Bible in duytsche (Delftse bijbel 1477)

§ Ca .xxiiij.

1

MEr den sonen aaron waren dese deilinghe Die sonen aaron nadab ende abiu ende eleasar ende ythamar

2

Ende nadab ende abiu voer horen vader sijn ghestoruen sonder kinderen: ende eleazar heeft ghebruyct die priesterscap ende ythamar

3

Ende dauid heeftse ghesceiden. dat is sadoch van den sonen eleazar. ende ahimelech vanden sonen ythamar na hoer boerten ende dienste:

4

ende veel meer sijn gheuonden der sonen eleazar onder den princen mannen dan die sonen ythamar Ende hij sceide van hem dat is van den sonen eleazar sestien princen. ende vanden sonen ythamar doer sijn familien ende husen achte.

5

Ende hi heeft ghedeilt die beide onder hem ende die familien mit loten. want sij waren princen sanctuarij ende princen des huys gods: also wel van den sonen eleazar als van den sonen ythamar.

6

Ende semeias een soon nathanael een doctor des wets ende leuijt heeftse bescreuen voer den coninc ende den princen ende sadoch priester ende ahimelech abithars soon: ende den princen der priesterliker familen ende der leuiten een huys dat bouen die ander was eleazar. ende een ander huys welc onder hem had die anderen van ythamar.

7

Ende daer ghinc wt dat eerste lot ioiarib. dat ander iedeie.

8

dat derde harim. dat vierde seorim.

9

dat vijfte melchia. tseste maimna.

10

tseuende acchos. Dat achte abia.

11

dat neghende ihesu. het tiende sechenia.

12

dat elfte eliasib. twaelfste iacim.

13

dertiende hoppha. dat veertienste isbaal.

14

dat vijftienste belga. dat sestienste emmer

15

dat seuentienste ezir. dat achtienste aphses.

16

Dat neghentienste apheceia. dat twintichste ezechiel:

17

dat een endetwintilhste iachin twe ende twintichste gamul.

18

drie ende twintichste dalaiau. dat vier ende twintichste maziau.

19

Dit sijn hoer boerten na horen diensten dat sij in sullen gaen thuys gods. ende na hore ghewoente onder die hant aaron hoers vaders: als gheboden had die heer god israhel.

20

Mer der sonen leui die meer waren van den soonen amram. was subahel: ende van den sonen subahel iedeia.

21

Ende van den soonen roobie die prince iesias.

22

Mer ysaaris was een soon salemoth

[p. *32]

ende sijn soon was ianadiath.

23

ende sijn soon ieriau die eerste. amarias die anderde. iazihel die derde. iechmoan die vierde

24

Die soon ozihel micha: een soon micha samir

25

Die broeder micha iesia: ende die soon iesie zacharias.

26

Die sonen merari: mooli ende musi

27

Een soon osiau bennon: ende een soon merari oziau: ende soem ende sachur ende hebri

28

Mer mooli een soon eleazar: die en had gheen kinderen

29

Mer die soon cis ieramihel.

30

Die sonen musi: mooli eder ende ierimoth. Dit sijn die sonen leui na den husen hore familien.

31

Ende sij hebben oec gheworpen loten teghen hoer broeders Die soonen aaron voerden coninc dauid. ende sadoch ende ahimelech ende den princen der priesterliker familien ende der leuiten: also wel die merers als die minres alle dese dat loth ghelijck ghedeilt