Bible in duytsche (Delftse bijbel 1477)

§ Capittel .i.

1

SAlomon dauids soon is ghestarct in sijn rijc: ende die heer was mit hem: ende heeft hem groot ghemaect in den hoghen

2

Ende sasomon heeft gheboden al israhel. den ouersten der gheslachten ende den heren ouer hondert ende den hertoghen ende rechteren al israhels ende princen der familen:

3

ende is ghegaen mit alle der veelheit int hooch gabaon. daer tabernakel was des vreden sheren: welc moyses die knecht gods ghemact heeft inder woestijnen.

4

Mer die arke gods brocht dauid van cariathiarim in die stede die hij hoer bereit had. ende daer hij hoer gheuest had een tabernakel: dat is in iherusalem.

5

Ende dat metalen outaer dat ghetimmert had beselehel een soon vri des soons vr. daer hi was biden tabernakel des heren: welc oec salomon ghesocht heeft ende alle die vergaderinghe.

6

Ende salomon clam op tot dat metalen outaer biden tabernakel des vreden sheren ende offerde daer in dusent offerhande.

7

Ende siet in diere nacht openbaerde hem god segghende. Begheer wattu wilste: op dat ict dij gheuen mach.

8

Ende salomon heeft gheseit tot god. du hebste ghedaen grote barmherticheit mit dauid mijnen vader: ende hebt mi ghemact coninc voer hem.

9

Hier om nv heer god: dijn reden moet veruolt werden welc du gheloeft hebste dauid mijnen vader. Want du hebste mij coninc ghemaect op dijn grote volc ende veel: welc so ontellic is al stof der aerden.

10

Ghif mij wijsheit ende verstandenisse: dat ic mach in gaen ende wtgaen voer dijn volc. Want wie mach waerdelic oerdelen dit dijn volc welc so groet is?

11

Ende seide tot salomon. want dat meer behaecht heeft dijnre herten. ende du niet begheert hebste rijcdom ende goet ende glorie. noch dat leuen der gheenre die dij ghehaet hebben noch veel daghen dijns leuens: mer du heb-

[p. *40]

ste ghebeden wijsheit ende conste. dattu moechste regeeren mijn volc. op welc ic dij gheset heb enen coninc:

12

wijsheit ende consten sijn dij ghegeuen Ende ic sal dij gheuen rijcdom ende goet ende glorie: alsoe dat niemant onder den coninghen noch voer di noch na di dijns ghelijc sal sijn.

13

Ende salomon is ghecomen van den hoghen gabaon in iherusalem bi den tabernakel des vreden: ende heeft regneert op israhel.

14

Ende hij heeft hem vergadert waghen ende rijders: ende hem sijn gheworden dusent ende vierhondert waghenen ende twalf dusent rijders: ende hi dedese wesen inden stede der waghenen ende mit den coninc in iherusalem.

15

Ende die coninc heeft ghegheuen siluer ende gout als steenen: ende cederbomen als sotte vijchbomen die vassen in die velden mit groter veelheit.

16

Ende paerden worden hem toe gheleit wt egipten van choa vanden coopmannen des conincs:

17

die ghinghen ende coften een waghen paerden om ses hondert silueren penninghen ende een paert om hondert ende vijftich Des ghelijcs ghesciede copinghe van allen rijken ceththeorum ende van den coninc sirie.