Bible in duytsche (Delftse bijbel 1477)

§ Capit .vij

1

IN balthasar sconincs van babilonien eerste iaer soe sach daniel enen droem Want hi sach tvisioen sijns hoefts op sijn bedde ende hij screef den droem ende beuincken mit corter redene: ende begrepen tenen hope.

2

Ic sach bi nachte in minen visioen: ende sich die vier winden des hemels vochten in die grote zee:

3

ende vier grote beesten quamen op vter zee ende waren ongelijc dene na dandere.

4

Die eerste was ghelijc eenre leeuwinnnen: ende hi hadde aerns vloghelen. ic sach tot dat haer vlogelen afgesneden waren ende tot dat si wech was ghedaen vanden lande: ende si stont op voeten als een mensche. ende haer herte wort haer ghegeuen.

5

Ende sich een ander beeste ghelijc een beer in een deel stont: ende drie ordinancien waren in sinen mont ende in sinen tanden: ende si seiden hem aldus. Stant op ende eet veel vleysches.

6

Hier nae sach ic ende sich ene andere beeste gelike enen lupaert ende si had vier vloghelen op haer ghelijc eens voghels. Ende vier hoefden waren op die beeste: ende haer wort macht ghegheuen.

7

Hier na sach ic inden visioen vander nachte: ende sich die vierde beeste was veruaerlijc ende wonderlijc ende seer starc. Si had oec grote yseren tanden: etende ende ontween bitende. ende dat haer ouerbleef vertrede si mitten voeten. Si was onghelijc den anderen beesten die ic ghesien hadde voer haer ende si hadde thien hoernen.

8

Ic mercte die hoernen: ende sich een ander cleyn hoornekijn rees in die middewaert van dien hoornen: ende drie vanden eersten hoornen worden wtghestoten vandes cleyns hoernekijns aensichte. Ende sich in dit hoornkijn waren oghen ghelijc menschijn oghen ende enen mont wasser an die grote dinghen sprac.

9

Ende ic sach tot dat die tronen gheset waren ende tot dat die oude van daghen sat Sijn cleet was wit als die snee: ende dat haer sijns hoefts als suuer wolle Sijn trone was een vlamme vyers: ende sijn wielen vyerich barnende

10

een vyerige riuiere ende wreet quam wt sinen aensichte. Dusent dusentighe dienden hem: ende thien hondert dusent stonden bi hem Tvonnnisse sat: ende die boken worden ondaen.

11

Ic sach om die stemme van den groten redenen die dese horen sprac Ic sach dattie beeste dootghesleghen was ende hoer lichaem soude vergaen.

[p. *661]

ende dat si gheleuert was om te verbarnen mitten vyer:

12

ende der andere beesten machte wort oec wech ghedaen ende hem waren gheset tiden des leuens totten tide ende den tide.

13

Dus ansach ic inden visioen snachts: ende sich het quam als eens menschen sone mitten wolcken des hemels. ende hi quam totten ouden van dagen: ende si brachtene in sijn aenscouwen.

14

Ende hi gaf hem die machte ende die ere ende trike: ende al tvolc van gheslachten ende van tonghen sullen hem dienen. Sijn macht is ewelijc macht diemen uiet nemen en mach. ende sijn rijc datmen niet scoren en mach.

15

Mijn gheeste vereysde hem. Ic daniel wort veruaert in desen dinghen ende die visioene mijns hoefts vernederden mij.

16

Ende ic ghinc tot enen die daer bi stont: ende ic vraechde die waerheit van hem van allen desen dinghen. Ende hi seide mi die betekenisse vanden redenen: ende hi leerdet mi

17

Dese vier grote beesten: sijn die vier riken die vander werelt verrisen sullen.

18

Want des alre hoechste gods heylighen sullen trike ontfaen: ende si sullen trike behouden tot inden eweliken ende ewelijc ende emmermere.

19

Hier nae woude ic naerstelijc leren vander vierder beesten: die seer ongelijc was van allen ende seer yselijc. Haer tanden ende haer nagelen waren yseren: si at ende si brac: ende dandere vertrede sij mit haren voeten.

20

Ende vanden thien hoernen die si had opt hoeft ende van dien ander hoerne die daer onder rees. ende daer die drie hoerne voer vielen: ende van dien hoerne die oghen had ende enen mont grote dinghen sprekende: ende hi was meerre dan dandere.

21

Ic sach. ende sich die hoerne maecten strijt ieghen den heylighen. ende hi was machtiger dan si:

22

tot dat die oude van daghen quam. ende dat hi tfonnisse gaf des hogen heyligen ende dattie tijt toe comen was: ende die heylighen behielden trike.

23

Ende hi seide aldus. Die vierde beeste. sal sijn tvierde rike int lant dat meerre sal wese dan alle riken: ende het sal al tlant verslinden: ende het salt vertreden ende breken.

24

Mer die thien hoernen sullen thien coninghe wesen van dien rike. ende een ander sal na hem verrisen ende hi sal machtigher wesen dan die eerste: ende hi sal die drie coninghen tonder doen.

25

Ende hi sal redenen spreken ieghen den hoghen god: ende hi sal des heylichs gods heylighen vertreden. Ende hi sal wanen dat hi die tiden sal moghen verwandelen ende die wette: ende si sullen in sijnen handen gheleuert worden tot enen tide ende tiden ende tot enen haluen tide.

26

Ende tvonnisse sal sitten om datmen hem die machte nemen sal ende datmen vertreden sal ende dat hi veruareu sal tot inden eynde.

27

want trike ende die machte ende die groetheit vanden rike die onder alle den hemel is. sal worden ghegheuen den volcke van des hoghes heylighen. wies rijc ewelijc rijck is. ende alle coninghen sullen hem dienen ende gehorich sijn.

28

Tot hier is tende vanden woerde Ende ic daniel wort sere veruaert in mijnen gepensen: ende mijn aensichte wort verwandelt in mi. mer ic behilt twoert in mijn herte