Bible in duytsche (Delftse bijbel 1477)

§ Ca .v

1

HIer om heeft salomon in ghedraghen inden tempel alle die dinghen die dauid sijn vader gheloeft had. siluer ende gout: ende alle die vaten heeft hi gheleit in den scatten des huys sheren.

2

Na desen vergaderde hij die meeste van gheboerten israhel ende alle die princen der gheslachten. ende hoefden der familien vanden sonen israhel in iherusalem: dat sie brenghen souden die arke des vreden sheren van der stat dauid. welc is in syon.

3

Hier om sijn ghecomen totten coninc alle die mannen israhel: in enen hoochtideliken dach der seuender maent.

4

Ende doe gheco-

[p. *44]

men waren alle die outste israhel. die leuiten hebben ghedraghen die arke:

5

ende hebbense in ghedraghen. ende alle die bereidinghe des tabernakels. Mer die vaten des sanctuarij welc waren inden tabernakel droeghen die priesteren mitten leuiten.

6

Mer die coninc salomon ende alle die vergaderinghe israhel. ende alle die daer vergadert waren: offerden voer die arke scapen ende ossen sonder enich ghetal.

7

Want soe groet was die veelheit der offerhanden. Ende die priesters indroghen die arke des vreden sheren in hoer stede: dat is tot den bede huys des tempels in sancta sanctorum onder die vloeghelen cherubin:

8

alsoe dat cherubin wt recte hoer vloeghelen op die stede daer die arche in gheset was: ende decten die arche mit horen grendelen.

9

Mer die hoofden der grendelen mit welken die arche ghedraghen wart. want sij een weinich langher waren. wt sceenen voert oraculum. Mer wast sake dat yemant was een wenich buten: die en mocht niet sien die grendelen. Ende die arke heeft gheweest daer tot in desen daghe.

10

Ende niet anders en was in der arken dan twe tafelen. die moyses gheset had in oreb: doe die heer heeft ghegheuen die wet den kinderen israhel wtgaende wt egipten

11

Mer doe die priesteren waren wt ghegaen wt die sanctuari. alle die priesteren die gheuonden mochten worden sijn gheheilicht: noch in diere tijt en waren noch niet ghesceiden die boerten ende ordinancie der diensten:

12

al soe wel die leuiten als sanghers. dat is ende die onder asaph waren. ende die onder heman. ende die onder idithun. hoer sonen ende broeders ghecleet met blenckenden lijnwaet songhen mit cimbalen. ende sanctorien. ende herpen. staende tot die oostsijde des outaers: ende mit hem hondert ende twintich priesteren singhende mit basunen.

13

Hier om doe si alle te samen songhen mit basunen ende mitter stemmen ende cimbalen ende organen. ende menigherlei reescap van musijck. ende opboerde die stemme int hoghe. wart verre ghehoert dat gheluyt: alsoe dat doe sij den heer begonnen te louen ende te segghen. beliet den heer want hij goet is want inder ewicheit is sijn barmherticheit. wart veruolt dat huys gods mit een wolcke

14

dat die priesters niet en mochten staen ende dienen om die duusternisse. Want die glorie des heren had veruolt thuys gods