Bible in duytsche (Delftse bijbel 1477)

§ Ca .xvi.

1

ENde sij hebben ghebrocht die arke gods ende hebbense gheset int middel des tabernakels welc dauid hoer wtgherect hadde: ende offerden offerhande die men verbrant ende vredelicke offerhande voer god

2

Ende doe dauid vervolt hadde sijn offerhande offerende ghebrande ende vredelike offerhande: ghebenedijde hi tvolc in den naem des heren:

3

ende deilden allen ende eenen yghlic van man tot wijf een coeck brodes: ende een sticke ghebradens ossen vleisch: ende die bloem van tarwen meel ghebacken in olie

4

Ende heeft gheset bi die arche des heren vanden leuiten die dienen souden ende ghedenken sijnre werken: ende glorificieren ende louen den heer god israhel:

5

asaph den prince. ende den anderen sijns zachariam Mer iahihel ende semiramoth. ende iehihel. ende mathathiam. ende eliab. ende banaiam. ende obededom. ende iehihel. op die organen sanctorien ende lieren: mer asaph. dat hij singhen soude in cimbalen:

6

ende banaiam ende azihel priesteren. te singhen metter basunen eweliken bider archen des vreden des heren.

7

In dien daghe heeft dauid ghemaect enen prince om den here te belijden asaph ende sijn broeders.

8

Beliet den heer ende anroept sijnen naem: ende maect bekent inden volken sijn vindinghe.

9

Singt hem ende iubileert hem. ende vertelt alle sijn wonderlike dinghen:

10

louet sijnen heilighen naem: dat herte der gheenre die den heer soken moet verblijden.

11

Soect den heer ende sijn cracht: soect sijn aensicht altoes.

12

Ghedenct sijnre wonderliker dinghen die hij ghedaen heeft: sijnre teyken ende der oerdelen sijns mondes

13

Dat saet israhels sijn knechte: die sonen iacob sijn wtuercoren

14

Hi is die heer ons god: in alle aertrijke sijn oerdelen.

15

Ghedenct inder ewicheit sijnre vorwarden: ende sijnre redeu welc hi gheboden heeft in dusent gheslachten

16

Welc hi ouerdraghen heeft mit abraham: ende sijns edes mit ysaac.

17

Ende hi

[p. *22]

heeft dat gheset iacob in een ghebot: ende israhel in een ewighe vorwairde

18

segghende. Ic sal dij gheuen dat lant chanaan: een bant uwer erfenisse

19

Doe sij waren weinich van ghetal: ende cleyn hoer bouwers

20

Ende sijn ghegaen van volke te volke: ende van den rijke tot een ander volc.

21

Hij en heeft niemant ghelaten hem qualic toe spreken: mer heeft voer hem berispet die coninghen

22

Ende wilt niet roeren mijn ghesalfde: Ende onder mijnen propheten en wilt nyet quaet doen

23

singhet den heer al aertrike: boetscap van daghe te daghe sijn heil

24

Vertelt onder den volken sijn glorie: ende in allen volken sijn wonderlike dinghen

25

Want die heer is groet ende seer loeflic: ende veruaerlick bouen allen goden.

26

Want alle goden der volken sijn afgoden: mer die heer heeft ghemaect die hemelen.

27

Beliinghe ende grootmakinghe bi hem: stercheit ende blijscap in sijn stede.

28

Brengt den heer ghij familie der volken:

29

brenghet den heer glorie ende ghebot: ende heeft glorie sijnen naem. Opboert offerhand ende coemt in sijn aenschijn : ende aenbeedt den heer in heilegher scoenheit.

30

Alle die aerde moet beweghen worden van sijnen aensicht: want hi heeft ghesticht die onroerlike werelt.

31

Die hemelen moete verblijden ende die aerde moet vrolich sijn: ende segghen in den gheslachten die heer heeft gheregneert.

32

Die see moet donren ende hoer volheit: ende die ackeren moeten verblijden ende alle die dinghen die daer in sijn.

33

Dan sullen louen den houten des bosch bijden heer: want hi coemt die aerde te oerdelen.

34

Beliet den heer want hi goet is: want in der ewicheit is sijn bermharticheit.

35

Ende segt : behoudet ons onse behouder: ende vergadert ons ende verlost ons vanden heidenen op dat wi belien moeghen dijnen heileghen naeme: ende verbliden in dinen sanghen.

36

Ghebenedijt sij die heer god israhel van ewicheit hent tot inder ewicheit ende alt volc moet segghen amen ende soeten sanc gode.

37

Ende hi liet daer bider archen desvreden shere asaph ende sijn broeders dat sij dienen souden in teghenwoerdicheit der archen ewelike doer alle daghen ende hoer boerte.

38

Mer obededom ende sijn broeders acht ende sestich hebben gheset obededom den soon ydithun ende osa doerwaerders.

39

Ende sadoch den priester ende sijn broederen priesteren biden tabernakel des heren in den hoghe welc was in gabaon:

40

op dat sij offeren souden offerhande die men al verbrant opt outaer sulker offerhande ewelike des morghens ende des auonts: na alle dinghen die ghescreuen sijn inder wet des heren die hij gheboden heeft israheli.

41

Ende na hem: heman. ende ydithun. ende ander wtuercoren. enen yghelic mit sijnen naem om te belien den heer: want inder ewicheit is sijn bramherticheit.

42

Ende heman ende ydithun singhende mit een basune. ende slaende die cimbalen. ende alle organen der musiken om te singhen den here Mer die sonen ydithun heeft hi ghemaect portiers.

43

Ende al tvolc is weder ghekeert tot sijnen huse

[p. *23]

ende dauid dat hi benedien soude oec sijn huys