Bible in duytsche (Delftse bijbel 1477)

§ Capittel .xxi.

1

ENde die boese gheest stont op teghen israhel: ende verwecten dauid dat hij israhel tellen soude.

2

Ende dauid seide tot ioab ende totten princen des volcs. Gaet ende tellet israhel van bersabee tot dan: ende brengt mij tghetal dat ict weten mach.

3

Ende ioab antworde Die heer moet vermeeren sijn volc hondertvout meer dan sij sijn. En sijnt niet alle heer coninc dijn knechten? Waer om begheert dat mijn heer dat israhel in sonde gherekent sal worden?

4

Mer die reden des conincx mocht meer. Ende ioab is wt ghegaen ende ghinc om al israhel. ende is weder ghecomen te iherusalem.

5

Ende heeft ghegheuen dauid tghetal der gheenre die hij om ghegaen had: ende alt ghetal israhel dusent dusende ende hondert dusent der mannen swaert wt treckende Mer van iuda. vier hondert ende tseuentich dusent stridender mannen.

6

want hi en telde niet leui ende beniamin: daer om want hij onwillich veruolchde des concincx ghebot.

7

Mer het mishaghede god datter gheboden was: ende sloech israhel.

8

Ende dauid seide tot god: ic heb seer ghesondich om dat ic dit dede. Ic bidde neemt af die boosheit dijns knechtes: want ic sotlic ghedaen hebbe.

9

Ende die heer heeft ghesproken tot gad den propheet dauids. segghende.

10

Ghanc ende spreec tot dauid: ende seg hem. Dit seit die heer. Ic gheue dij koer van drien: kies een dattu wilste dat ic dij sal doen.

11

Ende doe quam gad tot dauid: seide hij hem.

12

Dit seit die heer. Kies dattu wilste Ofte drie iaren lanc pestilencie. ofte drie maenden dij te vlien dijn vianden ende niet moghen ontghaen hoer swaert. of drie daghen dat swaert des heren ende den doot te verkeren in den lande: ende den enghel des heren te doden in allen landen israhel. Hier om siet uv wat ic antworden sal den ghenen die mi ghesent heeft.

13

Ende dauid seide tot gad Van allen sijden drucken mij bangicheden. Mer beter is mij dat ic val in den handen des heren wat veel sijn. sijn bermherticheden: dan in den handen der menschen.

14

Hier om heeft die heer ghesent pestilencie in israhel: ende daer sijn gheuallen van israhel tseuentich dusent der mannen

15

Ende hij heeft oec ghesent den enghel in iherusalem: dat hij die slaen soude Ende doe die gheslaghen wort. sach god ende ontfermde op die grootheit des quaets: ende gheboot den enghel die daer sloech. het is nv ghenoech: laet ophouden dijn hant. Ende die enghel des heren stont bij die hofstede ornan ihebusei:

16

ende dauid opslaende sijn oghen. sach den enghel des heren staende tusschen hemel ende aerde: ende een wtghetoghen swaert in sijn hant ende ghekeert teghen iherusalem: ende alsoe wel hij als die meeste van gheboerten ghecleet mit haren cleden vielen mitten hoofde vorwaert in der aerde

17

Ende dauid zeide tot god. Bin ic niet

[p. *28]

die gheen die gheboden heb dattet volc ghetelt soude werdden? Ic bin die ghesondicht heb: ic bin die quaet ghedaen heb. wat heeft dese scaer verdient? Heer mijn god ic bidde laet dijn hant keren teghen mij ende teghen thuys mijns vaders: mer dijn volc en moet niet gheslaghen warden.

18

Ende die enghel des heren gheboot gad dat hi segghen soude dauid: dat hij opclimmen soude ende timeren een outaer den heer god in die hofstede ornan iebusei.

19

Hier om clam dauid op na die reden gad: die hi ghesproken had wt den naem des heren.

20

Ende ornan doe hij opsach ende sach den enghel ende sijn vier sonen mit hem: huden sij hem. want in diere tijt wreuen sij tarwe in die hofstede.

21

Ende doe dauid quam tot ornan. sach hem ornan: ende ghinc hem te ghemoet van sijn hofstede. ende aenbede hem mit den hoefde voerwaert inder aerden.

22

Ende dauid seide hem Gheeft mij die stede daer dijn huys op staet. op dat ic timmeren mach den heer een outaer daer in. alsoe dattu neemste also veel siluers alset waert is: ende die plaghe mach ophouden van den volc.

23

Ende ornan seide tot dauid Neemt wech: ende mijn heer die coninc doe al dat hem behaghet. Mer ic gheue oec ossen tot offerhande ende vleghelen tot houten: ende tarwe in sacrifici: al wil ict ghaerne gheuen.

24

Ende die coninc dauid seide hem. In gheenre wijs en salt soe gheschien: mer ic sal di siluer gheuen dattet waert is. want ic en salt dij niet ontnemen: ende also den heer offeren dancberlike offerhande

25

Hier om gaf dauid ornan voer die stede ses hondert siclen goudes seer rechtuaerdichs ghewichtes:

26

ende timmerde daer den heer een outaer: ende offerde offerhande die men verbrant ende vredelike offerhande: ende heeft god aengheropen. ende hi heeft hem verhoert in den vier vanden hemel op dat outaer des offers datmen verbrant

27

Ende die heer heeft gheboden den enghel: ende hij heeft sijn swaert ghekeert in die sceye.

28

Hier om haestelic dauid siende dat die heer hem verhoert had in die hofstede ornan iebusei: offerde hi daer offerhande.

29

Mer dat tabernakel des heren: dat moyses ghemaect had inder woestijnen. ende dat outaer des offerhandes datmen verbrant was in diere tijt int hoghe gabaon:

30

ende dauid en mocht niet gaen tot dat outaer dat hi daer god bidden soude. Want hi was mit groten anxte veruaert siende dat zwaert des enghels sheren