Bible in duytsche (Delftse bijbel 1477)

§ Capttel .xvij.

1

ENde sijn soon iosaphat regneerde voer hem: ende hij vermocht teghen israhel

2

Ende hij sette ghteal der ridderen in allen steden iuda die ghemuert waren: ende hij scicte sterke bescermenisse in den lant iuda ende in den steden ephraim. die sijn vader asa ghewonnen had.

3

Ende die heer was mit iosaphat: want hij wanderde in den eersten weghen dauid sijns vaders: ende en heeft niet ghehoopt in baalim

4

mer in god sijns vaders: ende wanderde in sijnen gheboden ende niet na den sonden israhel.

5

Ende die heer heeft gheuest trijc in sijnre hant: ende al iuda ghaf iosaphat ghauen: ende hem sijn gheworden ontellike rijcdom ende veel glori.

6

Ende doe sijn hert nam coenheit. om die weghen sheren: heeft hi oec af ghenomen die hoochten ende die bosschen van iuda.

7

Mer int derde iaer sijns rijcs heeft hij ghesendt van sijnen princen benail ende obdiam ende zachariam. ende nathanael ende micheam dat sij leren souden in den steden iuda:

8

ende mit hem leuiten semeiam ende nathaniam ende zabadiam. ende asahel ende semiramoth ende ionathan. ende adoniam ende thobiam ende tobadoniam leuiten: ende mit hem elisama ende ioram priesteren.

9

Ende sij leerden tvolc in iuda. hebbende tboeck der wet sheren: ende omghinghen alle die steden iuda: ende leerden tvolc

10

Hier om is gheworden die anxt des heren op alle rijken der aerden. die waren in den omganc iuda: ende sij en dorsten niet striden teghen iosaphat.

11

Mer oec die philis-

[p. *59]

teen. brochten iosaphat ghauen. ende waghentol des siluers. Ende die van arabien brochten beesten seuen dusent scapen ende seuen hondert. ende also veel gheiten.

12

Ende hier om is iosaphat ghewassen ende is groot ghemaect int hoghe: ende heeft ghetimmert in iuda husen als toernen ende ghemuerde steden:

13

ende heeft volbracht veel werken in den steden iuda. Ende sterke mannen ende strijdende waren in iherusalem:

14

welker dit ghetal is doer die husen ende familien eens yghelijcs. In iuda was prince des heers ednas een hertoech: ende mit hem stercker mannen drie hondert dusent.

15

Na desen iohannan een prince: ende mit hem twe hondert ende tachtich dusent.

16

Ende na dien amasias een soon zechri gheheilicht den heer. ende mit hem twe hondert dusent sterker mannen.

17

Desen volchden na starck totten strijden eliada: ende mit hem twe hondert dusent houdende boech ende scildt

18

Na desen oec iozabad ende mit hem hondert ende tachtich dusent cloeker ridderen.

19

Alle dese waren totter hant des conincs: wtghenomen den anderen die hij gheset had in den ghemuerden steden. ende in al iuda