Bible in duytsche (Delftse bijbel 1477)

[p. *662]

Capittel .viij.

1

IN bathasar sconincs derde iaer van sijnen rike. so openbaerde mi een vysyoen. Ic daniel na dat ic inden begin ghesien had

2

so sach ic in mijnen visioen doe ic in die borch susis was dat in die stat van helam is: want ic sach in minen visioen dat ic was op die poerte vlay:

3

ende ic hief mijne oghen op ende ic sach. Ende sich enen ram stont vore tbroec die lange hoernen had: ende die ene was hoger dan dandere ende opwassende.

4

Daer na sach ic desen ramme wendende mitten hoernen ieghen toeste: ende ieghen tnoerden: ende ieghen tsuden: ende alle beesten en mochten hem niet wederstaen noch worden verlost van sijnre hant Ende hi dede na sijnen wille ende hi wort verheuen.

5

Ende ic verstont. Mer sich enen boc vanden gheyten quam van westwaerts bouen taensichte van alden lande: ende hi en ghenaecte den lande niet Want dese boc hadde tusschen sijne oghen enen schonen hoerne.

6

ende hi quam tot dien ghehorenden ram dien ic hadde sien staende vore die poerte: ende hi liep te hem inden bedrusche sijnre starcheit.

7

Ende doe hi biden ram ghecomen was soe voere hij op hem: ende stac den ram ende brac sijn twee hoernen: ende dien ram en mochten niet wederstaen. Ende doe hine ter aerden ghestoten hadde so vertrat hien. ende nyemant en mochte den ram verlossen van sbocs hant.

8

Mer die boc vanden gheyten wort sere groet. Ende doe hi ghewassen was so wort die groete hoorne gebroken: ende onder dien hoerne resen vier hoernen ten vier winden waert des hemels.

9

Mer vanden enen van dien hoernen soe quam ene cleyne hoernekijn wt: ende hi wort groet ieghen tsuden ende iegen dat oeste ende ieghen die starcheit

10

Ende hij wort verheuen totter starcheit des hemels: ende hi warp vander starcheit neder ende vanden sterren ende hi vertratse

11

ende hi verhief hem totten prince der starcheit. Ende hi nam van hem die eenpaerlike sacrificie ende hi warpe auerecht die stat sijnre heylicheit.

12

Want die macht ieghen die eenpaerlike sacrificie is gegheuen om die sonden: ende die waerheit sal in die aerde neder gheworpen worden ende hi salt doen ende voertganc hebben.

13

Ende ic hoerde ene vanden heylighen spreken: ende een heylich seide enen anderen: ic en weet niet wie dien sprac Hoe langhe sal tvisioen ende die eenpaerlike sacrificie ende die sonde der bedroeftheit die ghedaen is: ende die sanctuarie ende die starcheit worden vertreden.

14

Ende hi seide hem totten auonde ende tot smorghens twe dusent daghe ende drie hondert ende men sal die sanctuarie suueren.

15

Ende het gheschiede doe ic daniel tvisioen sach ende ic die verstandenisse vraghede: sich so stont in mijnen aensconwen als die gelikenis eens mans.

16

Ende ic hoerde des smans stemme tusschen vlay: ende hi riep ende seide. Gabriel doe desen tvisioen verstaen.

17

Ende hi quam: ende stont daer neuen daer ic stont. Ende doe hi ghecomen was so eysede ic mi ende viel op mijn aensichte. Ende hi seide tot mi: Menschen soen verstant Want inden tide des eyndes soe sal

[p. *663]

tvisioen voldaen worden.

18

Ende doe hi te mi sprac: so viele ic langs op die aerde. Ende hi taste mi ende hi sette mij in mijnen ganc:

19

ende hi seide mi. Ic sal di tonen dat toecomen sal int eynde: want die tijt der maledictien heeft sijn eynde..

20

Die ram die du die hoernen saechste hebben dats die coninc van meden ende van persen.

21

Mer die boc vanden geyten. is die coninc van griecken. ende die grote hoerne die tusschen sijn oghen was dat is die eerste coninc.

22

Mer doe die hoerne ghebroken was datter vier verrees voer hem: dats dat vier coningen van sijnen luden sullen verrisen mer niet in sijnre starcheit.

23

Ende nae haer rijc als die quaetheden sullen ghewassen sijn. so sal verrisen een onnutte coninc van aensichte ende verstandel dre voersettinghe:

24

ende hi sal machtich worden mit dies conincs crachte mer niet in sijns selfs starcheit: ende bouen datmen gelouen soude. so sal hi alle dinc woesten ende hi sal voertganc hebben ende sal doen Ende hi sal dootslaen die starcke ende tvolc der heylighen na sijnen wille:

25

ende bedriech sal wesen in sijn hant ende hi sal sijn herte verheffen. ende in die oueruloyentheit van allen dingen sal hi vele luden doden. Ende hi sal opstaen ieghen die prince der princen ende sonder hant sal hi worden vertreden.

26

Ende dit visioen van sauonts ende smorghens welc geseit is is waer. Daer om so beteykene du dit visioen: want hi sal na vele daghen wesen.

27

Ende ic daniel was sieck ende quelde vele daghen. Ende doe ic opgestaen was so maecte ic sconincs wercken. ende ic verwonderde vanden visioen. ende nyemant en was diet ontbant