Bible in duytsche (Delftse bijbel 1477)

§ Ca .xij.

1

ENde doe ghestarct was roboams rijc ende gheuast: liet hi achter die wet sheren ende al israhel mit hem.

2

Ende in den vijfsten iaer des rijcs roboam. clam op sesac coninc van egipten in iherusalem. want sij ghesondight hadden den heer:

3

mit dusent twehondert waghenen ende tsestich dusent rijders. Ende des ghemeentes volc en was gheen ghetal dat mit hem ghecomen was wt egipten: als libies ende trogodite ende moriaens:

4

ende nam die starcste steden in iuda. ende is ghecomen in iherusalem.

5

Mer semeias die prophete is inghegaen tot roboam ende die princen iuda: die vergadert waren in iherusalem vliende sesac: ende heeft gheseit tot hem Dit seit die heer. Ghi hebt mij ghelaten: ende ic heb v ghelaten in die hant sesac

6

Ende die princen israhel ende die coninc verslaghen seiden. Die heer is rechtuaerdich.

7

Ende doe die heer ghesien had dat sij veroetmoedicht waren: is die reden sheren ghesciet tot semiam segghende

[p. *54]

Want sij veroetmoedicht sijn en sal icse niet verderuen: ende sal hem gheuen een wenich hulps: ende mijn gramscap en sal niet drupen op iherusalem doer die hant sesac

8

Nochtant sullen sij hem dienen: dat sij kennen moghen ondersceit mijns diensts ende des aertschen conincs dienstes.

9

Hier om is sesac die coninc egipti wech ghegaen van iherusalem doe hij die scatten ghenomen had des heren huys ende des conincs huys: ende droech die alle mit hem. ende die gouden scilden die salomon gemaect had.

10

ende voer die: maecte die coninc coperen: ende ghafse den princen der sciltdragheren die bewaerden dat portael des pallaes

11

Ende als die coninc soude ingaen int huys gods. quamen die scildraghers ende namen die scilden ende droeghen die weder tot sijn wapen huys.

12

Mer want sij veroetmaedicht sijn is van hem ghekeert die troon des heren: ende en sijn niet alte mael verderuet. Mer oec in iuda sijn gheuonden goede werken.

13

Ende die coninc roboam is ghesterct in iherusalem: ende heeft regneert. Een ende veertich iaren was hi out doe hi beghan te regneren: ende seeuentien iaren regeneerde hi in iherusalem een stede die die heer vercoren heeft: dat hi sijnen naem daer vesten soude. van allen gheslachten israhel. Mer die naem sijns moeders was naama ammanites.

14

Ende hi heeft quaet ghedaen: ende en heeft sijn hert niet bereit om te soeken den heer.

15

Mer die wercken roboams die eerste ende die leste sijn ghescreuen in den boken semeie des prophetes ende addo des propheten: ende naerstelic beduut. Ende roboam ende iheroboam hebben ghestreden teghen malcanderen in al horen daghen.

16

Ende roboam heeft gherust mit sijnen vaderen: ende is begrauen in der stat dauid: ende sijn soon abia regneerde voer hem.