Bible in duytsche (Delftse bijbel 1477)

§ Capittel .vi

1

DOe seide salomou. Die heer heeft gheloeft. dat hi wonen soude in een duysternisse:

2

ende ic heb ghetimmert een huys sijnen naem: dat hij wonen soude daer in der ewicheit.

3

Ende die coninc keerde sijn aensicht: ende benedide alle die vergadering israhel. Want al die scare stont an merkende.

4

Ende seide Ghebenedijt si die heer god israhel: die mitten werc veruolt heeft dat hi ghesproken heeft dauid minen vader segghende.

5

Van dien daghe in welken ic wtleide mijn volc vanden lande egipti. en heb ic niet vercoren een stat van alle den gheslachten israhel dat daer in ghetimmert soude warden mij-

[p. *45]

nen naem een huys: Noch ic en hebbe ghenen anderen man ghecoren dan hi wesen soude een hertoech in mijn volc israhel:

6

mer ic heb vercoren iherusalem dat mijn naem sal sijn daer in: ende ic heb vercoren dauid: dat ic hem soude setten op mijn volc israhel.

7

Ende doet was dauid mijns vaders wille dat hij timmeren woude een huys den naem sheren gods israhel:

8

seide die heer tot hem Want dit dijn wille heeft gheweest dattu timmeren woudste een huys mijnen naem: du hebste wel ghedaen al sulken wil hebbende:

9

mer du en salste mij niet timmeren een huys. Nochtan dijn soon die wtgaen sal van dijnen lenden: hij sal timmeren mijnen naem een huys.

10

Hier om heeft die heer veruolt sijn reden die hij ghesproken had: ende ic bin op ghestaen voer mijnen vader dauid. ende heb gheseten op den throon israhel als die heer ghesproken heeft: ende ic heb ghetimmert een huys den naem sheren gods israhel.

11

ende heb daer in gheset die arke in welker is die vorward sheren welc hij ghemaect heeft mitten soonen israhel.

12

Ende hi stont bijden outer sheren teghen al die scare israhel: ende heeft wt gherect sijn handen.

13

Want salomon had ghemaect een metalen fundament ende had dat gheset int middel der kerken: hebbende vijf cubitos in der lancte ende vijf inder wijtheit: ende drie cubitos inder hoochte. Ende hi stont daer op: ende voert mit gheboghen knyen teghen alle die scare israhel: ende mit op gheboerden handen in den hemel sprac hi.

14

Heer god israhel. niet en is god dijns ghelijc in hemel ende in aerde. die bewaerste dijn voerward ende barmherticheit mit dijnen knechten. die wanderen voer dij in al hoere herten:

15

die ghegheuen hebste dijnen knecht dauid mijnen vader alle die dinghen die du ghesproken hebste tot hem: ende welc du gheloeft hebste mitten monde hebstu volbracht mitten werke. als dese teghenwoerdighe tijt bewijst.

16

Hier om nv heer god israhel. veruol dijuen knecht mijnen vader dauid al dattu ghesproken hebste segghende Wt dij en sal niet ghebreken man bi mi die sitten sal op den throon israhel: al so nochtan ist sake dat dijn soonen bewaren mijn weghen. ende wanderen in mijnre wet: als du ghewandert hebste voer mij.

17

Ende nv heer god israhel dijn reden moet vast warden: die du ghesproken hebste dijnen knecht dauid.

18

Hier om ist oec gheloeflic dat god wonen soude mit den menschen op der aerden? Ist sake dat die hemelen dij niet en begripen: hoe veel min dit huys dat ic ghetimmert hebbe?

19

Mer het is ghemaect alleen daer toe. dattu salste aensien dat ghebet dijns knechtes ende die bedinghe sijns. heer mijn god: ende hoer die ghebeden welc dijn knecht heeft wt ghestort voer dij:

20

dattu op doeste dijn oghen op dit huys in den daghen ende nachten. op die stede in welc du beloeft hebste dat dijn naem sal werden aengheropen: ende du souste verhoren tghebet welc dijn knecht bidt daer in:

21

ende du moetste verhoeren die bedinghe dijns knechtes ende dijns volcs israhel

[p. *46]

Ende soe wie sal bidden in deser stede: verhoer van dijnre woninghe dat is vanden hemelen. ende wes ghenadich.

22

Of yemant sondichde teghen sijnen naesten ende quaem bereit te zweren teghen hem. ende verbondt hem seluen mit maledictien voer den outaer in desen huse:

23

du salste horen vanden hemel. ende doen recht dijnre knechten: also dattu gheues den bosen sijnen wech teghen sijn eyghen hoeft: ende wreect den rechtuaerdighen wedergheuende hem na sijnre rechtuaerdicheit.

