Bible in duytsche (Delftse bijbel 1477)

§ Capittel .xviij.

1

IOsaphat was rijc ende seer gloriose: ende is toe gheuoecht achab van swagherscap:

2

ende nederdaelde na iaren tot hem in samariam. Tot welcs toecomste achab gheslaghen heef veel scapen ende ossen. hem ende den volc dat mit hem ghecomen was: ende heeft hem gheraden dat hij opclimmen soude in ramoth galaad.

3

Ende achab die coninc israhel heeft gheseit tot iosaphat den coninc iuda Comt mit mi in ramoth galaad Ende hij autworde hem. Als ic bin ende du: ende als dijn volc so is mijn volc: ende wi sullen mit dij sijn in den strijde

4

Ende iosaphat seide tot den coninc israhel Ic bid vraecht raet op dese tijt die reden des heren.

5

Hier om vergaderde die coninc israhel der propheten vier hondert mannen: ende seide tot hem. Sullen wij ghaen strijden in ramoth galaad of rusten? Ende si seiden clim op: ende god salse gheuen in die hant des conincs

6

Ende iosaphat seide Is hier gheen propheet des heren: dat wij van dien oec moghen vraghen?

7

Ende die coninc van israhel seide tot iosaphat Hier is een man van welcken wi mogen vragen den wil des heren: mer ic haet hem want hij en propheteert mi niet goet: mer altijt quaet. Ende het is micheas een soon iemla. Ende iosaphat seide. O coninc en wilt niet spreken in deser manieren.

8

Hier om heeft die coninc israhel gheropen een van sijnen camerlinghen: ende seide hem. Roop haestelic micheam een soon iemla.

9

Ende die coninc israhel ende iosaphat die coninc iuda saten beide in horen stoelen: ghecleet mit conincliker vercieringhe Ende si saten in een plaetse bi der poort van samarien: ende alle die propheten propheteerden voer hem.

10

Mer sedechias een soon chanana heeft ghemaect yseren hoernen: ende seide Dit seit die heer Mit desen suldi scudden syriam: hent dattuse te wrijfste.

11

Ende alle die propheten propheteerden des

[p. *60]

ghelijcs: ende seiden. Climt op in ramoth galaad ende du salste gheluc hebben: ende die heer salse gheuen in die hant des conincs.

12

Mer die bode die ghegaen was te ropen micheam seide hem Siet die woerden alder propheten bootscappen den coninc mit enen mondt goede dinghen. Hier om bid ic dij dat dijn reden niet onghelijc en si met hem: ende spreect voerspoedighe dinghen.

13

Ende micheas heeft hem gheantwoert. Die heer leeft: want so wat mijn god sal segghen mij dat sal ic spreken.

14

Ende hi is ghecomen totten coninc. Ende die coninc sprac tot hem. Michea sullen wi gaen in ramoth galaad om te striden of rusten? Ende hij heeft gheantwoerd Climt op: ende alle dinc sal v gheluckich vallen: ende die vianden sullen ghegeuen worden in uwen handen.

15

Ende die coninc seide Ic besweer dij eenwarf anderwarf. dat ghi mij niet en segt dan dat waer is inden naem des heren.

16

Ende hij seide. Ic heb ghesien al israhel verstroit inden berghen als scapen sonder herde. Ende die heer heeft gheseit. Dese en hebben gheen heren: een yghelijc keer weder in sijn huys in vreden.

17

Ende die coninc israhel seide tot iosaphat. En heb ic dij niet gheseit dat dese mi niet goets en propheteert mer dinghen die quaet sijn?

18

Ende hi seide: daer om hoert twoert sheren Ic heb ghesien den heer sittende in sijnen stoel: ende al die scaer des hemels bij hem staende ter rechter hant ende ter luchter hant

19

Ende die heer heeft gheseit. Wie sal bedrieghen achab den coninr israhel dat hij opclim ende valle in ramoth galaad? Ende doe die een seide in deser manieren ende die ander in een ander:

20

is voert ghegaen een gheest ende stont voer den heer ende seide. Ic sal hem bedrieghen. Ende die heer tot hem. In welken salstu hem bedrieghen?

21

Ende hi antwoerde. Ic sal wtgaen: ende sal wesen een loghenachtich gheest inden monde al sijnre propheten. Ende die heer heeft gheseit. Du salste bedrieghen ende moghen ouer hem: ganc wt ende doe alsoe.

22

Hier om siet nv heeft die heer ghegheuen een gheest des loghens in den mont al dijre propheten: ende die heer heeft van dij ghesproken quade dinghen.

23

Mer sedechias een soon chanana is toe ghegaen ende heeft gheslaghen die wanghe michee. ende seide Doer wat wech is des heren gheest ouerghegaen van mi om dij te spreken?

24

Ende micheas seide. Du selue salste sien in dien daghe: wanneer du ingaen sulste van camer te camer. dat verholen moechste wesen.

25

Mer die coninc israhel heeft gheboden segghende. Neemt micheam ende leit hem tot amon den prince des stedes ende tot ioas den soon amalech:

26

ende sult segghen Dit seit die coninc. Sent desen in den kerker: ende gheeft hem wenich broods. ende een luttel waters: hent ic weder coem in vreden.

27

Ende micheas heeft gheseit Ist sake dattu weder coemste in vreden: soe en heeft die heer niet ghesproken in mij. Ende hij seide. Hoert alle volken

28

Hier om sijn opgheclommen die coninc israhel ende iosaphat die coninc

[p. *61]

iuda in ramoth galaad: ende die coninc israhel seide tot iosaphat.

29

Ic sal verwandelen mijn habijt. ende so sal ic gaen ten strijde: mer du doe an dijn clederen Ende die coninc israhel is ghecomen mit verwandelden habijt totten stride

30

Mer die coninc van syrien had gheboden den leidsmannen sijns heers segghende. En wilt niet strijden teghen den minsten. of teghen den meesten: dan alleen teghen den coninc israhel.

31

Daer om doe die princen des heers hadden ghesien iosaphat: seiden sij. Dit is die coninc van israhel. Ende omghinghen hem strijdende. Ende hij heeft gheropen totten heer. ende hij heeft hem gheholpen: ende heefse af ghekeert van hem.

32

Want doe die princen des heers hadden ghesien dat niet en was die coninc israhel: hebben sij hem ghelaten.

33

Mer het is gheuallen dat een vanden volc een pijl werp int onseker: ende sloech den coninc van israhel. tusschen den nac ende die scouderen. Ende hi seide sijnen waghen man. Omkeer dijn hant. ende leide mij wten strijde: want ic ghewondt bin.

34

Ende die strijt is gheeindt in dien daghe. Mer die coninc israhel stont in sijnen waghen teghen die van syrien hent totten auont: ende is ghestoruen doe die sonne onderghinc