Bible in duytsche (Delftse bijbel 1477)

§ Ca .ix

1

ENde die coninginne van saba doe sij ghehoert had dat gherucht salomons. is ghecomen in iherusalem dat sij hem tempteren soude in donckeren raetselen: mit groten rijcdommen ende camelen die droeghen welrukende cruden. ende veel gouds. ende costelike ghesteente. Ende doe sij ghecomen was tot salomon heeft sij ghesproken tot hem alle die dinghen die daer waren in ho-

[p. *50]

re herten.

2

Ende salomon heeft hoer beduyt al dat si voertsettede: ende niet en was dat hi haer niet claer en maecte

3

Ende doe sij sach die wijsheit salomons. ende thuys dat hi ghetimmert had.

4

ende die spijsen sijnre tafelen ende die woninghen sijnre knechten ende die ambochten sijnre dieneren ende hoer cleder. ende die scenckeren ende hoer cleder: ende die offerhande die hij offerde in den huse des heren: van verwonderinghe en was voert meer in haer gheen gheest.

5

Ende si seide totten coninc. Waer is die reden die ic ghehoert heb in mijnen lande van dijnen doechden ende wijsheit.

6

Ic en gheloefde niet diet mij vertelden eer ic selue ghecomen bin ende mijn oghen ghesien hebben ende ic gheproeft heb dat nauwe die helfde dijnre wijsheit mij vertelt was. Du hebste verwonnen die fame met dijnen doechden

7

Salich sijn dijn mannen. ende salich sijn dijn knechten: dese die bijstaen voer dij in alre tijt: ende horen dijn wijsheit

8

Die heer dijn god moet sijn ghebenedijt: die dij heeft ghewilt ordineren op sijnen throon coninc sheren dijns gods. Want god lief heeft israhel. ende wil hem behouden inder ewicheit: daer om heeft hij dij gheset op hem enen coninc: dattu doen sulste oerdel ende rechtuaerdicheit.

9

Ende si gaf den coninc hondert ende twintich pondt gouds. ende seer veel welrukende cruden: ende seer costelike ghesteente. Nie en waren sulke welrukende crude: als dese die die coninginne van saba gaf den coninc salomom.

10

Ende die knechten hiram mitten knechten salomons brochten gout van ophir: ende houten thijna. ende costelike ghesteente

11

Van welken houten die coninc maecte graden in den huse sheren. ende in den huse des conincs: ende herpen ende sanctorien den sangheren. Nie en sijn ghesien al sulken houten in den lande iuda.

12

Mer die coninc salomon gaf der coninginnen van saba al dat si begheerde. ende eyschede: ende veel meer dan si brocht tot hem. Ende si weder gekeert ghinc in hoer lant mit horen knechten

13

Ende tghewicht des gouds dat salomon alle iaren ghebrocht wort was ses hondert ses ende tsestich pondt gouds:

14

behaluen die summa die die boden menigher lei volken ende die coopluden hem pleghen te brenghen. ende alle coninghen arabie ende princen der landen: die tsamen droeghen gout ende siluer salomoni.

15

Ende die coninc salomon heeft ghemaect twehondert gouden speren. vander summe ses hondert gouden penninghen: die wt ghegheuen worden om die speren.

16

Ende drie hondert gouden scilden voer drie hondert gouden penninghen: mit welken die scilden ghedect worden. Ende die coninc heeft die gheleit in sijn wapen huys dat beplant was mit een bosch.

17

Ende die coninc maecte enen groten yuorien stoel: ende clede die mit puren goude

18

Ende ses graden met welcken wort op gheclommen totten stoel. ende een gouden voetscamel.ende twe armen aen beiden sijden. ende twe leeuwen staende bij die armen:

19

mer oec ander twaelf leeukens staende op ses graden van beiden siden Alsulken stoel en heeft

[p. *51]

niet gheweest in allen rijken.

20

Ende alle die vaten des werscaps sconincs waren gouden: ende die vaten shuys des bosches libani waren van puren goude. Want siluer in sijnen daghen wart voer niet gherekent

21

Ende die scepen des conincs ghinghen in tharsis mitten knechten hiram eens in drie iaren: ende brochten van daer gout ende siluer ende elpenbeen ende apinnen ende paeuwen

22

Hier om is salomon groot ghemaect bouen allen coninghen der aerden: van rijcdom ende glori.

23

Ende alle die coninghen der aerden begheerden te sien salomons aensicht dat sij horen souden die wijsheit die god ghegheuen had in sijnre herten.

24

Ende sij brochten hem gauen: siluere vaten ende gouden. ende clederen. ende wapenen. ende welrukende cruden paerden ende mulen doer elke iaren.

25

Ende salomon had in sijnen stallen veertich dusent paerden: ende twaelf dusent waghenen ende rijders. Ende setten die in die steden der waghenen: ende daer die coninc was in iherusalem.

26

Hi wrocht oec sijn macht ouer allen coninghen vander riuier eufrate tot tlant der philisteen: ende tot die eynden egipti

27

Ende hi heeft gegeuen alsoe grote oueruloedicheit des siluers in iherusalem als der stenen: ende also veel cederbomen als sotte vijchbomen die wassen in den velden

28

Ende hem worden toe ghebrocht paerden van egipten ende van allen lantscappen.

29

Mer die andere der werken salomons eerster ende lester sijn ghescreuen in den woerden nathan des propheten. ende in den boken ahie sylonitis: ende int visioen addo des propheten teghen iheroboam nabaths soon.

30

Ende salomon regneerde in iherusalem ouer al israhel: veertich iaren.

31

Ende heeft gheslapen mit sijnen vaderen: ende si hebben hem begrauen in der stat dauid: ende roboam sijn soon regneerde voer hem