Bible in duytsche (Delftse bijbel 1477)

§ Capittel .xvij.

1

DOe dauid woende in sijn huys: seide hij tot nathan den prpheet. Siet ic woen in een huys van ceder bomen: mer die arche des vreden sheren is onder vellen.

2

Ende nathan seide tot dauid. Doet alle dinghen die in dijnre herten sijn Want die here is mit dij

3

Hier om in diere nacht is die reden des heren gemaect tot nathan segghende.

4

Ghanc ende spreec dauid mijnen knecht. Dit seit die heer du en salste mij niet tymmeren een huys om in te wonen.

5-6

want ic en hebbe niet ghebleuen in een huys. van diere tijt dat ic israhel wtleide vanden lande egipti hent tot desen daghe: mer ic heb altijt verwandelt mijn steden des tabernakels ende bleef in tenten mit al israhel Heb ic ye ghesproken een der rechteren israhel dien ic gheboden had dat sij voeden sonden mijn volc. ende heb gheseit waer om en hebdi mij nyet ghetymmert een huys van cederbomen hout?

7

hier suldi nv spreken tot mijnen knecht dauid Dit seit die heer der scaren. Ic heb dij begheert doe ghi nauolchde die kudden in den weyen : vp dat ghi wesen soudt een hertoech mijns volcs israhel:

8

ende heb gheweest mit di warwarts du reisdeste: ende heb ghedoot alle dijn viande voer dij: ende heb di ghemaect enen naem als eens der groten die gheeert werden inder aerden.

9

Ende heb ghegeuen een stede mijnen volc israhel. Het sal werden gheplant ende sal wonen daer in. ende sal voert an niet beroert warden: noch die sonen des boosheits en sullen se niet verderuen als van beghin.

10

van den daghen in welken ic ghegheuen heb rechters mijnen volc israhel: ende heb veroetmoedicht alle dijn vianden Hier om bootscap ic dij: dat die heer sal dij timmeren een huys

11

Ende wanneer du veruolt hebste dijn daghen dattu gaen salste tot dijnen vaderen: sal ic verwechken dijn saet na dij welc sijn sal van dijnen sonen. ende ic sal vast maken sijn rijck.

12

Hi sal mij tymmeren een huys: ende ic sal vastmaken sijnen stoel tot inder ewicheit.

13

Ic sal hem wesen in een vader. ende hi sal mi wesen in een soon: ende mijn barmherticheit en sal ic niet afhalen van hem als icse heb afghehaelt van dien die voer dij was

14

Ende ic sal hem setten in mijn huus. ende in mijn rijc tot inder ewicheit: ende sijn throon sal wesen alre vaste int ewich.

15

Na alle desen woerden. ende na alle dit visioen: soe heeft nathan ghesproken tot dauid

16

Ende doe die coninc dauid quam ende sat biden heer: seide hi Heer god wie bin ic. ende welc is mijn huys: dat ghi mij sulke dinghen gheuen soudt ?

17

Mer dit is oec weinich ghesien in dijn aenscijn. Ende daer om heb dij ghesproken op dat huys dijns knechtes oec in toecomende: ende hebt mij ghemaect aenscouwelic bouen allen menschen Heer mijn god

18

wat moechdi meer toedoen dauid. want du alsoe glorificeert hebste dijnen knecht: ende hem bekent?

19

Heer om dijnen knecht na dijn hert hebstu ghedaen alle dese

[p. *24]

grootmakinghe: ende du hebste ghewilt alle dese grote dinghen bekent te wesen.

20

Heer niet en is dijns ghelijc: ende niet en is een ander god sonder dij van allen die wi ghehoert hebben mit onsen oren

21

Want wie is ander als dijn volc israhel: een volc inder aerden tot welken god gereist is op dat hijse verlossen soude ende maken sijn volc ende mit sijnre grootheit ende veruaernissen soude wtwerpen die gheslachten van sijn aensicht dien hij verlost had wt egipten ?

22

Ende du hebste gheset dijn volc israhel dij tot enen volc tot int ewich: ende du here biste gheworden sijn god

23

Hier om here die reden die du nu ghesproken hebste dijnen knechte ende op sijn huys. moet gheuest werden int ewich: ende doe alstu ghesproken hebste:

24

ende dijn naem moet blijuen ende werden groot ghemaect tot int ewich: ende men moet segghen die heer der scaren god israhel: ende dat huys dauid sijns knechtes blijuende bij hem

25

Want du here mijn god hebste ghopenbaert totten ore dijns knechtes. dattu hem timmeren soudste een huys: ende daer om heeft dijn knecht gheuonden betrouwenisse te bidden bij dij

26

Hier om nu heer du biste god ende hebste ghesproken tot dijnen knecht alsoe groten weldaden:

27

ende hebste begonnen te benedien den huse dijns knechtes dattet sal sijn altoes bi dij Want heer wanneer du benedijtste salt benedijt wesen int ewich