Bible in duytsche (Delftse bijbel 1477)

§ Capittel .xiiij.

1

ENde hyram die coninc tyri sende boden tot dauid. ende houten van cederbomen ende wercmans der muren ende houten: dat sij hem een huys tymmeren souden

2

Ende dauid heeft bekent dat die heer hem gheuest heeft tot enen coninc op israhel: ende sijn rijc is verheuen op sijn volc israhel.

3

Ende dauid heeft ghenomen ander wijuen in iherusalem: ende heeft ghewonnen sonen ende dochteren.

4

Ende dit sijn die namen der gheenre die gheboren sijn in iherusalem Samma ende sobab nathan ende salomon

5

iebar ende elisu ende eliphaleth.

6

noga ende napheg. ende iaphie

7

elisma eude baliada ende eliphaleth

8

Ende philistijm horende dat dauid ghesaluet was in enen coninc ouer al israhel: clommen sij op alle dat sij hem soeken souden. Doe dat dauid hoerde. ghinc hij wt hem te ghemoet

9

Ende philistijm comende sijn verstroyt inden dale raphaim

10

Ende dauid vraechde raet den heer segghende. Sal ic op climmen tot die philisteen: ende suldise gheuen in mijnre hant? Ende die heer seide hem. Clim op: ende ic salse gheuen in dijn hant

11

Ende doe si op gheclommen waren in baalpharasim: daer sloechse dauid ende seide. God heeft mijn viande ghesceiden doer mijn hant als die wateren gheseiden werden: ende daer om is die naem des stedes gheheiten baalpharasim.

12

Ende si hebben daer ghelaten hoer goden: welc dauid gheboot ghebrant te werden.

13

Ende oec op een ander tijt invielen die philistijm: ende sijn verstroyt inden dale

14

Ende dauid vraechde ander werf god raet: ende god seide hem. Niet en climt op na hem: gaet wech van hem ende ghi sult comen teghen hem teghen die peerboom.

15

Ende als ghi hoert tgheluyt des gheens die gaet in die hoocheit der peerbomen: dan suldi aengaen totten strijde. Want god is wtgegaen voer dij om te slaen die scaren philistijm.

16

Hier om heeft dauid ghedaen als hem god gheboden had: ende heeft gheslaghen die scaren der philistinen van gabaon tot gazera.

17

Ende dauids naem wart gheopenbaert in allen landen: ende god gaf sijnen anxt ouer alle volc