Bible in duytsche (Delftse bijbel 1477)

§ Ca .xix.

1

MEr iosaphat die coninc iuda is weder ghekeert in sijn huys vredelic in iherusalem.

2

Ende hem is te moet ghecomen iehu een soon anani een propheet: ende seide tot hem. Den bosen gheefstu hulpe. ende wertste toeghevocht mit vrientscappen den ghenen die den heer ghehaet hebben: ende daer omme hebstu verdient den toirn sheren:

3

mer goede werken sijn gheuonden in dij: wantu ofghenomen hebste die bosschen vanden lant iuda. ende bereit dijn hart om te soeken den heer god dijnre vaderen.

4

Ende iosaphat woonde in iherusalem. ende is anderwerf wtghegaen totten volck. van bersabee totten berch ephraim: ende heefse wedergheropen totten heer god hore vaderen:

5

ende heeft gheset rechters des lants in allen steden iuda. die sterck waren doer allen landen:

6

ende ghebiedende den rechteren seide hi. siet wat ghi sult doen Want ghi en doet gheen oerdeel des menschen mer des heren: ende wat ghi rechtet sal weder in v comen.

7

Die anxte des heren sij mit v: ende mit naersticheit doet alle dinc. Want bi den heer onsen god en is gheen boosheit noch wtneminghe der personen: noch begheerte der ghauen.

8

Ende iosaphat heeft gheset in iherusalem leuiten ende priesteren ende princen der familien wt israhel dat si rechten souden dat oerdel ende saec des heren sijnen inwoenres:

9

ende heeft hem gheboden segghende Also suldi doen in den anxt sheren trouweliken ende mit volmaecter herten.

10

Alle saec die tot v comen sal uwer broederen die wonen in hoeren steden. tusschen gheslacht ende gheslacht waer questie is vander wet. vanden ghebot. van cerimonien. van rechtuaerdichmakinge: toent hem dat sij niet en sondighen in den heer: ende dat die toirn niet en coem op v ende op uwe broeders. Also doen-

[p. *62]

de en suldi niet sondighen.

11

Mer amarias priester ende v biscop sal president sijn in dien dinghen die tot god behoeren Mer zabadias ismahels soon die hertooch is inden huys iuda: sal sijn bouen die werken die behoren tot des conincs dienst. Ende ghi hebt meesters leuiten bij v. wart ghestarket ende doet naerstelic: ende die heer sal sijn mit v in goeden