Bible in duytsche (Delftse bijbel 1477)

§ Ca .xv.

1

ENde dauid maecte husen inder

[p. *20]

stat dauid: ende timmerde een stede der archen gods: ende recte hoer wt een tabernakel

2

Doe seide dauid. het is ongheorloft dat die arche gods van yemant sal ghedraghen warden: dan van den leuiten die god wtuercoren heeft om die te draghen: ende hoer te dienen in der ewicheit.

3

Ende hi vergaderde al israhel in iherusalem. op dat die arche gods ghebrocht soude werden in hoer stede die hi hoer bereit had:

4

ende die sonen aaron ende die leuiten.

5

Van den sonen caath: was vrihel een prince ende sijn broeders twehondert ende twintich

6

Van den sonen merari: asaia een prince ende sijn broeders twehondert ende dertich.

7

Vanden sonen gerson: iohel ende sijn broeders hondert ende dertich

8

Van den sonen elisaphan: semeias prince ende sijn broeders twe hondert.

9

Van den sonen hebron: elihel prince ende sijn broeders tachtich.

10

Van den sonen ozihel: amiuadab prince ende sijn broeders hondert ende twaelf.

11

Ende dauid heeft gheropen sadoch ende abiathar priesters. ende die leuiten. vrihel asaiam. iohel semeiam elihel ende aminadab:

12

ende seide tot hem. Ghi die sijt princen der familien der leuiten. wart gheheilicht mit uwen broederen: ende brengt die arche des heren gods israhel tot die stede die hoer bereit is:

13

vp dat niet als van beghin want ghi niet teghenwoerdich en waert ons god gheslaghen heeft alsoe nv wat onbetamelics ghescie van den heidenen

14

Hier om so sijn die priesters ende leuiten gheheilicht: dat sij draghen souden die arche des here gods israhel.

15

Ende die sonen leui hebben ghedraghen die arche gods als moyses gheboden had na den woerde des heren op horen scouderen mit grendelen.

16

Ende dauid seide den princen der leuiten. dat sij setten souden van hoeren broeders sanghers in den organen der musiken in nablis ende in liren ende in cimbalen: op dattet gheluyt des vrolicheits soude luden in den hoghen

17

Ende die leuiten setten heman den soon iohel. ende van sijnen broederen asaph enen soon barachie: mer van den sonen merari horen broederen. ethan den soon asaie.

18

ende mit hem hoer broders. In die ander ordinancie. zachariam ende ben ende iazihel ende semiramoth. ende iehihel. ende anheliab ende bananiam ende maasiam ende mathathiaz ende eliphalu ende mareniaz ende obededom. ende iehihel doer waerders.

19

Ende sanghers heman. asaph. ende ethan. in metalen cymbalen gheluyt makende

20

Zacharias ende ozihel ende semiramoth. ende iahihel. ende ani eliab ende maasias. banaias. songhen in instrumenten van twalef snaren die heimelicheit gods.

21

Mer mathathias ende eliphalu. ende macenia ende obededom. ende iehihel. ende ozaziu. in harpen voer een octaue songhen. epinichion.

22

Mer chonemias een prince der leuiten die was bouen die prophecie: ende tot voer te singhen soeten sanc. Want hi was seer wijs.

23

Ende barachias. ende helcana. waren doerwaerders. der archen.

24

Mer sebenias ende iosaphat ende nathanael ende amasai ende zacharias ende banaias ende elieser

[p. *21]

priesteren trompten mit basunen voer die arche gods: ende obededom ende ahias waren doerwaerders der archen

25

Hier om dauid ende alle die meeste van gheboorten in israhel ende die ouerste der gheslachten. ghinghen om te draghen die arche des vreden gods van den huse obededom. mit bliscap.

26

Ende doe god die leuiten gheholpen had die drooghen die arche des vreden gods: doe worden gheoffert seuen stieren ende seuen rammen.

27

Ende dauid was aenghedaen mit een blenkende cleet: ende al die leuiten die drooghen die arche des vredeu ende die sanghers ende chonenias prince der prophecien onder die sanghers. Ende dauid ghecledet was mit een lijnen cleet genoemt ephot

28

Ende al israhel leiden die aeche des vreden gods: in vrolicheiden ende gheluyt der basunen ende mit trompetten ende cimbalen ende sanctorien ende herpen singhende.

29

Ende doe die arche des vreden gods ghecomen was totter stat dauids: michol sauls dochter siende doer een veynster. sach den coninc dauid springende ende speelende: ende versmade hem in hore herten