Bible in duytsche (Delftse bijbel 1477)

§ Ca .xiij

1

INt achtiende iaer des conincs iheroboam regneerde abia op iudam.

2

Drie iaren regneerde hij in iherusalem. Ende sijns moeders naem was michaia: een dochter vrihel van gabaa: ende strijt was tusschen abia ende iheroboam.

3

Ende doe die coninc abia te strijde ghinc. ende hadde starcke mannen wtuercoren veertich dusent: iheroboam heeft daer theghen vergadert tachtich dusent mannen: die oec wtghecoren waren ende seer sterc tot striden

4

Ende abia stont op den berch semeron. die was in ephraim: ende sprac. Hoert iheroboam ende al israhel

5

En weti niet dat die heer god israhel heeft ghegeuen dauid trijck op israhel in der ewicheit: hem ende sijnen sonen in een vorwaert des soutes.

6

Ende iheroboam nabaths soon een knecht salomons dauids soon is op ghestaen ende heeft rebelleert teghen sijnen heer.

7

Ende tot hem sijn vergadert ydele mannen ende soonen belial: ende vochten teghen roboam salomons soon. Mer roboam was grof ende van bloder herten: ende en mocht hem niet wederstaen.

8

Hier om segdi nv dat ghi moecht teghen staen den rijc sheren dat hi besit doer die sonen dauid? Ende ghi hebt grote veelheit des volcs: ende gouden calueren die v iheroboam

[p. *55]

ghemaect heeft tot goden.

9

Ende hebt wtgheworpen die priesteren sheren aarons soonen ende leuiten: ende hebt v ghemacert priesteren als alle die volcken der landen. Ende wie quame ende heilichde sijn hant in een stier. in ossen. ende in seeuen rammen: die wort priester der gheenre die gheen goden en sijn

10

Mer ons heer is god: ende hem en laten wij uiet Ende die priesteren dienen den heer van den soonen aaron. ende die leuiten sijn in hore ordinancie:

11

ende offeren verbrande offerhande den heer doer allen daghen: des morghens ende sauonts. ende thimiaen ghemaect na die gheboden des wets: ende broden warden voert gheset in een reyn tafel. Ende by ons is een gouden candelaer. ende sijn licht: dat sij altoes warde op ghesteken totten auont. Want wij bewaren die gheboden sheren ons gods: die ghi ghelaten hebt.

12

Daer om in onsen heer is god een leidsman: ende sijn priesteren die singhen met basunen ende luden teghen v. Ghi soonen israhel wilt niet vechten teghen den heer god uwer vaderen: want ten is v niet nut.

13

Doe hi dit sprac: maecte iheroboam laghen achter. Ende doe hij stont teghens die vianden: om ghinc hi iudam niet wetende mit sijnen heer.

14

Ende iudas omsiende sach den strijt aenstaende van voer ende achter rugghe: ende riep totten heer ende die priesteren begonnen se singhen mit basunen:

15

ende alle die mannen iuda riepen. Ende siet doe sij riepen: veruaerde god iheroboam ende alle israhel die stonden teghen abia ende iuda:

16

ende die sonen israhel vloen iudam: ende god heeftse ghegheuen in hore hant.

17

Hier om heeft abia ende sijn volc die gheslaghen mit een grote plaghe: ende van israhel sijn gheuallen ghewondt vijftich dusent starker mannen

18

Ende die sonen israhel sijn vernedert in diere tijt. ende die sonen iuda zeer gestarket: want si hoepten inden heer god hore vaderen

19

Ende abia veruolchde iheroboam vliende. ende nam sijn steden. betel ende haer dochteren. ende ihesana mit sijnen dochteren. ende effron ende sijn dochteren.

20

Ende iheroboam en mochte voert an niet teghen staen. in den daghen abia. Ende die heer sloech iheroboam ende hi is ghestoruen

21

Hier om abia doe sijn rijc ghesterct was. heeft genomen veertien huys vrouwen: ende heeft ghewonnen twe ende twintich sonen. ende sestien dochteren

22

Ende die andere der redenen abia ende sijnre weghen ende werken: sijn ghescreuen seer naerstelic in den boeck addo des propheten.