Bible in duytsche (Delftse bijbel 1477)

§ Ca .xiij

1

INde hondertsten ende negen ende veertichsten iaer vernam iudas dat anthiochus eupators quam mit eenre menichte teghen iudeam:

2

ende dat lysias den procuroer ende prouoest van besorghinc mit hem was. ende hi had mit hem voetuolghers hondert dusent ende thien dusent. ende vijf dusent geredenen. ende twee ende twintich elyphanten: ende drie hondert waghenen mit crommen sprieten.

3

Ende menelaus menghede hem mit dien: ende mit groter valcheit badt hi anthiochum niet om die salicheit van sinen lande: mer hi hoepte datmen hem prince setten soude vanden papen.

4

Mer die coninc der coningen verwecte anthiochus herte tegen den sondaer: ende om dat lysias seyde dat dese die sake was van allen quaden saken: so beual hi als haer gewoente is datmen vaen soude. ende op die selue stat doden.

5

Ende te dier seluer stat was enen toren vijftich cubitus hoghe daer al omme ende omme lach assche vergadert.

6

Ende daer nae dede die coninc desen sacrilegien werpen in die assche ende alle die luden horten ter dootwaert

7

Ende mit deser wet gheuiel den breker der wet te steruen: ende menelaus die en wort der aerden niet gegeuen.

8

Want dit was recht genoech. Want om dat hi veel misdade gedaen hadde omtrent gods outaer wes vyer ende assche heilich waren: daer om wort hi inder assche doot ghedoemt.

9

Mer die coninc was vercocht mit gedachte dat hi quam om hem scalcker te toghen ten ioden waert dan sijn vader dede.

10

Ende doe iudas dit vernam soe beual hi den volcke dat si dach ende nacht anropen souden den here dat hi hem nv holpe also als hi altoes dede:

11

want si ontsaghen hem dat mense rouen soude der wet ende des lants ende den heiligen tempel: ende dat hi niet ghedogen en soude dat sijn volc weder gheleuert worde den blasphemerers. dat een luttel hercomen was.

12

Ende doe si dit alle te gader daden ende si drie dagen op die aerde met gheween ende mit vasten baden vanden here ontfermicheit: soe riet hem iudas dat si hem gereiden.

13

Want hi pensde mitten ouders. dat hi wttrecken soude eer die coninc theer brenghen soude in iudea. ende eer hi die stat wonne: ende at hi dat eynde vander dinc beuelen soude indes heren vonnisse.

14

ende alsus soe gaf hi gode die macht van allen. die scepper der werelt is: ende hi riet den sinen dat si starckelic vechten souden: ende dat sij staen souden totter soot voer die wet ende den tempel. ende de stat ende tvolc ende tlant. ende die poerters

[p. *644l]

ende hij leide sijn heer neuen modyn.

15

Ende doe hi den sinen ghegheuen hadde van gods victorien. so anginc hi mit alten starcken ionghelinghen wtgecoren in des conincs sale bi nacht. ende hij verscloech inden getelden viertien dusent man: ende den meesten elyphant mitten ghenen dier op waren.

16

Ende sij veruolden der vianden heer mit alten groten anxt ende vrese: ende doe si haer dinghen eerlic ghedaen hadden so toghen si wech.

17

Ende dit geuiel doe die dach opghinc met dat hem gods bescermenisse halp

18

Mer die coninc ontfinc weder stouheit. ende pijnde der ioden vaste steden mit machinen.

19

ende beruerde sijn heer tegen bethsuram dat der ioden ghewaerde stat was. ende hi wort veriaghet. ende ghestoten. ende verminret.

20

Want iudas leuerde den ghenen dier binnen waren haer notorft.

21

Mer rodochus vander ioden heer ontboot den vianden. der ioden heimelicheit: ende men sochten ende men vincken ende men besloten.

22

Ende die coninc had weder reden anden genen die in bethsura waren ende hi gaf hem vrede ende ontfincse ende toech wech.

23

ende street teghen iudam: ende hi wort verwonnen Mer doe hi vernam dat philps die gelaten was bouen die besorginge rebelleerde tegen hem binnen der stat te anthiochien. soe wort hi in therte beroeft ende hi badt den ioden. ende wert hem onderdaen ende zwoer hem al te doen dat hem guet dencken soude: ende doe hij te vreden was mit hem. soe offerde hi sacrificie: ende eerde den tempel ende hij leide giften:

24

ende omhelsde machabeum: ende maecten beleider ende prince van ptholomaiden tot gerrenen.

25

Ende doe die coninc tot ptholomaiden gecomen was soe nament die vander stat onwaerdelijc vander vrientscap die die coninc mitten ioden ghemaect hadde: ende haddent onwaert om dat hij machschien die beloften breken soude.

26

Ende lysias ghinc doe opter vonnisse stuel: ende seide hem die reden. ende vredet volc: ende hi keerde weder te anthiochien waert Ende in deser manieren was des conincs reysen ende keeren