Bible in duytsche (Delftse bijbel 1477)

§ Capittel .ij.

1

ENde salomon dochte te timmeren een huys den naem des heren: ende hem seluen een palaes

2

Ende telde tseuentich dusent mannen draghende mit hoeren scouderen: ende tachtich dusent die snyden souden steenen inden berghen: ende hoer proosten drie dusent ende ses hondert.

3

Ende hi sende tot hiram des coninc tyri segghende Als du ghedaen hebste mit dauid minen vader. ende hebt hem ghesent houten van cederbomen dat hi timmeren soude een huys in welken hi woende: alsoe doe mit mi

4

dat ic timmeren mach een huys den naem des heren mijns gods ende consecreren dat: om te barnen wieroeck voer hem ende te roken wel rukende cruden. ende tot ewighe voersettinghe der broden. ende tot den offerhande die verbrant worden des morghens ende des auonts. ende in den sabbaten ende nyewen manen. ende hochtijden des heren ons gods int ewich welc gheboden sijn israheli.

5

Want thuys dat ic begheer te timmeren is groot. Want onse god groot is: ende bouen allen goden

6

Hier om wie sal hem moghen timmeren een waerdich huys? Ist sake dat die hemelen hem niet en moghen begripen: hoe groot bin ic dat ic hem soude moghen timmeren een huys? Mer alleen daer toe: dat ghebrant mach worden wieroeck voer hem.

7

Hier om sendt mij enen gbeleerden man die kan werken in goudt ende siluer coper ende iser purper ende sijde ende costelike ghesteente. ende die kan wtsnijden in den stenen: mit desen meesteren die ic mit mi heb in ioedsche lant. ende in iherusalem welc bereit heeft dauid mijn vader.

8

Ende houten van cederbomen. ende pijnbomen ende artheutina van den berch libano. Want ic weet dat dijn knechten connen sniden houten van libano Ende mijn knechten sullen sijn mit dijnen knechten: dat mi bereit worden veel houten.

9

Want thuys dat ic

[p. *41]

begheer te timmeren is seer groot ende glorioese.

10

Voert meer sal ic gheuen den wercluden dijnen knechten die die houten snijden sullen tot hoere spise twintich dusent groter maten tarwes: ende alsoe veel maten garstes: ende olie twintih dusent maten.

11

Ende hiram die coninc tyri seide salomoni mit brieuen die hij hem sende. Want die heer heeft lief ghehadt sijn volc: daer om heeft hij ghedaen dij te regneeren op hem.

12

Ende hij toedede segghende. Ghebenedijt sij die heer god israhel die ghemaect heeft hemel ende aerde: die dauid den coninc ghegheuen heeft enen wijsen soon ende gheleert ende sinnich ende voersienich: dat hi timmeren wil een huys den heer. ende hem seluen een palaes.

13

Hier om heb ic dij ghesent eenen wijsen man ende seer constich.

14

hiram mijnen vader eens wijfs soon van den dochteren dan welcs vader was tirius: die can werken in goudt ende siluer. coper ende yser in marmorsteen ende houten: ende in purper ende costelike steen ende lijnen ende sijde: ende die kan wt sniden in den steenen alle sijn dinghe. ende vinden wijslike al dat van node is inden wercke: mit dijnen meesteren ende mitten meesteren mijns heren dauid dijns vaders.

15

Hier om mijn heer sent dijnen knechten tarwe ende gharste ende olie ende wijn. welc du beloeft hebste

16

Ende wi sullen snijden houten van den berch libano al soe veel als du behoefste: ende sullen die scicken mit scepen doer die zee in ioppe: mer dij sal toehoren die ouer te bringhen in iherusalem.

17

Hier om heeft salomon ghetelt alle mannen die totter ioedscher wet bekeert waren die waren inden lande israhel na die tellinghe die sijn vader ghetelt hadde: ende daer sijn gheuonden hondert ende vijftich dusent ende drie dusent ses hondert.

18

Ende hi heeft gheordineert wt hem tseuentich dusent die mitten scouderen last droeghen: ende tachtich dusent die houwen souden steenen wt den berghen: mer drie dusent ende ses hondert set hij proosten der wercken des volcs.