Bible in duytsche (Delftse bijbel 1477)

§ Capittel .xiij.

1

ENde dauid ghinc te rade mit den ouersten der gheslachten ende den heren ouer hondert ende mit alle den princen:

2

ende seide tot alle die scaren van israhel Ist sake dat v behaghet. ende van den heer onsen god wtgaet die reden die ic spreec: laet ons senden tot ons ander broeders in allen landen israhel. ende tot die priesters ende leuiten die wonen inden dorpen der steden. dat sij vergadert warden tot ons:

3

ende wij moghen weder leiden die arche ons gods tot ons. Want wij en hebbense niet ghesocht in den daghen saul.

4

Ende alle die scaer antworde dattet alsoe soude ghescien. want die reden behaghede allen den volke.

5

Doe vergaderde dauid al israhel van syor egipti. tot datmen ingaet emath: dat hi brenghen soude die arche gods van cariathiarim.

6

Ende dauid clam op ende alle man van israhel tot den berch cariathiarim welc is in iuda: op dat si halen souden van daer die arche des heren sittende op cherubin daer sijnen naem wort aengeropen

7

Ende sij hebben ingheset die arche gods op enen nyeuwen waghen van den huse aminadab Ende oza ende sijn broeders dreuen den waghen.

8

Mer dauid ende alle israhel speelde voer god mit alre crachten. in sanghen. in herpen in psalterien in bonghen. in cymbalen ende

[p. *19]

busanen.

9

Mer doe si ghecomen waren tot die hoefsteden chidon reicten wt sijn hant oza dat hi ophouden soude die arche: want een welich ende ketelich osse hadse een wenich gheneycht

10

Hier om is die heer tornich ghewordden teghen ozam. ende heeft hem gheslaghen daer om dat hi die arche roerde: ende hi is daer ghestoruen bi den heere.

11

Ende dauid is bedrooft dat die heer ozam ghesceiden hadde: ende noemde die stede die sceidinghe oze tot desen daghe toe.

12

Ende dauid ontsach god tot diere tijt segghende. Hoe mach ic tot my inleiden die arche gods?

13

Ende om dese sake en brocht hi die arche niet tot hem. dat is in die stat dauid: mer hij afkeerdese in den huys obededom gethei.

14

Ende hier om bleef die arche gods in den huse obededom drie maenden: ende god ghebenedide sijn huys ende al dat hi had