheslaghen.

23

Want die sonen ammon ende moab sijn tsamen op ghestaen teghen die woonres des berchs seir: om te doden ende die te verderuen Ende doe sij dat volbracht hadden mitten werc: sijn sij oec ghekeert in hem seluen ende sijn gheuallen van wonden onder hem seluen.

24

Mer doe iudas ghecomen was tot die speluncke die ansiet die woestenie: heeft hi ghesien verre al tlant vol doder lichamen: ende niemant ouer ghebleuen die den doot mochte ontgaen.

25

Hier om is iosaphat ghecomen ende al tvolc mit hem om af te nemen die rouen der doden: ende sij hebben gheuonden onder die dode lichamen menigherlei huysraet. ende cledere ende costelike vaten. ende hebbense ghenomen: also dat sij die alle niet draghen en mochten noch doer drie daghen die rouen afhalen. van grootheit des roeues.

26

Mer in den vierden daghe sijn si vergadert in den dal der benediinghen Want si daer ghebenedijt hebben den heer: hebben sij die stede ghenoemt een dal der benediinghe hent tot desen daghe.

27

Ende alle man iuda ende die woonres iherusalem ende iosaphat voer hem sijn weder ghekeert in iherusalem. mit groter vrolicheit: want die heer hem ghegheuen hadde bliscap van hoeren vianden

28

Ende sijn inghegaen in iherusalem mit sanctorien ende harpen ende trompetten int huys sheren.

29

Ende die anxt sheren is gheuallen op alle rijken der aerden: doe sij ghehoert hadden dat die heer ghestreden had teghen die vianden israhel.

30

Ende dat rijc iosaphat heeft gherust: ende die heer heeft hem ghegheuen vrede in sijnen omganc.

31

Ende iosaphat heeft gheregneert op iudam: ende was

[p. *64]

vijf ende dertich iaer out doe hij began te regneren. Mer hij regneerde vijf ende twintich iaren in iherusalem: ende die naem sijnre moeder was azuba een dochter selachi.

32

Ende hij wanderde in den wech sijns vaders asa noch en weec niet van dien: doende die behaghelic waren voer den heer.

33

Nochtan en nam hi niet af die hoocheden: ende tvolc en scitte noch niet sijn herte totten heer god sijnre vaderen

34

Mer die andere der werken iosaphat der eerster ende der lester sijn ghescreuen in den woerden ihehu die soon was anani welc hi ghescreuen heeft inden boeck der coninghen israhel.

35

Na desen ghinc in vrientscap iosaphat die coninc iuda mit ochozia den coninc israhel welcs werken waren seer quaet:

36

ende was deelachtich dat hij maecte scepen die gaen souden in tharsis: ende sij hebben ghemaect een vloet in asion gaber.

37

Mer eliezer een soon dodau van maresa heeft ghepropheteert tot iosaphat segghende. Want du vrede hebste ghehadt mit ochozia. heeft die heer gheslaghen dijn werken: ende die scepen sijn te broken: ende en mochten niet gaen in tharsis