Bible in duytsche (Delftse bijbel 1477)

§ Capitel .xi

1

NA een luttel tijts hier na quam lysias des conincx procurere ende sijn maech ende sijn prouoest vanden besorghen die dat zwaerlic verdroeth dat hem dit gheuallen was:

2

ende hi vergaderde tachtich dusent mannen ende al sijn geredenen. ende hi quam tegen den ioden ende hij meende als hi die stat ghewonnen soude hebben. dat hi daer heidenen soude doen wonen:

3

ende dat si den tempel hebben souden in beiach van ghelde alsoe hij der ander heidenen tempel hadde. ende dat hi elcs iaers dat hoghe paepscap vercopen soude.

4

ende hi en pensde niet om gods cracht: mer hi wort mit herten verstijft. ende inder menichte van sinen voetuolgers ende inden dusenden van sinen gheredenen. ende inden tachtichsten van sinen oliphanten verliet hi hem.

5

Ende doe hi binnen iudea gecomen was ende hi bi bethsura quam die een seer nauwe stat was. leggende bi iherosolima vijf stadien. op dese stat street hi

6

Ende doe machabeus ende die mit hem waren vernamen datmen op die vaste stat street: so baden si mit alle der scaren den here met screien ende mit tranen: dat hi hem enen gueden enghel senden woude tot israhels salicheit.

7

Ende machabeus nam eerst sijn wapen ende hi riet den anderen dat sij mit hem die vrese angingen: ende dat si haren brueders salcoers daden.

8

Ende doe sy te gader vromelic voertoghen ende noch binnen iherosolima waren. so openbaerde een ghereden voer hem ridende in een wit cleet: met gulden wapen den speer scuddende.

9

Doe ghebenediden sij alle te gader den ontfermhertigen god. ende worden verstout van herten: niet

[p. *644g]

allene die menschen mer oec die paerden die bereet waren een yseren muyer doer te lopen.

10

Dus so ghinghen sij bereet: ende hadden enen hulper vanden hemel ende den here die op hem ontfermherticheit hadde.

11

Ende si vielen op die vianden als leeuwen. ende si versloeghen elf dusent voetvolghers ende sesthien hondert gheredenen:

12

mer si dedense alle vlien: mer veel van dien luden worden ghewont ende ontuloghen bloet. Ende lysias ontvloech oec scandelic ende ontghing.

13

Ende om dat lysias niet sot en was: soe peinsde hi dat hem sijn heer vermindert was. ende hij verstont oec datmen die ioden niet verwinnen en mocht die hem op gods hulpe verlieten. ende hi sende tot hem.

14

om hem te oerlouen al dat gerecht wesen soude: ende dat hi den coninc dwingen soude haer vrient te worden.

15

Ende machabeus was lysias bode gonstich: in allen dingen dat profijt ansiende. Ende so wat machabeus lysiam screef vanden ioden: dat oerlofde die coninc

16

Want lysias screef litteren die dese manier in hadden. Lysias: der ioden volc saluut

17

Ian ende abessalon die van v ghesent waren die onse ghescriften v leuerden so eysschen si dat ic voldoen soude datmen mit hem ontboet.

18

Daer om soe wat sij den coninc brenghen mochten dat bediede ic hem: ende dat hi den oerbaer oerloefde heb ic ghedaen.

19

Hier om of ghi den prophijt trouwe hout soe sal ic mi voertmeer pijnen v te wesen sake van guede:

20

mer vanden anderen heb ic op elck woert beuolen desen ende den anderen die ic ghesent hebbe dat si mit v spreken sullen.

21

Ende vaert wel. In den hondertsten ende acht ende veertichsten iaer inden vier ende twintichsten daghe vander maent dyoscorus

22

Mer des conincs littere had dit in. Den coninc anthiochus: sinen brueder lysias saluut.

23

Om dat onse vader onder die goden gheuoert is ende wij willen die gene die onder onse rijc sijn sonder gherucht beleiden. ende om dat wi tot haren dingen arensticheit hebben willen:

24

so hebben wi verhoert dat die ioden onsen vader niet en wouden onderdaen wesen soe dat sij hem ouergheuen souden totter griexer zeden. Mer dat si houden wouden haer wet: ende om dat si om dit eyschten van ons dat wi hem oerlouen wouden haer wet.

25

Ende om dat wij willen dat dese luden vredelic sullen wesen: soe beuelen wij ende vonnissen datmen hem den tempel wedergheue: dat si daer in doen moghen nae hare opperste gewoente.

26

Hier om sultstu wel doen op dattu tot hem sentste. ende gif hem vrede: dat si geuroet wesen mogen mit gueden moede: ende haer selfs profijt mogen bewaren.

27

Mer die coninc sende totten ioden dustanighe litteren. Die coninc anthiochus den ouders vanden ioden. ende den anderen ioden saluut.

28

Sidi wel gesont soe sidi alsoe wi willen: ende wij sijn oec wel ghesont.

29

Menelaus quam tot ons ende seide: dat ghi comen woudt totten uwen die onder ons sijn.

30

Hier om so gheuen wij vrede van sekerheden hem allen die comen sullen totten

[p. *644h]

dertichtsten daghe der maent xandici:

31

dat die ioden moghen oeffenen hare spisen ende hare wet als si te voren deden: ende dat nyemant van hem luden en sal ghedogen enich verdriet van dien dat bi roeckeloesheden gedaen is.

32

Ende ic heb menelaus gesendt dat hij v toe spreken sal.

33

Vaert wel. Inden hondertsten ende acht ende veertichsten iaer op ten vijftiensten dach der maent xandici.

34

Soe senden die van romen een litter die aldus in hielt. Quintusmemmius ende tytusmanilius der romeynen legaten: der ioden volc saluut

35

Van dien lysias sconincs neye v geoerloeft heeft ende wij hebbent geconsenteert.

36

Mer van dien dat hi seide datmen ten coninc senden soude. daer of hebt naersteliken raet onderlinghe. ende sendt haestelic yemant dat wijt onderscheiden moghen alsoet v oerbaer is. Want wij trecken te anthyochien waert.

37

Daer om haest v weder te scriuen: dat wi weten mogen van wat wille dat gi sijt

38

Vaert wel Inden hondertsten ende acht ende veertichsten iaer op ten vijf thiensten dach der maent xandici.