Bible in duytsche (Delftse bijbel 1477)

§ Capit .iij.

1

ENde salomon heeft begonnen te timmeren thuys des heren in iherusalem in den berch moria die ghewijst was dauid sijnen vader: in die stede welc dauid bereit had in die hofstede ornan ihebusei

2

Ende hi beghan te timmeren in danderde maent: int vierde iaer sijns rijcs.

3

Ende dit sijn die fundamenten die salomon gheleit heeft om te timmeren thuys gods. tsestich cubiten lanc inder eerster mate: ende twintich cubiten breet

4

Ende voert beghinsel een portael welc strecte int langhe. na die mate der breetheit des huys: twintich cubiten. Mer die hoecheit was hondert ende twintich cubiten. Ende hi verguldet van binnen mit seer puren goude

5

Ende dat meeste huis clede hi mit gouden vueren tafelen ende naghelde daer op platen bruneerts goudes ouer al Ende hi wtsneet daer in palmen: ende als kettenen malcander omvanghende.

6

Ende hi liet die vloer des tempels legghen mit seer costelike marmorsteen: van groter scoenheit. Ende dat

[p. *42]

gout was seer gheproeft.

7

van welcs platen hi clede thuys ende sijn balken ende stijlen ende wanden ende doeren: ende heeft wtghesneden cherubin inden wanden.

8

Ende hij heeft oec ghemaect dat huys sancti sanctorum: die lancte na die breetheit des huys twintich cubiten: ende des ghelijcs die breetheit twintich cubiten. Ende heeft dat ghecleet mit gouden platen bi na ses hondert ponden: ende hi heeft oec ghemaect gulden naghelen:

9

also dat elc woech vijftich siclen. Ende hi clede die cameren mit goude:

10

ende heeft oec ghemaect in den huyse sancti sanctorum twe cherubim mit beelden weerck: ende heeft die ghecledet mit gout

11

Die vloghelen cherubim waren wt gherect twintich cubiten: also dat die een vloghel hadde vijf cubiten ende roerde die want des huys ende die ander vijf cubiten hebbende roerden die wieck des anderen cherub.

12

Ende des ghelijcs die vloghel des anders cherub. hadde vijf cubiten. ende roerden die want: ende sijn ander vlogel van vijf cubiten. roerden die wiecck des ander cherub.

13

Hier om die vloghelen deser beider cherub waren wtgherect: ende strecten twintich cubiten Ende sij stonden mit op gherecten voeten: ende hoer aensichten waren ghekeert totten wtersten huse.

14

Ende hi heeft ghemaect een seil van iacincto purper sijde ende blenckende lijnendoeck: ende wrocht daer in cerubim

15

Ende oec voer die doeren des tempels maecte hij twe columpnen: die hadden in die hoochte vijf ende dertich cubiten. Mer die hoofden der columnen waren lanc vijf cubiten:

16

ende hi heeft ghemaect als kettenen in den beedhuys: ende heeft die gheset op die hoofden der columpnen. Ende oec hondert appel granaet: sette hij tusschen die ketenen.

17

Ende die columpnen sette hij inden portael des tempels: een ter rechter hant. ende dander ter luchter hant Ende die ter rechter hant was noemde hi iachin: ende die ter luchter hant was noomde hij booz