Bible in duytsche (Delftse bijbel 1477)

§ Ca .xxix

1

ENde dauid die coninc heeft ghesproken tot alle die vergaderinghe. God heeft ghecoren mijnen enen soon salomonen noch een kint ende cleenlic. want een groot werc is: want een woninghe wort bereit niet enen mensche. mer god.

2

Ic heb mit al mijnre macht bereit die costen shuys des heren mijns gods: gout totten gouden vaten. ende siluer totten silueren vaten. coper totten coperen. yser tottten yseren. ende houte totten houten. ende costelike stene onichinos ende als stibinos ende van veel varwen ende alle costelike ghesteente ende marmorsteen ouer vloedelic:

3

ende bouen die dinghen die ic gheoffert heb in den huse mijns gods. van mijn goet gheue ic gout ende siluer in den tempel mijns gods: wtghenomen dien dinghen die ic bereit heb totten heilighen huys

4

drie dusent pondt goudts van den goude ophir: ende seeuen dusent pondt des alre gheproefsten siluer. tot die wanden des tempels te verghulden:

5

eude waer gouds noot was gout. ende waer siluers behoef was siluer. Die werken moeten ghescieu doer die handen der wercluden: ende of yemant willichlike offert hi vol sijn hant huden: ende offer dat hi wil den heer.

6

Hier om die princen der familien ende die edelen der gheslachten israhel. ende rechters ende centuriones ende princen der princen der besittinghe des conincs hebben gheloeft:

7

ende ghegeuen totten

[p. *38]

werken shuys des heren vijf dusent pont gouds ende tien dusent scellinghe ende tien dusent poudt siluers. ende achtien dusent pont copers: ende hondert dusent pont ysers:

8

ende bi wien gheuonden sijn ghesteente die ghauen totten scatten shuys des heren doer die hant iehihel gersonitis.

9

Ende tvolc is verblijt wanneer sij loefden willichlic hoer ghelofte: want mit al der harten hebben sijt ghebrocht den heer. Mer oec dauid die coninc heeft hem verblijt mit groter blijscappen:

10

ende heeft benedijt den heer voer al die menichde des volkes ende seide. Ghebenedijt bistu heer god israhel ons vaders: van ewicheit tot ewicheit.

11

Dijn is heer grootmakinghe ende macht ende glorie ende victorie: ende dij sij lof. Want dijn sijn alle dinghen die sijn inden hemel ende inder aerdeu. Dijn is heer trijck: ende du biste bouen allen princen.

12

Dijn sijn die rijcdomme: ende dijn is glorie: ende biste heer alre dinghen. In dijnre hant is cracht ende macht: in dijnre hant is grootheit ende ghebot alre dinghen.

13

Hier om nv heer ons god wij belien dij: ende louen dijnen gloriosen naem

14

Wie bin ic ende wie mijn volc: dat wij alle dese dinghen moghen dij belouen? Dijn sijn alle dinc: ende dat wij van dijnre hant ontfanghen hebben. hebben wi di ghegheuen.

15

Want wij sijn pelgrims ende vreemde voer dij: als alle onse vaders. Onse daghe sijn als een scae op ter aerden: ende gheen marringh is hier.

16

Heer ons god al dese menichoudicheit die wij bereit hebben op dat ghetimmert soude werden een huys dijnen naem is van dijnre hant: ende dijn sijn alle dinghen

17

Ic weet mijn god dattu proefste die herten ende minste simpelheit: ende hier om heb ic in simpelheit mijns herten blidelic gheoffert al dese dinghen: ende heb gesien dijn volc dat hier gheuonden is mit groter blijscap die offeren ghauen.

18

Heer god abraham ende ysaac ende israhel onser vaderen bewaer inder ewicheit desen wille hoers herten: ende dese ghedachte moet al tijt bliuen in dijnre eren

19

Ende geeft mijnen soon salomoni een volcomen hert. dat hi bewaer dijn gheboden ende dijn ghetughe ende dijn cerimonien ende alle doe ende volbrenghe: ende timmer een huys welcs costen ic bereit heb.

20

Ende dauid heeft gheboden al der vergaderinghe Benedijt den heer onsen god. Ende al die vergaderinghe heeft ghebenedijt den heer god hore vaderen: ende buychden hem ende aenbeden god: ende daer na den coninc.

21

Ende offerde den heer offerhanden: ende des anderen daghes offerden sij offerhande die men verbrant dusent stieren dusent rammen dusent lammeren mit horen toebehoren ende mit alre ghewoente ouervloedelic in al israhel.

22

Ende sij aten ende droncken biden heer in dien daghe mit groter vrolicheit: ende salfden anderwerf salomon den soon dauid. Ende sij salfden hem den heer tot enen prince: ende sadoch tot enen biscop.

23

Ende salomon heeft gheseten op den stoel des heren in een coninc voer dauid sijnen vader ende be-

[p. *39]

haghede hem allen: ende al israhel was hem onderdanich.

24

Ende alle die princen ende machtighe ende alle die sonen des conincs ghauen die hant: ende waren onderdanich salomon den coninc.

25

Ende die heer macte groot salomon op al israhel: ende gaf hem glorie des rijcs welc gheen coninc israhel voer hem ghehad heeft.

26

Ende dauid een soon ysai regneerde op alle israhel:

27

ende die daghen die hij regneerde op israhel waren veertich iare. In hebron regneerde hij seuen iaren ende in ihernsalem drie ende dertich iaren:

28

ende is ghestoruen in goeder outheit vol van daghen. ende rijcdom ende glori: ende salomon sijn soon regneerde voer hem.

29

Mer die werken des conincs eerste ende leste sijn ghescreuen in den boeck samuels des propheten ende in den boeck nathan des propheten ende in den boeck gad des propheten:

30

ende al sijn rijcs ende stercheits ende der tijden die ghegaen sijn onder hem of in israhel. of in allen rijcken der aerden.

§ Hier eyndet dat eerste boock paralipomenon.