24

Oft dijn volc israhel waer verwonnen van den vianden. want sij sullen sondighen di. ende bekeert deden penitencie. ende baden dijnen naem in dese stede:

25

du salste verhoren van den hemel ende wesen ghenadich der sonden dijns volcs israhel: ende leetse weder om int lant dat ghi hem ghegheuen hebt ende horen vaderen.

26

Of die hemel ghesloten waer ende gheen reghen en vloeyde om die sonden dijns volcs. ende si di baden in deser stede. ende belijden dijnen naem ende waren bekeert van horen sonden wannneer duse castijt hebste:

27

heer verhoer vanden hemel. ende verghif die sonden dijnen knechten ende dijns volcs israhel: ende leert hem enen goeden vech. doer welken sij moghen ingaen: ende ghif reghen der aerden welc du ghegheuen hebste dijnen volc te be besitten.

28

Ofter hongher op quaem inder aerden. ende plaghe. ende droeghe winde. ende sprinchane ende breemse. ende die vianden als sij die landen verdoruen hadden die poerten beleiden des stedes. ende alle plaghe ende siecte dijn volc dructe:

29

ist sake dat yemant van dijnen volc israhel bade. bekennende die plaghe ende sijn crancheit. ende wtrecte sijn hande in desen huse

30

du salste verhoren vanden hemel als van dijnre hogher woninghe. ende wees ghenadich: ende ghif enen yghelicken na sijnen weghen: welc du bekenste hem te hebben in sijnen herte. Want du alleen bekenste die harten der kinderen der menschen

31

op dat sij dij ontsien ende wanderen in dijnen weghen: alle die daghen die sij leuen op dat aensicht der aerden welc du ghegheuen hebste onsen vaderen.

32

Ende yemant van buten die niet en is van dijnen volc israhel. ist sake dat hij coemt van verren lande om dijnen groten naem ende om dijn stercke hant. ende dijnen wtgherecten arm. ende aenbede in dese stede:

33

du salste verhoren vanden hemel dijn alre vaste woninghe. ende salste doen alle die dinghen om welken dij die vreemde anropen sal: dat alle volken der aerden moeten bekennen dijnen naem ende di ontsien als dijn volc israhel: ende weten want dijnen naem is angheropen op dit huys dat ic ghetimmet hebbe.

34

Ist sake dat dijn volc waer wtghegaen te striden teghen sijn vianden. in den wech in welken duse sentste: ende aenbeden dij teghen den wech in welken dese stede is die du wtuercoren hebste. ende thuys dat ic ghetimmert heb dijnen naem:

35

dattu verhoers hoer ghebeden ende aenroepinghe. ende wreectse.

36

Mer ist sake dat sij dij sondighen. want daer en is gheen mensche die niet en sondicht. ende du hem toornich waerste. ende

[p. *47]

ouergaefste den vianden. ende gheuanghen leiden in verren lande. of in tlant dat bi is:

37

ende bekeert in hore herten in den lande tot welken sij gheuanghen gheleit sijn deden penitenci. ende dij baden in tlant hoere vangheuisse segghende. wi hebben ghesondicht. wi hebben booslic ghewrocht. wi hebben onrechtuaerdelic ghedaen.

38

ende weder om keerde in al hoere herten tot dij. ende mit al hore sielen int lant hoere vanghenisse. tot welken sij gheleit sijn: sullen aenbeden dij teghen den wech hoers landes dattu ghegheuen hebste horen vaderen. ende des stedes die du vercoren hebste. ende des huys dat ic ghetimmert heb dijnen naem:

39

dattu verhoren wilste van den hemel dat is van dijnre vaster woninghe hoer ghebeden: ende doet oerdel. ende vergheef dijnen volc al ist sondich.

40

Want du biste mijn god. Ic bid dat dijn oghen moeten werden op ghedaen: ende dijn oren moeten toe horen tot dat ghebet dat ghesciet in deser stede.

41

Hier om nu heer god staet op in dijn ruste: du ende die arke dijns stercheits Heer god dijn priesteren moeten werden aenghedaen salicheit: ende dijn heilighen moeten verbliden in den goeden

42

Heer mijn god wilt nyet afkeren dat aensicht dijns ghesalfde. Gedenc der barmhertitheiden dauid dijns knechtes.

43[7:1]

Ende doe salomon veruolt had stortende sijn ghebeden. vuer is neder ghedaelt van den hemel: ende heeft verslonden die olocausta ende offerdhanden. ende die moghenticheit des heren heeft veruolt thuys:

44[7:2]

ende die priesters en mochten niet in gaen in den tempel sheren daer om. want die moghentheit sheren had veruolt den tempel sheren.

45[7:3]

Mer oec alle die sonen israhel saghen dat nederdalende vuer. ende die glorie sheren opt huys: ende vallende metten hoofde vorwarts in die aerde op die vloer ghemaect mit stene. aenbeden ende loefden den heer want hij goet is: want inder ewicheit sijn barmherticheit.

46[7:4]

Ende die coninc ende al tvolc offerde offerhande voer den here