Bible in duytsche (Delftse bijbel 1477)

§ Ca .xviij.

1

HEt is ghsciet na desen dat dauid sloech philistijm ende vernederden die: ende ontnam geth ende sijn dochteren vander hant philistijm:

2

ende sloech moab ende die moabiten worden dauids knechten. brenghende hem ghauen.

3

In diere tijt sloech oec dauid adadezer den coninc soba des lants emath doe hij reysde om breet te maken sijn coninckrijc hen totter vloet eufraten.

4

Ende dauid heeft ghenomen dusent waghenen sijns. ende seeuen dusent rijders. ende twintich dusent mannen voetghanghers. Ende hij onthaessende alle die paerden der waghenen wtghenomen hondert waghenen welc hij hielt tot sijns selfs behoef.

5

Ende sirus damascenus is toe ghecomen: dat hij hulp soude gheuen adadezer den coninc soba. Mer dauid versloech sijns volcs twe ende twintich dusent mannen.

6

Ende settede ridders in damasco: op dat syrien hem oec dienen soude ende brenghen gauen. Ende god heeft hem gheholpen in allen dinghen tot welken hij reisde.

7

Ende dauid heeft ghenomen gouden pijlkokeren welc die knechten adadezer hadden ende brocht die in iherusalem:

8

ende van thebath ende chun. steden adadezer veel metaels: van welken salomon maecte een metalen zee ende columpnen. ende copere vaten.

9

Ende doe thou die coninc emath ghehoert had. dat dauid gheslaghen hadde al dat heer adadezer des conincs soba:

10

heeft hi ghesent aduram sijnen soon tot den coninc dauid. dat hi begheren soude vrede van hem: ende soude mede verblijden mit hem om dat hi gheslaghen had ende wt gheuochten adadezer. Want thou was viant adade-

[p. *25]

zer

11

Mer oec alle gouden ende silueren ende coperen vaten heilichde dauid die coninc den heer. mit den siluer ende gout dat hi ghenomen had van allen heidenen: al so wel van ydumea ende moab ende vanden sonen ammon. als van philistijm ende amalech

12

Mer abisai een soon saruie heeft gheslaghen edom in den dale salinarum achtien duysent:

13

ende heeft gheset in edom een bescermenisse op dat ydumea soude dienen dauid Ende die heer heeft dauid behouden in allen dinghen tot welken hij reisden

14

Ende dauid regneerde ouer al israhel: ende dede oerdel ende iusticie alle sijnen volc.

15

Mer ioab een soon saruie die was ouer theer. ende iosaphat een soon ahiluth was cancellier.

16

Mer sadoch een soon achitob. ende ahimelech een soon abiathar waren priesters: ende susa een meister der wet.

17

Banaias een soon ioiade was bouen die legionen cerethi ende felethi. Mer die sonen dauid waren die eerste totter hant des conincs