Bible in duytsche (Delftse bijbel 1477)

§ Ca .xiiij

1

ENde abia heeft gherust mit sijnen vaderen: ende si hebben hem begrauen in der stat dauid. Ende asa sijn soon regneerde voer hem in welcs daghen tlant ruste tien iaren.

2

Ende asa heeft ghedaen dat goet ende behaechlic was in den aenscijn sijns gods.

3

ende omkeerde die outaeren des vreemden dienstes. ende die hoocheiden. ende brac die beelden ende wtsneet die bosschen:

4

ende heeft gheboden iude dat hi soeken soude den heer god sijnre vaderen: ende doen die wet. ende al die gheboden.

5

Ende hij heeft afghenomen van allen steden iuda outaren ende tempelen: ende

[p. *56]

heeft regneert in vreden.

6

Ende hij timmerde stercke steden in iuda: want hi rustich was ende gheen strijden opstonden in sijnen tiden: want die heer vrede ghaf.

7

Ende hij seide iude. Laet ons timmeren dese steden. ende omlegghen mit muren. ende stercken mit toornen ende poorten ende slooten. die wijle dat alle dinghen rustich sijn van strijden: want wij ghesocht hebben den heer god onser vaderen: ende heeft ons ghegheuen vrede in onsen omganc Hier om hebben sij ghetimmert: ende gheen hinder en was int timmeren.

8

Ende asa had in sijnen heer van iuda drie hondert dusent die scilden droeghen ende speren: ende van beniamin twehondert ende tachtich dusent sciltdraghers ende scutten. Ende alle dese waren starcke mannen.

9

Ende zara een moriaen is wt ghegaen teghen hem mit sijnen heer tienwerf hondert dusent ende drie hondert waghen: ende is ghecomen tot maresa

10

Mer asa is ghereist teghen hem te ghemoet. ende bereide sijn scare ten stride in den dal sephata. welc is bij maresa:

11

ende heeft aengheropen god den heer ende seide. Heer bij di en is gheen ondersceit of du in luttel volcs helpste of in veelen: helpt ons heer onse god. Want in dij ende in dijnen naem wij betrouwenisse hebbende: comen teghen dese veelheit des volcs Heer du biste ons god: laet den mensche gheen macht hebben teghen dij.

12

Hier om heeft die heer veruaert die morianen voer asa ende iuda Ende die moreaens sijn gheuloghen:

13

ende asa heefse veruolcht ende tvolc dat mit hem was tot gerara. Ende die morianen sijn gheuallen totten dode: want doe die heer sloech ende sijn heer street sijn si te wreuen. Ende sij hebben ghenomen veel rouen:

14

ende sloeghen alle die steden inden omganc gerare Want grote anxt had beuaen alle menshen. Ende sij hebben ghenomen die steden ende afghedraghen grooten roof:

15

mer sij hebben oec verderuet die scaepstallen. ende hebben ghenomen ontellic ghetal der beesten ende camelen: ende sijn weder ghekeert in iherusalem