Bible in duytsche (Delftse bijbel 1477)

§ Ca .vij

1[7:5]

HIer om die coninc salomon slooch offerhande. twe ende twintich dusent ossen: ende der scapen hondert ende twintich dusent. Ende hij heilichde thuys gods die coninc ende al tvolc

2[7:6]

Mer die priesteren stonden in horen diensten: ende leuiten in organen der sanghen sheren. die ghemaect had dauid die coninc om te louen den heer. want inder ewicheit sijn bermherticheit: singhende die soete sanghen dauid mit hoeren handen Mer die priesteren songhen mit basunen voer hem: ende al israhel stondt.

3[7:7]

Ende salomon heylichde dat middel des saels voer den tempel sheren. Want hij offerde olocausta ende vetticheden der vredeliker offerhanden: wanttet metalen outaer dat hi ghemaect hadde en mochte niet draghen die olocaust ende sacrificie ende offerhanden

4[7:8]

Hier om maecte salomon een hoechtijt in diere tijt seuen daghen ende al israhel mit hem. een seer grote vergaderinge: vanden inghanc emat hent tot die riuier egipti.

5[7:9]

Ende inden achsten dach heeft hij ghemect een vergaderinghe: want hi gheheilicht hadde een

[p. *48]

outaer seuen daghen. ende gheviert een hoochtijt seuen daghen.

6[7:10]

Hier om in den drie ende twintichsten daghe der seuender maent heeft hi ghelaten die volken tot horen tabernaculen: vrolic wesende ende verblijdende vanden goeden dat die heer ghedaen had dauid ende salomon ende israhel sijnen volc.

7[7:11]

Ende salomon heeft volmaect thuys sheren ende thuys des conincs. ende alle die dinghen die hij ghesticht had in sijnre harten dat hij maken soude in den huys sheren ende in sijnen huse: ende heeft voerspoet ghehadt.

8[7:12]

Ende die heer heeft hem gheopenbaert inder nacht: ende sprac. Ic heb ghehoert dijn ghebet: ende heb vercoren mij dese stede in een huys der offerhande.

9[7:13]

Ende ist dat ic sloot den hemel ende gheen reghen en vloeide ende ghebode den sprinchaen dat si die aerde verslijnde. ende sende pestilencie in mijn volc:

10[7:14]

mer mijn volc bekeert op welc aengheropen is mijnen name. mij bade. ende socht mijn aensicht. ende dede penitenci van sijnen quaden weghen: ic sal verhoren vanden hemel. ende ghenadich wesen horen sonden. ende sal ghesont maken hoer lant

11[7:15]

Ende mijn oghen sullen open sijn. ende mijn oren wtgherect: tot dat ghebet des gheens die in dese steede sal bidden

12[7:16]

Want ic heb wtuercoren ende gheheilicht dese stede dat mijn naem daer in sal sijn int ewich: ende mijn oghen ende mijn herte moeten daer bliuen in allen daghen.

13[7:17]

Ende du ist sake dattu wanderste voer mij als ghewandert heeft dauid dijn vader. ende doeste na alle den dinghen die ic dij gheboden heb. ende bewaerste mijn rechtuaerdicheden ende oerdelen:

14[7:18]

ic sal verwecken den throon dijns rijcs: als ic gheloeft heb dauid dijnen vader segghende. Nyet en sal afghenomen werden man van dijnen gheslachte: die prince sal sijn in israhel.

15[7:19]

Mer ist sake dat ghi wort af ghekeert. ende afterlaet mijn rechtuaerdicheden ende mijn gheboden die ic v voergheset hebbe: ende afgaende diende vreemde goden. ende beede die aen:

16[7:20]

ic sal v wtroden van mijnen lande dat ic v ghegheuen heb ende dit huys dat ic ghetimmert heb mijnen naem sal ic werpen van minen aensichte: ende sal dat gheuen in een parabel ende in een exempel allen volken.

17[7:21]

ende dit huys sal wesen in een bispeel allen die daer voer bi gaen: ende sullen segghen verwonderende. Waer om heeft die heer also ghedaen desen lande ende desen huse?

18[7:22]

Ende sij sullen antworden. Want sij hebben ghelaten den heer god hoere vaderen. diese wtgheleit heeft van den lande egipti ende hebben anghenomen vreemde goden. ende die aenghebedet. ende gheeert daer om so sijn al dese quaden op hem ghecomen