Bible in duytsche (Delftse bijbel 1477)

§ Capittel .xij.

1

ENde dese quamen oec tot dauid in siceleg doe hi noch vloe saul den soon cis: ende dese waren seer starke ende edel vechters:

2

ende booch spannende ende mit beider hant steen warpende mit slingheren: ende ghescutte recht sturende. Van broederen saul wt beniamin

3

Die prince abiezer ende ioas soonen samaa. gabaathites. ende iasihel ende phalleth soonen asmoth. ende baracha ende iehu anathotites.

4

ende samaias gabaonites. die starcste onder dertich ende bouen dertich: ieremias ende iezihel ende iohannan. ende iesabad gaderothites.

5

ende luzai ende ierimuth ende baalia ende samaria ende saphatia

[p. *17]

araphites.

6

Helcana ende iesia. ende azrahel ende ioezer ende iesbaam van careim.

7

ende ioela ende zabadia sonen ioroam van gedor.

8

Mer ende oec van gaddi sijn ouergheuloon tot dauid doe hi scuylde in die woestenye. seer starke mannen ende alre beste vechters: scilt houdende ende speer. hoer aensichte als eens leuwen aensicht: ende snel als reecaluen inden berghen.

9

Ezer een prince: obdias die anderde. eliab die derde.

10

masmana die vierde. ieremias die vijfte.

11

ethi die seste. heliel die seuende.

12

iohannan die achste. helzebad die neghende.

13

ieremias die tiende. bachanai die elfte

14

Dese waren vanden sonen gad: princen des heers. Die leste was bouen hondert dusent: ende die meeste dusent.

15

Dese sijn die ouerghingen die iordanen inder ierste maent als sij plach in te vloeyen bouen haer wallen: ende veriaechde alle die woonden in den dalen totten oosten ende ten westen regioen.

16

Ende van beniamin ende van iuda sijn ghecomen totter bescermenisse in welken dauid woonde.

17

Ende dauid is wtghegaen hem te ghemoet ende seide. Ist sake dat ghi vredelike sijt ghecomen tot my. dat ghi mij helpen wilt: mijn hert sal verenighen mit v. Mer ist sake dat ghi mij verlaghet voer mijne vianden. want ic gheen boosheit en heb in mijnen handen: god onser vaderen moetet sien ende oirdelen.

18

Ende die gheest des heren aendede abisai een prince onder dertich ende seide. O dadauid wi sijn dijn: ende mit di o soon isai. vrede vrede sij dij: ende vrede dijnen hulperen. want dijn god sal dij helpen Ende dauid heeftse ontfanghen: ende ghemaect princen eenre scaren.

19

Mer van manasse oeuer sijn ghegaen tot dauid doe sij quamen met philistijm teghen saul dat hi strijden soude ende hi en street niet mit hem: want die princen de philisteen ginghen te rade ende seynde hem weder segghende Mit perikel ons hoefdes sal hi weder keren tot sijnen heer saul.

20

Ende doe hij weder ghekeert was in siceleg sijn ouerghegaen tot hem van manasse ednas ende iosabab ende iedihel ende michahel ende ednas ende iosabath ende heliu ende salathi princen der ridderen in manasse.

21

Dese ghauen hulpe dauid teghen die mordenaers. want het waren al sterke mannen: ende sijn ghemaect princen in dat heer

22

Mer oec alle daghen quamen tot dauid. om hem te hulpen: hent datter wart een groot ghetal als een heer gods

23

Ende dit is tghetal der princen des heers die ghecomen sijn tot dauid doe hi was in ebron: op dat sij ouer draghen souden dat rijck van saul tot hem na den woerden des heren

24

Die sonen iuda draghende scilt ende speer: ses dusent ende acht hondert toeghemaect ten stride.

25

van den sonen symeon: seer starcke mannen te striden seuen dusent ende hondert

26

van den sonen leui: vier dusent ses hondert.

27

Ende ioiada die prince van den gheslachte aaron: ende mit hem drie dusent seeuen hondert.

28

Oec sadoch een kijnt van edelre scickenisse tot doechden: ende tghesin sijns vaders princen twe ende twintich.

29

Mer van den soonen beniamin

[p. *18]

sauls broederen: drie dusent. want een groot deel hore volchden noch den huse saul.

30

Mer van den sonen ephraim twintich dusent achthondert: seer starcke van crachten. ende vernoemde mannen in horen gheslachten.

31

Ende vanden halue gheslachte manasse achtien dusent: elc bi namen sijn ghecomen dat sij maken souden dauid coninc

32

Ende vanden sonen ysachar gheleerde mannen die wisten alle tijden te ghebieden wat israhel doen soude: twe hondert princen Mer al ander ghesacht. volchden hoeren raet.

33

Ende van zabulon die wt ghinghen te stride ende stonden inden scaren gheleert ter wapen vijftich dusent sijn ghecomen in een hulpe: niet in dubbelre herten

34

Ende van neptalim dusent princen: ende mit hem seuen ende dertich dusent gheleert ten strijde mit scildt ende mit speere.

35

Van dan oec bereit ten strijde: acht ende twintich dusent ses hondert

36

Ende van aser wtgaende ten stride ende inden strijde verweckende viertich dusent

37

Ende ouer die iordaen vanden sonen ruben ende van gad. ende van den haluen deel des gheslachtes manasse: gheleert ter wapen. hondert ende twintich dusent.

38

Alle dese stridende mannen wacker te vechten mit volcomender herten. sijn ghecomen in ebron: dat si setten souden dauid coninc ouer al israhel Ende alle die ander wt ilrahel waren van eenre herten dat dauid soude werden coninc:

39

ende si waren daer bi dauid drie daghen etende ende drinkende. Want hoer broeders haddent hem bereit.

40

Ende die bi hem waren hent tot ysachar ende zabulon ende neptalim. brochten oec broden mit eselen ende camelen ende mulen te eten: meel vighen rasijnen wijn oli ossen ende weren: tot al die scaren Want blijscap was in israhel