Bible in duytsche (Delftse bijbel 1477)

§ Capittel x.

1

IN tyrus sconincs van persen derde iaer so wort daniel die ghetoenaemt was balthasar een woert vertoent: ende het was een waer woert ende grote starcheit: ende hi verstont die redene. Want in visioen is verstandenisse te doen.

2

In dien daghe so weende ic daniel die daghen van drie weken

3

ic en at ne gheen begheerlijc broet: ende vleysch noch wine en quam in mijnen mont. Noch ic en wort oec niet ghesaluet mit saluen: vore dat veruolt worden die daghen van drie weken.

4

Want inden vier ende twintichsten dage vander eerster maent soe was ic neuen een grote riuiere dat was tigris.

5

ende ic hief mijne oghen op ende ic sach. Ende sich enen man ghecleet mit linen clederen ende sijne lendene waren bouen gegort mit blinckenden goude

6

ende sijn lichaem was ghelijc ene crisolite stene ende sijn gesichte was als die ghedaente eenre blixeme: ende sijn oghen waren als een barnende lampe: ende sijn armen ende datter beneden was totten voeten was ghelijc blickende latoen: ende tgheluyt van sijnre talen was als een menichfoudich gheluyt.

7

Ende ic daniel sach dit visioen alleen: want die mannen die mit mi waren en sagens niet: mer op hem viele een alte grote anxte ende sij wouden hem berghen.

8

Mer ic bleef daer alleen ende ic sach dit grote visioen: ende ne ghene macht en bleef in mi: mer mine ghedaente verwandelde oec in mi: ende ic verdroghede ende ic en had ne ghene macht.

9

Ende ic hoerde dat gheluut van sinen woerden: ende doe icken hoerde so lach ic ter neder op mijn aensichte: ende mijn aensichte lach an die aerde.

10

Ende sich een

[p. *666]

hant taste mi: ende si rechte mi op mijn knyen ende opten vingheren van minen handen.

11

Ende hi seide tot mi. Daniel man vanden begeerten verstant die woerden die ic tot di spreke: ende stant op dijn bene. Want ic ben nv ghesonden totti. Ende doe hi mi dese reden had geseit soe stont ic al beuende:

12

ende hij seide tot mi: Daniel en wilt niet ontsien: want vanden eersten dagen dattu dijn herte settes. om te verstaen ende om dattu di quellen soutste in dijns heren aenscouwen. so sijn dijn woerden gehoert. ende ic bin ghecomen om dijne redenen

13

Mer die prince vanden rike van persen heeft mi wederstaen een ende twintich daghen: ende sich michael een vanden eersten princen is gecomen in mijnre hulpen: ende ic bleef daer neuen den coninc van persen.

14

Mer ic bin ghecomen om dat ic di leren soude wat dijn volc toecomene is inden achtersten daghen want noch so is tvisioen in daghen.

15

Ende doe hi mi aensprac mit desen woerden: so liet ic mijn aensichte nederuallen in die aerde. ende ic sweech.

16

Ende sich als een ghelijc van enen mensche soe taste hi mine lippen: ende ic ondede minen mont ende sprac. ende ic seide tot hem die ieghen mi stont. Here mijn in dijn visioen soe sijn mijn leden ontbonden: ende niet crachtichs en is in mi gebleuen.

17

Ende hoe sal ic mijns heren knecht moghen gespreken mit minen here? Niet crachtichs en is in mi gebleuen: mer mijn adem wort oec ghecort.

18

Ende echter soe tastede hi mij als eens menschen ghelikenisse: ende hi verstoute mi

19

ende seide. En wil niet ontsien man der begeerten. paeys si mit di: worde vroem ende wes sterc. Ende doe hi mit mij sprac: so nam ic hart ende seide Spreect here mijn: want du hebste mi verstarct

20

Ende hi seide. Weetstu niet waer om dat ic totti ghecomen bin? Ende nu sal ic wederkeren om te striden ieghen die prince van persen. Mer doe ic wt quam so openbaerde die prince van grieken comende.

21

Mer nochtan sal ic di seggen dat verclaert is inder scrifturen der waerheit: ende in allen desen en is niemant mijn hulper: sonder mychael v prince