Bible in duytsche (Delftse bijbel 1477)

§ Capittel .xi.

1

MEr roboam is ghecomen in iherusalem: ende heeft samen gheropen al thuys iuda ende beniamin. hondert ende tachtich dusent wtghecoren mannen ende stridende: dat hij striden soude teghen israhel. ende keren tot hem sijn rijc

2

Ende die reden sheren is ghedaen tot semeiam enen man gods segghende.

3

Spreect tot roboam salomons soon den coninc iuda: ende tot al israhel. welc is in iuda ende beniamin. Dit seit die heer

4

Ghi en sult niet opclimmen noch strijden teghen uwe broeders: een yghelic gae weder in sijn huys: want dit is ghesciet mit minen wille. Ende doe sij hoerden die reden sheren sijn si weder ghekeert: ende hebben niet ghereist teghen iheroboam.

5

Mer roboam woende in iherusalem: ende timmerde sterke steden in iuda

6

ende hij timmerde bethleem ende etham ende thecue.

7

ende bethsur ende socco ende odollam.

8

ende geth ende maresa ende ziph:

9

mer aduram ende lachis ende asecha:

10

ende sara

[p. *53]

ende ahialon ende hebron dat was in iuda ende beniamin: alre starcste steden.

11

Ende doe hij die besloten had mit muren. heeft hij in hem gheset princen ende scuren der spisen: dat is oli ende wijns.

12

Mer oec in allen steden heeft hij ghemaect wapen husen der scilden ende speren: ende hij maecte die sterc mit seer groter naersticheit: ende heeft regneert op iudam ende beniamin.

13

Mer die priesters ende leuiten die waren in al israhel. sijn ghecomen tot hem van allen horen stoelen:

14

latende hoer dorpen ende besittinghen. ende ouergaende tot iudam ende iherusalem: daer om want iheroboam hadse af gheworpen ende sijn nacomelinghen. dat sij niet en souden bruken die priesterscaps des heren:

15

ende hi heeft hem gheset priesteren der hoghen ende der duuelen ende der caluen die hij ghemaect had.

16

Mer oec van allen gheslachten israhel soe wie hoer hart ghauen dat sij sochten den heer god israhel. sijn ghecomen in iherusalem te offeren hoer offerhanden voer den heer god hore vaderen:

17

ende hebben ghestarket dat rijc iuda: ende gheuast roboam salomons soon drie iaren lanc. Want sij wanderden in den weghen dauid ende salomons alleen drie iaren

18

Ende roboam troude een wijf maalath een dochter iherimuth des soons dauid: ende abiail heliabs dochter die soon was ysai:

19

welc hem voert ghebrocht heeft soonen ieus ende sommoriam ende zoom

20

Nae desen nam hi maachaz absolons dochter: die hem voert brocht abia ende abi ende ziza ende salomith

21

Mer roboam minde maacham absolons dochter: bouen alle sijnen wijuen ende boelen Want hi had ghetrouwet achtien wijuen: ende hadde tsestich boelen: ende wan acht ende twintich sonen. ende tsestich dochteren.

22

Mer hi heeft gheset int beghin abiam den soon maacha enen hertoch bouen alle sijn broeders: want hij dochte hem te maken coninc

23

want hij wijser ende machtigher was bouen alle sijnen sonen: ende in alle den landen iuda ende beniamin ende in allen ghemuerden steden. Ende heeft hem ghegheuen veel spijsen: ende begheerde veel wijuen