Bible in duytsche (Delftse bijbel 1477)

§ Capittel :xxij:

1

ENde dauid seide Dit is thuys gods: ende dit outaer in offerhande israhel.

2

Ende heeft gheboden dat vergadert souden werden alle die bekeert waren totter ioedscher wet van den lande israhel: ende sette wt hem steenhouwers om steenen te snijden ende te polieren. op dattet huys gods ghetimmert soude werden.

3

Ende veel ysers tot spikeren der doeren. ende tot samenvoeghinghe heeft dauid bereit: ende copers ontelliken last.

4

Ende houten van cederbomen waren niet te waer-

[p. *29]

deren. welke sidonij ende tyrij brochten tot dauid. Ende dauid heeft gheseit.

5

Salomon mijn soon is een clein kint ende teder Ende thuys dat ic den heer timmeren wil sal wesen soe danich: dattet in allen lantscappen genoemt sal werden. Hier om sal ic hem bereiden datter van node toe behoert Ende om deser sake bereide hij alle die costen voer sijnen doot.

6

Ende hi riep sijnen soon salomon: ende gheboet hem dat hi timmeren soude een huys den heer god israhel.

7

Ende dauid seide tot salomon Mijn soon: mijns willen heeft gheweest dat ic timmeren soude een huys den naem des heren mijns gods:

8

mer die reden des heren is ghesciet tot mij segghende. Veel bloets hebstu wt ghestort ende veel striden ghestreden: du en sulste niet moghen timmeren een huys mijnen naem: want so veel bloets wt ghestort is voer mij.

9

Die soon die dij gheboren sal worden: sal een seer rustich man wesen. want ic sal hem doen rusten van al sijnen vianden al om ende om: ende om dese sake sal hi ghenoemt werden vreedsaem: ende ic sal gheuen vrede ende ledicheit in israhel in allen sijnen daghen.

10

Hij sal timmeren een huys mijnen naem: ende hi sal mij sijn in een soon ende ic sal hem wesen in een vader: ende ic sal den stoel sijns conincrijcs vast maken int ewich ouer israhel.

11

Hier om mijn soon die heer sij mit dij: ende wert gheluckich ende timmer een huys den heer dijnen god: als hij ghesproken heeft van dij

12

Ende die heer moet dij gheuen wijsheit ende sin: dattu moechste regeren israhel: ende bewaren die wet sheren dijns gods.

13

Want dan moechstu vorderen: is dattu bewaerste die gheboden ende oerdelen die god gheboden heeft moysi dat hi die leren soude israhel. Wart ghestarct ende doet manlike: en wilt niet ontsien noch vruchten

14

Siet ic in mijnre armoeden heb bereit die costen des huys des heren hondert dusent pondt gouds: ende dusent dusenden der ponden siluers: mer des copers ende isers en is gheen ghewicht want tghetal wort verwonnen van grootheit. Houten ende stenen heb ic bereit tot allen werken

15

Ende du hebste veel meesters. steenhouwers. ende metselaers. ende wercluden der houten. ende alre consten. seer wijs om een werc te maken

16

in gout ende siluer. ende coper ende yser. welcs gheen ghetal en is. Hier om stant op ende maect: ende die heer sal sijn mit dij

17

Ende dauid heeft gheboden alle den princen israhel. dat si helpen souden salomon sijnen soon:

18

segghende ghi siet dat die heer v god mit v is. ende heeft v ghegeuen rust doer den omganc. ende heeft alle uwe vianden ouergheleuert in uwen handen: ende die aerde is onder gheworpen voer den heer ende voer sijn volc.

19

Hier om gheeft v herten ende v sielen dat ghi den heer soect uwen god: ende staet tsamen op ende timmert een sanctuari den heer god: dat in gheleit mach werden die arche des vreden sheren. ende die vaten die den heer gheheilicht sijn int huys welc ghetimmert wort

[p. *30]

den naem des heren