Bible in duytsche (Delftse bijbel 1477)

§ Capi .x.

1

PHilistijm streden teghen israhel: ende die mannen israhel vloen die palestijnen: ende vielen ghewont inden berch gelboe.

2

Ende doe die philistei naecten veruolghende saul ende sijn sonen: sloghen sij doot ionathan ende aminadab ende melchisue die sonen saul.

3

Ende die strijt is beswaert teghen saul: ende die scuts hebben hem gheuonden. ende ghewont mit horen pilen

4

Ende saul seide tot sijnen wapendragher Trec dijn swaert wt die sceide ende slaet my doet: op dat niet en comen dees onbesneden ende bespotten my Mer sijn wapendragher en woude des niet doen: van anxte veruaert Hier om greep saul sijn swaert: ende viel daer in.

5

Doe dat sijn wapendragher sach als dat saul doot was: viel hij oec in sijn swaert ende is ghestoruen

6

Ende saul is ghestoruen ende drie sijn sonen: ende al sijn huysghesin is te samen gheuallen.

7

Doe dat saghen die mannen van ysrahel die woonden in den velden si vloen. ende doe saul ende sijn sonen doot waren lieten sij hoer steden ende sijn hier ende daer verstroit: ende die philistijm quamen ende woonden inden steeden.

8

Ende inden anderen daghe toghenn of die philistei die rouen der gheenre die gheslaghen waren: ende vonden saul ende sijn sonen legghende inden berch gelboe

9

Ende doe si hem beroeft hadden ende sijn hoeft afghesneden. ende bloot ghemaect van sijnen wapenen: sende sij hem in hoer lant dat hi soude werden omghedraghen ende ghetoont den templen der afgoden ende den volken

10

Ende sijn wapen offerden sij inden tempel hoers gods: ende sijn lichaem nagelden sij in den tempel dagon

11

Doe dat hoerden die mannen iabes galaad alle die dinghen die de philistijn ghedaen hadden op saul:

12

stonden tsamen op alle sterke mannen. ende namen die dode lichamen saul ende sijnre sonen: ende brochtense in iabes. ende groeuen die ghebeente onder een akerboom die was in iabes: ende si vasteden seeuen daghen.

13

Ende saul is ghestoruen om sijn boosheiden: want hi ouerghetreden had dat ghebot des heren dat hi gheboden had ende dat niet bewaert en heeft: mer heeft oec raets ghevraecht phitonissam

14

ende en heeft niet ghehoopt inden heere ende daer om heeft hi hem ghedoot: ende

[p. *15]

heeft ouer gheset sijn rijc tot dauid soon ysai