Bible in duytsche (Delftse bijbel 1477)

§ Capittel .xxiij

1

HIer om dauid out ende vol der daghen heeft gheset salomon sijnen soon coninc op israhel:

2

ende heeft vergadert alle die princen israhel. ende priesteren ende leuiten.

3

Ende die leuiten sijn ghetelt van twintich iaren ende opwarts: ende daer sijn gheuonden acht ende dertich dusent mannen

4

Wt desen sijn ghecoren ende ghedeilt in den dienst des huys des heren vier ende twintich dusent: mer der proosten ende richteren ses dusent.

5

Ende vier dusent doerwachters ende al so veel sanghers singhende den heer in organen. die hi ghemaect had tot singhen:

6

ende dauid heeft die ghedeilt bi boerten der sonen leui als gersom ende caath ende merari.

7

Die souen gersom: leedan ende semei.

8

Die soonen leedan princen: iehihel ende zethan ende iohel drie.

9

Die sonen semei: salomich ende ozihel ende aran drie. Dit sijn die prince der familien leedan.

10

Ende die sonen semei: leeth ende ziza. ende yaus ende baria. Dese sonen semei waren vier.

11

Ende leeth was die eerste. ziza die anderde. Mer yaus ende baria en hadden niet veel sonen: ende daer om sijn sij ghetelt in een familie ende in ene huse

12

Die sonen caath: amram ende ysaar hebron ende ozihel vier.

13

Die sonen amram: aaron ende moyses. Ende aaron is ghesceiden dat hi dienen soude in sancta sanctorum. hi ende sijn sonen int ewich: ende soude bernen wieroock den here na sijn ghewont: ende benedien sijnen naem inder ewicheit

14

Ende die sonen moysi eens mans godes sijn toe ghetelt in den gheslachte leui.

15

Die sonen moysi: gersom ende eliezer

16

Die sonen gersom: subuhel die eerste

17

Mer die sonen eliezer waren roobia die eerste: ende niet en waren eliezer andere soonen. Mer die soonen roobia sijn seer menichuoudicht.

18

Die sonen ysaar: salomith dierste

19

Die sonen hebron: ierian dierste. amarias dander. iazihel die derde: ihecmaan die vierde.

20

Die sonen ozihel: micha die eerste. iesia die anderde.

21

Die sonen merari: mooli ende musi. Die sonen mooli: eleazar ende cis.

22

Ende eleazar is ghestoruen. ende hi en had gheen sonen mer dochteren: ende die sonen cis hoer broeders namen die te wijue.

23

Die sonen musi: mooli ende eder ende iherimuth drie.

24

Dit sijn die sonen leui in horen gheslachten ende familien: princen bi boerten. ende tghetal alder hoefden: die deden die werken des dienstes in den huse des heren van twintich iaren ende daer bouen.

25

want dauid seide Die heer god israhel heeft ghegeuen rust sijnen volc. ende woninghe iherusalem tot inder ewicheit.

26

Ende niet en salt sijn des ambochts der leuiten dat zij voert an draghen sullen dat tabernakel. ende al sijn vaten te dienen

27

Ende na den lesten gheboden dauid sal onder ghetelt warden tghetal der sonen leui. van twintich iaren ende daer bouen:

28

ende sullen wesen onder die hant der sonen aaron. in den dienste des huys sheren in den portalen ende in den cameren. ende in die ste-

[p. *31]

de der reyninghe ende in die sanctuari ende in allen werken des dienstes in den tempel des heren.

29

Mer die priesters dat die sullen sijn bouen die brooden der voersettinghe ende tot gheliken sacrificie. ende tot vladen ende ongheghest broot. ende pannen. ende tot barnen: ende ouer alle ghewicht ende maet.

30

Mer die leuiten dat sij sullen staen des morghens om te belien ende te singhen den heer: ende des ghelijcs des auonts

31

al so wel in offeringhe der offerande die men verbrant des heren als in den sabbaten ende kalenden ende anderen hoechtijden. na tghetal ende cerimonien eens yeghelics dinghes.

32

eweliken biden heer: ende bewaren die bewaringhe des tabernakels des vreden. ende die ghewoente des sanctuarijs. ende die bewaringhe der sonen aaron hore broederen. dat si dienen souden in den huys des heren