Bible in duytsche (Delftse bijbel 1477)

§ Capittel .xvi.

1

MEr int ses ende dortichste iaer des rijcs asa. is opgheclommen baasa die coninc israhel in iudam: ende heeft omgheleit rama mit een mure dat nyemant sekerlic en mochte wtgaen ende ingaen van den rijc asa

2

Mer asa bracht voert siluer ende gout vanden scatten: thuys sheren ende van des conincs scatten ende heeft ghesent tot benadab den coninc van syrien die woonde in damasco segghende.

3

Vrede is tusschen mi ende di Ende mijn vader ende dijn vader hadden vrede: hier om heb ic dij ghesent siluer ende gout: dat ghi als ghebroken is die vrede dien ghi hebt met baasa den coninc israhel hem doet wech gaen van mij.

4

Doe dat ondervant benadab sende hij princen sijnre heeren tot die stede israhel: die sloeghen ahion ende dan ende abelmaim ende al die ghemuerde steden.

5

Doe dat ghehoert had baasa liet hi of te timmeren rama: ende scoerde sijn werc.

6

Mer asa die coninc nam tot hem al iudam ende droeghen die stene van rama ende die houten die baasa bereit had der timmeringhe: ende heeft ghetimmert van dien gabaa ende maspha.

7

In diere tijt is ghecomen anani

[p. *58]

die propheet tot asam den coninc iuda ende heeft gheseit tot hem. Wanttu betrouwen ghehadt hebste in den coninc van syrien ende niet in den heer dijnen god: daer om is ontgaen dat heer des conincs van syrien van dijnre hant

8

En waren die morianen ende libies niet veel meer in waghenen ende rijderen ende in groter veelheit: welc doe du gheloeueste in den heer hi heeft ghegheuen in dijn hant?

9

Want die oghen sheren bescouwen al aertrijc: ende gheuen starcheit den ghenen die mit volmaecter herten in hem ghelouen Hier om hebstu sottelic ghedaen: ende daer om sullen nu oec in deser tijt strijden opstaen teghen dij.

10

Ende asa toornich teghen den prophete: heeft gheboden datmen hem setten soude in den stock Mer die heer was seer gram daer om: ende heeft ghedoot seer veel vanden volc in diere tijt.

11

Mer die eerste werken asa ende die lesten sijn ghescreuen in den boock der coninghen iuda ende israhel.

12

Ende asa wort siec int neghen ende dertichste iaer sijns rijcs mit seer groote seerte der voeten: ende heeft niet ghesocht den heer in sijnre crancheit: mer meer betrouwet in die conste der medecijn meisteren

13

Ende heeft gherust mit sijnen vaderen ende is ghestoruen int een ende veertichste iaer sijns rijcs:

14

ende sij hebben hem begrauen in sijn graf dat hij hem ghegrauen hadde in der stat dauid Ende hebben hem gheleit op sijn bedde vol van welrukende cruden ende saluen die ghemaect waren met conste der aptekers: ende barndense op hem met groter begheerten