Bible in duytsche (Delftse bijbel 1477)

§ Cap .ix.

1

IN darius sconincs assuerus zoens eerste iaer die van diere van meden zade was die regneerde bouen der caldeeuscher rike

2

int eertste iaer van sijnen rike. Soe verstont ic daniel inden boken vanden iaren daer sheren redene afghedaen was tot iheremiam den prophete. dat die tseuentich iaren van iherusalems bedroeftheden voldaen souden worden.

3

Ende ic sette mijn aensicht totten here mijnen god om te bedene ende te biddene in vastenen in sacke ende asschen:

4

ende ic bad den here god: ende belieden ende seide. Ic bid de here grote god ende veruaerlijc die wachtes belofte ende ontfermicheit den genen die dij minnen ende die wachten dijn gheboden:

5

wi hebben ghesondicht ende quaet ghedaen ende ongherechtelijc gewracht: ende wi sijn wech ghegaen ende afghekeert van dijnen gheboden ende van dinen vonnissen.

6

Wi en hebben niet ghehoersaem gheweest dijnen knechten der propheten die onsen coningen ghesproken hebben in dijnen name ende onsen princen ende onsen vaders ende alden volcke vanden lande.

7

Here in di is gherechticheit: mer ons is huden bescamenisse van aensichte alsoe alst huyden is den man van iuda ende den ghenen die in iherusalem wonen ende al israhel: ende alden ghenen die bij sijn ende verre in alle die werlt daer toe dattuse verdreuen hebtste om haerre quaetheden daer si mede ieghen di ghesondicht hebben here.

8

Dus is die

[p. *664]

scamenisse vanden aensichte: onse coninghen ende onse princen ende onse vaders die di ghesondicht hebben.

9

Mer in di onsen here is ontfermherticheit ende guedertierenheit want wi sijn van di ghegaen:

10

ende wi en hebben niet ghehoert sheren ons gods stemme dat wi wandelen souden in sijn wet die hi ons geset heeft biden propheten sijnen knechten:

11

ende al israhel heeft dine wet te broken ende si hebben hem afghekeert dat si dijn stemme niet horen en souden: ende op ons is gheuallen die malediccie ende achterdele die ghescreuen sijn in moeyses gods knechts boec om dat wi di ghesondicht hebben.

12

Ende hi heeft sijn redene die hi ghesproken heeft op ons geset ende op onsen princen die ons geuonnist hebben: om dat si iegen ons inbringhen souden groet quaet alsoe groet als noeyt enich was onder alle den hemel. dat ghedaen is in iherusalem

13

also in moeyses wet ghesereuen is Alle dat quaet is op ons ghecomen. Ende wi en hebben dijn aensicht niet ghebeden here onse god. so dat wi bekeren souden van allen onsen misdaden: ende dat wi dijne waerheit pensen souden

14

Ende die here is ontwaect op die quaetheit: ende hi heeftse op ons ghebracht. Die here onse god is gherechtich: in al sijnen wercken die hi ghedaen heeft Want wi en hebben sine woerden niet ghehoert.

15

Nu onse god here die in starcker hant dijn volc leideste vten lande van egipten ende die di enen name ghemaect hebtste alsoet in desen daghen is. wi hebben ghesondicht here wi bebben ongherechtelijc ghedaen ieghen alle dine gherechticheit.

16

Ic bidde dat dijn gramscap ende dijn toern moet worden ghekeert van dijnre stat iherusalem ende van dijnen heylighen berghe Want om onse sonden ende om die ongherechticheit onser vaderen: so sijn in lachtere iherusalem ende dijn volc al den luden die omtrent ons sijn.

17

Mer nv onse here onse god ghehore dijns knechtes orisoen ende sijn bedinghe: ende vertone dijne aensichte op dijne sanctuarie dat gewoest is. Mijn god om dijns selfs wille

18

helde neder dijne oren ende hore: ondoch dijne oghen: ende besich onse droefheit: ende diere stat daer wij dijnen name aenropen Want in onsen gherechticheden en stortten wij onse bedinge voer dijnen aensichte niet: mer wi doent in dine grote ontfermherticheden.

19

Ghehore here: worde gepaeyst here: verstant ende docht mijn god en ontbeide niet om dijns selfs wille: want dijnen name is aengheropen op dine stede ende op dijne volc.

20

Doe ic noch sprac ende bede ende belyede mijn sonden ende mijns volcs sonden van israhel dat ic mine bedinghe stortten soude in mijns gods aenscouwen voer mijns gods heyligen berge:

21

doe ic noch sprac inder bedinghe: sich so quam haestelijc te mi gheuloghen die man gabriel dien ic vanden beghinne inden visioen gesien hadde ende hi taste mi inden tide vanden auont offerhande:

22

ende hi leerde mi ende hi sprac te mi. Ende hi seide. Daniel: ic bin nv wtcomen om di te leeren ende om dattuut verstaen soutste.

[p. *665]

23

Vanden beghinne dijnre bedinghe soe is die reden wtghegaen. Want ic bin ghecomen om dat icti segghen soude: want du biste een man der begheerten Daer om mercke die redene ende verstant tvisioen.

24

Tseuentich weken sijn ghecort op dijn volc: ende op dine heylige poerte dattie ouerdaet wort gheeynt ende dat die sonde eynde nemen: ende dat die misdaet afghedaen sal worden: ende dat toe sal worden ghebracht die ewighe gherechticheit ende dat veruolt sal worden tvisioen ende die prophecie: ende dat sanctum sanctorum sal worden gheconsacreert.

25

Daer om sultstu weten ende mercken vanden wtganghe der redenen: dat iherusalem sal weder worden ghesticht tot cristum den prince seuen weken ende tsullen wesen twee ende tseuentich weken: ende men sal echter die strate maken ende die muren. in verdrieten tiden.

26

Ende na twee ende tseuentich weken salmen cristum doden: ende ten sal sijn volc niet wesen dat hem lochenen sal. Ende tvolc mit sijnen toecomenden leidtman sal die stat destrueren ende die sanctuarie ende woestheit sal sijn eynde wesen. ende na dat einde vanden stride sal die gedurige woestheit wesen.

27

Mer die een weke sal vele luden die belofte vastmaken: ende in midden der weke sal gebreken der offerhande ende sacrificie. Ende inden tempel sal wesen die onwaerdicheit van bedroeftheden: ende totten wtgange ende den eynde sal dese woestheit gheduren.