Bible in duytsche (Delftse bijbel 1477)

§ Capittel .viij.

1

ENde doe veruolt waren twintich iaren daer na dat salomon ghetimmert heeft thuys sheren ende sijn huys:

2

timmerde hij die steden die hiram had gegeuen salomoni: ende dede daer wonen die kinderen israhel.

3

Ende hi ghinc in emath suba. ende heeft die ghehouden.

4

ende heeft ghetimmert palmiram in die woestenie: ende timmerde ander seer starke steden in emath.

5

Ende hi heeft ghetimmert bethoron opperste. ende betho-

[p. *49]

ron onderste. ghemuerde steden: hebbende poorten ende grindelen ende sloten.

6

Balaad oec ende alle starke steden die waren salomons: ende alle steden der waghenen ende steden der rijders. Al dat hi ghewilt heeft: heeft salomon die coninc ghemaect ende ghescict: ende ghetimmert in iherusalem. ende in libano. ende in allen landen sijnre machten

7

Ende al tvolc dat achter ghelaten was van hetheis ende amorreis ende fereseis. ende eueis ende iebuseis die niet en waren van den gheslachte israhel.

8

van horen sonen ende van horen menacomelinghen welc die kinderen israhel niet en hadden gedoot: heeft salomon onderdanich ghemaect dat sij hem thijns gauen hent tot deser tijt.

9

Mer van den kinderen israhel en heeft hi niet gheset te dienen in den werken des conincs. Want si waren mannen striders ende eerste hertogen: ende princen der waghenen ende sijnre rijders.

10

Mer alle die princen des heers sconincs salomons: waren twehondert ende vijftich die tvolc leerden.

11

Ende hi heeft ouer gheset die dochter pharaons vander stat dauid: int huys dat hi haer ghetimmert had. Want hij seide. Mijn wijf en sal niet wonen in den huys dauid des conincs israhel. daer om wantet gheheilicht is: om dat die arke des heren daer in ghegaen is.

12

Doe offerde salomon offerhande op dat outaer sheren dat hi ghetimmert had voert portael:

13

dat in allen daghen gheoffert soude werden daer op na tghebot moysi inden sabbaten. ende inden kalenden ende inden hoochtiden driewarf in den iaer: dat is inder hoochtijt van paeschen. ende in die hoochtijt der weken. ende in die hoochtijt der tabernaculen.

14

ende heeft gheset na die sickenisse dauid sijns vaders die ambochten der priesteren in horen diensten. ende die leuiten in hore ordinancien: dat sij louen ende dienen souden voerden priesteren na die ghewoente een yghelijcs daghes: ende doerwachters in horen sceidinghe doer poorte. ende poorte. Want so had gheboden dauid die man gods.

15

Ende die priesteren ende leuiten en hebben niet verbij ghegaen vanden gheboden des conincs van al die hi gheboden had.

16

Ende salomon had in den bewaringhen der scatten alle die costen bereit: van dien daghe doe hij fundeerde thuys sheren hent tot dien daghe dat hijt volmaecte

17

Doe ghinc salomon in asiongaber ende in hailath. totten soem des roden meers: welc is inden lant edom.

18

Ende hiram sende hem doer die handen sijnre knechten scepen ende wise scippers des meers: ende ghinghen mitten knechten salomons in ophir Ende hebben van daer ghebrocht vierhondert ende vijftich pont gouds: ende brochtent totten coninc salomon