Bible in duytsche (Delftse bijbel 1477)

§ Capittel .xv.

1

MEr azarias obeds soon doe die gheest gods in hem ghecomen was.

2

is wtghegaen teghen asa: ende heeft hem gheseit. Hoert mij asa. ende al iuda ende beniamin. Die heer is mit v: want ghi hebt gheweest mit hem. Ist sake dat ghi hem sult soeken: ghi sulten vinden Mer ist sake dat ghi hem laet: hi sal v laten.

3

Mer veel daghen sullen ouer gaen in israhel sonder waerachtich god. ende sonder priester: ende sonder doctoer ende sonder wet.

4

Ende als sij weder om sullen keren in horen drucke totten heer god israhel ende hem soeken: sullen sij hem vynden.

5

In die tijt en sal gheen vrede sijn den wtgaende ende ingaende: mer veruaernisse in allen woninghen der aerden

6

Want dat een wolc sal striden teghent ander ende stede teghen stede: want die heer salse verstoeren in alre nauwicheit.

7

Hier om ward gij ghesterct. ende v hande en moeten niet slap warden: want loon sal sijn uwen werc.

8

Doe dit ghehoert had asa als die woerden ende prophecie azarie obeds soon des

[p. *57]

propheten is hij ghestarct: ende heeft af ghenomen die afgoden van alle den lande iuda ende van beniamin. ende vanden steden des berchs ephraim die hij ghenomen had. ende heeft gheheilicht dat outaer sheren dat was voer tpoertael sheren:

9

ende heeft vergadert al iudam ende beniamin: ende die vreemde mit hem van ephraim ende manasse ende van semeon Want veel waren tot hem gheuloghen wt israhel: siende dat die heer sijn god mit hem was.

10

Ende doe sij quamen in iherusalem in die derde maent. int vijftiende iaer des rijcs asa:

11

offerden sij den heer in dien daghe vanden roof die sij ghebrocht hadden seuen hondert ossen. ende seuen dusent scapen:

12

ende hi is inghegaen van ghewoenten om te starcken dat vorward: dat sij soeken souden den heer god hoere vaderen mit al hoere herten ende met al hoere sielen.

13

Ende seide is dat yemant niet en soect den heer god israhel: die moet steruen vanden minsten totten meesten van man tot wijf

14

Ende hebben ghezworen den heer mit groter stemmen in vrolicheit. ende in clanc des trompets. ende in gheluyt der basunen:

15

alle die waren in iuda mit vermalediinghe. Want in al hoere herten hebben sij ghesworen: ende mit al hoeren wille hebben si hem ghesocht: ende hebben hem gheuonden. Ende die heer heeft hem ghegheuen rust in horen omganc

16

Mer oec maacham die moeder des conincs asa heeft hij of gheset van den rijc: daer om dat sij ghemaect had in een bosch een beelt priapi welc hi altemael vernielde: ende clein maecte in sticken ende verbrande in die beecke cedron.

17

Mer die hoocheiden sijn ghelaten in israhel. Nochtant was dat herte asa volcomen in allen sijnen daghen.

18

Ende die dinghen die sijn vader gheloeft had die heeft hij in ghedraghen int thuys sheren: siluer ende gout ende menigherley maniere der vaten.

19

Ende gheen strijt en was tot dat dertichste iair des rijcs asa