Bible in duytsche (Delftse bijbel 1477)

§ Ca xxviij

1

ENde dauid heeft tsamen gheropen alle die princen israhel. die hertoghen der gheslachten ende prosten der scaren. die den coninc dienden: ende die ouerste der gheslachten ende centurionen ende die waren ouer die rijcdom ende besittinghe des conincs: ende sijn sonen mit den camerlinghen. ende die machtighe ende alle die stercste in den heer iherusalem.

2

Ende doe die coninc op ghestaen was ende stont seide hi. hoert mi mijn broeders: ende mijn volc. Ic heb ghedocht dat ic timmeren soude een huys in welken rusten soude die archa des vreden sheren ende een voetscamel der voeten des heren ons gods: ende ic heb bereit alle dinc te timmeren.

3

Mer god heeft mij gheseit. Du en salste niet timmeren een huys mijnen naem. daer om want du biste een stridende man ende hebste bloet ghestort:

4

mer die heer god israhel heeft mij vercoren van alle den huse mijns vaders: dat ic wesen soude een coninc op israhel in der ewicheit. Want van iuda heeft hi ghecoren die princen. Ende van den huys iuda dat huys mijns vaders: ende van den sonen mijns vaders heeft hem behaghet mij te kiesen enen coninc op al israhel: mer ende oec van mijnen sonen.

5

want die heer mij veel sonen ghegeuen heeft: heeft hij ghecoren salomon mijnen soon te sitten in den throon des rijcs sheren op israhel:

6

ende heeft mij gheseit. Salomon dijn soon zal timmeren mijn huys ende mijn salen. Want ic heb hem my wtuercoren tot enen soon. ende ic sal hem sijn in een vader:

7

ende sal vastmaken sijn rijck inder ewicheit: ist sake dat hij volhart te doen mijn gheboden ende oerdelen als hij huden doet.

8

Hier om nu voer alle die vergaderinghe israhel want god onse heer hoert bewaert ende soeket alle die gheboden des heren ons gods dat ghi besitten moghet dat goede lant: ende laten dat uwen soonen na v inder ewicheit.

9

Mer du solomon mijn soon bekenne gods dijns vaders: ende dien hem mit volmaecter herten ende willighen moede. Want alle herten ondersoeket die heer: ende alle ghedachten der herten verstaet hij. Ist sake dattu hem soectste du salste hem vinden: mer laetstu hem hij sal dij neder werpen inder ewicheit.

10

Hier om nv want die heer di vercoren heeft dattu timmeren soudste een huys des sanctuarijs: wert sterc ende volbrenct

11

Ende dauid heeft ghegheuen salomon sijnen soon bescriuinghe des portaels ende des tempels ende der kelre ende des auontmaels camere ende rust steden in heimeliken toeganghen totten outaer ende des huys des ghenaden.

12

ende al der salen die hi ghedacht had. ende der heymeliker cameren doer den omganc in die scatten shuys des heren ende in die scatten der heilighen:

13

ende der priesterliker ende leuiten sceydinghe alle die werken shuys des heren ende in allen vaten des dienstes des tempels sheren:

[p. *37]

14

gout in ghewicht doer alle vaten des dienstes: ende ghewichte des siluers om menegherleie vaten ende werken:

15

ende in gouden candelaeren ende tot lanternen. gout na die maet eens yghelcs candelaers ende der lucernen: ende des gelijcs in silueren candelaren ende in hore laternen na versceidinghe des maets gaf hi ghewicht des siluers.

16

Ende hij gaf gout tot den tafelen der voersettinghen na menigerley maniere der tafelen: ende des ghelijcs oec siluer tot anderen silueren tafelen.

17

Tot crauwelen ende scalen ende wieroocuaten van puren goude. ende gouden leeukens deilde hij ghewicht na ghedaente des maets. tot leeuken ende leeuken: ende des ghelijcs sceide hi menigherlei ghewichte des siluers tot silueren leuwen.

18

Ende hij heeft ghegeuen seer puer gout den outaer in welken ghebrant soude werden die wieroec: ende dat men van dien maken soude een ghelikenis des waghens cherubin wtreckende sijn vloghelen ende hudende die arke des vreden shereu.

19

Ende hi seide. Alle dese dinghen sijn ghecomen tot mi ghescreuen mitter hant des heren: op dat ic verstaen soude alle die werken des exemplaers.

20

Ende dauid seide salomoni sijnen soon. Doet manliken ende wert ghestarct ende maect: en wilt niet ontsien of ontvruchten. want die heer mijn god sal wesen mitti: ende en sal dij niet laten noch begheuen: hent tot du volbrocht hebste alt werc des dienstes shuys des heren.

21

Siet die deilinghe der priesteren ende der leuiten staen dij bij ende sijn bereit in allen dienst shuys des heren: ende die princen ende tvolc hebben bekent alle dijn gheboden