Bible in duytsche (Delftse bijbel 1477)

§ Ca .iiij

1

ENde hi heeft ghemaect een metalen outaer twintich cubiten lanc: ende twintich cubiten breet: ende tien cubiten hooch

2

Ende oec een metalen zee ghegoten tien cubiten van lip tot lip: rondt inden omganc. Vijf cubiten hadt inder hoecheit: ende een bant van dertich cubiten ghinc om sijnen omganc.

3

Ende ghelikenise der ossen was onder dat Ende sommighe wt snidinghe waren buten tien cubiten: als mit tween vaersen ginghen om den buuc des zees. Ende die ossen waren van metael gheghoteu:

4

ende die zee was gheset op twalf ossen: welker drie saghen totten noorden: ende dander drie totten westen Ende drie ander totten suden: ende die ander drie totten oosten: hebbende die zee gheset op hem Ende die afterste der ossen waren binnen onder die zee.

5

Ende die wijtheit sijns hadde die maet eens palmes: ende dat boert sijns was als eenre kelcken boert of eenre ghecromder lelien: ende hielt drie dusent metreten

6

Ende hi maecte oec tien holle vaten. ende heefter vijf gheset ter rechter hant ende vijf ter luchter

[p. *43]

hant: dat si wasschen souden daer in alle dinghen die sij offeren souden in een offerhande diemen al verbrant. Mer in der zee worden die priesters ghewasschen.

7

Ende hi maecte oec tien gouden candelaer na die ghedaente welc hi gheboden hadde dat sij werden souden: ende sette die inden tempel: vijf aen die rechter sijde. ende vijf aen die luchter sijde

8

Ende oeck tien tafelen: ende heeft die gheset in den tempel: vijf aen die rechter sijde ende vijf aen die luchter sijde Ende hondert gouden schalen

9

Ende hi heeft oec ghemaect een sael der priesteren ende een grote kerck: ende doren daer in die hij ghedect heeft mit metale.

10

Mer die zee heeft hij gheset in die rechter sijde teghent ooste totten zuden.

11

Ende hiram heeft ghemaect ketelen ende crauwelen ende schalen: ende heeft veruolt alle dat werc des conincs in den huys gods:

12

dat is twe pilaernen. ende die hoofden daer op: ende als sommighe netkens: die die hoefden decten bouen dat opperste der pilaernen.

13

Ende vierhondert appelen granaten ende twe netten: also dat twe ordinancie der appelen granaten worden toegheuoecht elken van den netten die bescermen souden dat operste. ende die hoefden der columpnen.

14

Ende hi maecte oec fundamenten der pilaernen ende hol vaten welc hi sette op die fundamenten:

15

een zee ende twalf ossen onder die zee:

16

ende ketelen. ende crauwelen ende scalen. Alle die vaten heeft hiram sijn vader ghemaect salomoni in den huys des heren van dat alre reynste metael

17

In dat lantscap des iordaens heeft die coninc die ghegoten in clei aerde: tusschen sochot ende saredata.

18

Ende die veelheit der vaten was ontellick. alsoe datmen niet en wiste tghewicht des metaels

19

Ende salomon heeft ghemaect alle die vaten des huys gods: een gouden outaer ende tafelen: ende op die tafelen broden der voersettinghe.

20

Ende candelaer mit horen lichten dat si lichten souden voer dat bede huys na der ghewoenten van puren goude:

21

ende sommighe bloyende ende lichten. ende gouden scaren. Alle sijn sij gemaect van seer puren goude.

22

Vaten daer men thimiaen in barnden ende wieroecvaten ende scalen ende mortieren van puren goude. Ende die doren des binnensten tempels dat is in sancta sanctorum dede hij wt snijden: ende die doeren des tempels buten gouden. Ende al so is vervolt alle dat werc dat salomon heeft ghemaect in den huse des heren