Bible in duytsche (Delftse bijbel 1477)

§ Capittel .xi.

1

HIer om is vergadert al ysrahel tot dauid in ebron segghende dijn been sijn wij: ende dijn vleisch

2

Ende ghisteren ende eerghisteren doe saul noch regneerde: waerste du die wtleideste ende in leideste israhel. want god dijn heer heeft dij geseit. Du sulste voeden mijn volc israhel: ende du sulste wesen een prince ouer hem.

3

Ende alle die ouders van israhel quamen totten coninc in hebron: ende dauid maecte mit hem een vorward biden heer. Ende si salfden hem conic ouer israhel: nader reden des heren die hi ghesproken had inder hant samuel.

4

Ende dauid is ghegaen ende al israhel in iherusalem. Dit is iebus: daer waren iebusei in woenre des lants.

5

Ende die woenden in iebus seiden tot dauid Du en sulste niet in gaen herwarts. Mer dauid wan dat hoochste van iherusalem syon: welc is die stat dauids.

6

Ende seide. Alle die slaet iebuseum in den eersten: sal wesen prince ende hertoch. Hier om clam op ten iersten ioab een soon saruie. ende is ghemaect prince.

7

Ende dauid woende in der hoecheit: ende daer om is sij ghenoemt die stat dauid

8

Ende hij timmerde een stat inden omganc van mello totten omganc. Ende ioab timmerde die ander plaetsen der stat.

9

Ende dauid vorderde gaende ende wassende: ende die heer der scaeren was mit hem

10

Dit waren die princen der sterke mannen dauid die hem holpen dat hij coninc wart ouer al israhel. na den woerden des heren dat hi ghesproken heeft tot israhel:

11

ende dit is tghetal der sterken dauid Iesbaan een soon ahamoni: een prince onder dertich. Dese boerden op sijn speer op drie hondert ghewonden op eene tijt.

12

Ende na hem eleasar sijns oems soon ahoites: die was onder drie machtighe.

13

Dese was mit dauid in aphec des heren: doe philistijm vergadert waren tot die stede in den strijt Ende het was een acker des landes. vol garste: ende dat volc vloe vanden aenschijn der philistijnen

14

Dese stonden int middel des ackers: ende be: scermden dien. Ende doe sij ghesclaghen hadden die van philistijm: heeft god ghegheuen grote salicheit sijnen wolc.

15

Want drie. van dertich princen clommen neder totten steen in welken was dauid tot die spelunke odollam: doe die van philistijm hoer borghen gheset hadden in den daele raphaim.

16

Ende dauid was inder bescerminghe: ende die stacie der philisteen in bethleem

17

Ende dauid heeft begheert: ende seide Och ofter yemant my ghaef water vanden put bethleem: die inder poorten is

18

Hier om sijn dese drie ghereist doer middel der scaren philistijm ende putten water van den putte bethleem. die was inder poorten: ende brochtent tot dauid dat hi drinken soude. Ende hij en woude nyet drincken: mer offerde dat water den heer

19

segghende. het moet veer van mij wesen dat ic int aenscijn mijns heren sal drincken dat bloet deser mannen: want in perikel hoors leuens hebben sij mij water

[p. *16]

ghehaelt. Ende om dese saec en woude hij niet drinken Dit hebben ghedaen die drie alre stercste.

20

Ende abisai ioabs broeder dese was prince van den drien: ende hij boerde op sij speer teghen drie hondert ghewonden: ende hij was onder drien meest ghenoemt:

21

onder drien danderde: edel ende hoer prince. Mer hi en quam niet totten drien iersten.

22

Banaia een soon ioiade des alre stercste man die veel wercken ghedaen heeft van capsehel: hij slooch twe arihel ende moab. Ende hi clam neder ende dode enen leuwe int middel des puttes inder tijt des snees:

23

ende hi slooch enen egipschen man. die lanc was vijf cubiten: ende hadde een glauie als een garenboom der weuers. Ende hi is neder gheclommen tot hem mit een roede: ende benam hem sijn speer dat hi hielt mit sijnre hant: ende sloech hem doot mit sijn speer.

24

Dit heeft ghedaen banaia een soon ioiade. die was onder den drien stercken die alre vernoemste:

25

ende onder den dertighen die eerste. Nochtans en quam hi niet totten drie eersten. Ende dauid setten hem tot sijn oor

26

Mer die stercste mannen dauid in dat heer: asahel een broder ioab. ende eleanan sijns oems soon van bethleem:

27

sammoth arodites. hellesplonites.

28

iras een soon acces thecuites. abiezer. anathotites.

29

sobochai vsatites. ilaia hotites.

30

marai nethophatites. heleth een soon baana nethophatites.

31

ethai een soon ribai van gabaath der sonen beniamin: banaia pharatonites.

32

hurai vander beeck gaaz: abiel arabthitesa. azmoth bauranites. eliaba salabonites.

33

die sonen assen gezoni. ionathan een soon saie ararithes.

34

ahiam een soon sachar ararithes.

35

eliphal een soon vr:

36

epher meherathites. ahia phellonites.

37

ezro carimelites naarai een soon azbi:

38

iohel een broeder nathan. mibaar een soon agarai.

39

selech ammonites. naarai berotites die wapendragher ioab des soons saruie:

40

iras iethreus. iareb iethreus.

41

vrias hetheus: zabad een soon ooli:

42

adyna een soon sechar rubenites een prins der rubeniten. ende mit hem dertich.

43

haanan een soon macha. ende iosaphat mathanites.

44

ozias astharothites. semma ende iahihel soonen hothan araorites.

45

iedihel een soon zamri ende ioha sijn broeder thosaites.

46

helihel mahumites. ende ieribai ende iosoia sonen elnaem. ende iethma moabites. elihel ende obed ende iasihel van masobia