Bible in duytsche (Delftse bijbel 1477)

§ Ca .x.

1

ENde roboam is ghereist in sichem. Want daer al ysrahel vergadert was: dat sij hem coninc maken souden.

2

Doe dat hoerde iheroboam nabaths soon die was in egipten: daer hij gheuloen was voer salomon: is hij ter stont weder ghekeert.

3

Ende sij riepen hem ende quam mit al israhel: ende sij hebben tot roboam ghesproken segghende

4

Dijn vader heeft ons ghedruct mit een seer hart iuck: mer du ghebiede lichter dinghen dan dijn vader die ons in gheset heeft enen swaren dienst: ende verlicht een wenich van den last. dat wij di dienen moghen

5

Ende hij seide. Na drie daghen coemt weder tot mij. Ende doe tvolc ghegaen was:

6

ghinc hi te rade mitten ouden die te staen pleghen bi sijnen vader salomon doe hij noch leefde segghende. Wat raet gheefdi dat ic antworden mach den volc?

7

Ende die seiden hem Ist sake dattu behaechste desen volc ende maectse saft mit goedertieren woerden sullen sij dienen dij in alre tijt.

8

Ende hij heeft ghelaten den raet der ouden: ende heeft begonnen te tracteren mit den ionghen die mit hem gheuoidt waren: ende waren in sijn gheselscap.

9

Ende hij seide tot hem. Wat dunct v. of wat sal ic antworden desen volc dat mij ghe-

[p. *52]

seit heeft: verlicht den last die dijn vader op ons gheset heeft?

10

Ende sij hebben gheantword als ionghen ende gheuoedt mit hem in weelden ende seiden. Aldus suldi spreken den volc dat dij gheseit heeft. dijn vader heeft ons iuck beswaert verlichtet du: ende salste antworden hem. Mijn minste vingher: is grouer dan die lenden mijns vaders.

11

Mijn vader heeft v in gheset een swaer iuck ende ic sal der meerre last toedoen. Mijn vader heeft v gheslaghen mit gheiselen: mer ic sal v slaen mit scorpioen.

12

Hier om is iheroboam ende al tvolc ghecomen tot roboam in den derden daghe als hi hem gheboden had

13

Ende die coninc heeft gheantwoert herde dinghen achter ghelaten den raet der ouden:

14

ende heeft ghesproken na den wille der ionghen. Mijn vader heeft op v gheset een swaer iuck: dat ic swaerre maken sal Mijn vader heeft v gheslaghen: mit gheiselen: mer ic sal v slaen mit scorpioen

15

Ende hi en heeft niet consenteert den beden des volcs. Want het was des willen gods: op dat veruolt soude warden sijn reden. die hij ghesproken had doer die hant ahie sylonitis tot iheroboam nabaths soon.

16

Mer al tvolc doe die coninc herde woerde sprac: heeft aldus ghesproken tot hem. Ons en is gheen deel in dauid: noch erfenisse in den soon ysai Gaet weder in dijn tabernaculen israhel. Mer du voede dijn huys dauid. Ende israhel is ghegaen in sijn woninghen.

17

Mer op die kinderen israhel die woenden inden steden iuda: regneerde roboam.

18

Die coninc roboam sende aduram die was bouen die tributen: ende die soonen israhel hebben hem ghesteent: ende hi is ghestoruen Ende die coninc roboam haeste op te climmen op een waghen: ende vloe iu iherusalem.

19

Ende israhel is ghegaen vanden huys dauid hent tot desen daghe. Ende het is ghesciet doe al israhel hoerde dat iheroboam was weder ghecomen: si hebben ghesent ende hebben hem gheropen doe die scare vergadert was. ende hebben hem gheset enen coninc op al israhel: ende niemant en is gheuolcht dat huys dauid. dan alleen dat gheslachte iuda